“Mələk” ailə-uşaq əyləncə mərkəzi - Tamara Babayeva: “Bizim mərkəzdə yanğın təhlükəsizliyi sistemi yüksək səviyyədə qurulub” “Simba Baku” uşaq əyləncə mərkəzi - Lalə Məmmədova: “Siqnalizasiya sistemimiz, yanğın əleyhinə balonlarımız var” “Balu” və “Atrium” uşaq əyləncə mərkəzləri də “təhlükəsizlik tam qorunur” deyirlər “Park-Bulvar”dan isə ərazidə fəaliyyət göstərən bütün obyektlərin yanğın təhlükəsizliyi ilə bağlı mütəmadi yoxlamalar aparıldığı bildirilir
Elə bir uşaq tapılmaz ki, uşaq əyləncə mərkəzlərində əylənməyi sevməsin. Bu gün paytaxtımızda və bölgələrdə çoxlu sayda uşaq əyləncə mərkəzi fəaliyyət göstərir. Hətta iri ticarət mərkəzlərinin, supermarketlərin içində də uşaqların əyləncəsini təmin etmək məqsədilə əyləncə zalları, otaqları yaradılıb. Uşaq əyləncə mərkəzində uşaqlar üçün yaradılan şərait, çeşidli oyun qurğuları, əyləncə vasitələri onların çox xoşuna gəlir.
Uşaqları əsasən əylənmək, oynamaq, valideynləri isə təhlükəsizlik məsələləri düşündürməlidir. Yəni hər bir valideyni ilk növbədə uşağını apardığı əyləncə mərkəzində yanğın təhlükəsizliyi sisteminin olub-olmaması maraqlandırmalıdır. Ümumiyyətlə, uşaq əyləncə mərkəzlərində yanğınla bağlı kütləvi təhlükəsizlik tədbirlərinin hansı səviyyədə həyata keçirilməsi məsələsi hər kəsi düşündürür.
Bu məkanlarda kütləvi yanğın təhlükəsizliyi necə təmin edilir?
Qeyd edək ki, Bakıda fəaliyyət göstərən uşaq əyləncə mərkəzlərinin bir qismi birinci, bir qismi isə yuxarı mərtəbələrdə fəaliyyət göstərir. Ekspertlərin fikrincə, uşaqların maraq göstərdiyi əyləncə və oyun yerlərinin bir qisminin ticarət mərkəzlərinin sonuncu mərtəbələrində yerləşdirilməsi doğru deyil. Onlar hesab edirlər ki, yanğın təhlükəsi baş verərsə, bu, uşaqların təhlükəsiz şəkildə yanğın baş verən ərazidən uzaqlaşdırılması məsələsində müəyyən problem yarada bilər. Ekspertlər bildirirlər ki, uşaqların oyun və əyləncə yerləri birinci mərtəbədə olarsa, bu onların yanğından kütləvi şəkildə xilas edilməsini ləngitməz.
Bakıda fəaliyyət göstərən bir neçə uşaq əyləncə mərkəzi ilə əlaqə saxlayıb bu məkanlarda yanğın təhlükəsizliyi sisteminin hansı formada qurulması ilə maraqlandıq.
“Mələk” ailə-uşaq əyləncə mərkəzinin meneceri Tamara Babayeva bizimlə söhbətində bildirdi ki, çalışdığı uşaq əyləncə mərkəzi birinci mərtəbədə yerləşir və burada uşaqların yanğın təhlükəsindən xilas edilməsi üçün bütün şərait mövcuddur: “Əlbəttə, yanğın hadisəsi hər bir insanı narahat edən, təşvişə salan bir olaydır. Yanğın təhlükəsizliyi məsələsi hər bir uşaq əyləncə mərkəzində yüksək səviyyədə təmin olunmalıdır. Bizim mərkəzdə yanğın təhlükəsizliyi sistemi yüksək səviyyədə qurulub. Əgər zalda kiçik bir tüstü də müşahidə edilsə, həmin dəqiqə siqnalizasiya qurğusu işə düşüb səslənir. Yanğın təhlükəsizliyi balonlarımız da var. Digər tərəfdən də mərkəzimiz birinci mərtəbədə yerləşir, çoxlu pəncərəsi, geniş qapısı var. Yəni bir hadisə baş verərsə, uşaqları pəncərədən çıxarmaqla da yanğından xilas etmək tam mümkündür. “Mələk” ailə-uşaq əyləncə mərkəzinin ərazisi elə də böyük deyil. Ümumiyyətlə, 200-300 uşağın eyni zamanda bir məkana toplanması yaxşı hal deyil. Çünki uşaqlar kütləvi şəkildə bir məkana toplandıqda daha çox qəza halları baş verir. Görürsünüz, iki-üç uşaq bir evdə olanda nə qədər səs-küy olur. Biz uşaqların yanğından qorunması üçün bütün təhlükəsizlik tədbirlərini həyata keçiririk”.
“Simba Baku” uşaq əyləncə mərkəzinin meneceri Lalə Məmmədovanın sözlərinə görə də təmsil etdiyi mərkəzdə uşaqların yanğından kütləvi mühafizəsi üçün lazımi tədbirlər həyata keçirilib: “Bizim uşaq əyləncə mərkəzi birinci mərtəbədə yerləşir. Burada uşaqların təhlükəsizliyi tam təmin olunur. Uşaqların yaxınlığında əməkdaşlarımız, o cümlədən də mühafizəçilər olur. Yanğın təhlükəsizliyi ilə bağlı bütün tədbirlər həyata keçirilir. Siqnalizasiya sistemimiz, yanğın əleyhinə balonlarımız var”.
“Balu” uşaq əyləncə mərkəzindən də bizə bildirdilər ki, bu mərkəzdə yanğın təhlükəsizliyi ilə bağlı bütün tədbirlər həyata keçirilir. Mərkəzin menecerinin sözlərinə görə, mərkəz birinci mərtəbədə yerləşdiyindən, yanğın baş verərsə, buradan uşaqları asanlıqla çıxarmaq olar.
“Atrium” uşaq əyləncə mərkəzindən də bildirdilər ki, burada da uşaqların kütləvi olaraq yanğından xilas edilməsi üçün şərait var. Mərkəz əməkdaşının qeyd etdiyinə görə, hələ indiyə qədər burada yanğınla bağlı hansısa xoşagəlməz hal baş verməyib.
Qeyd edək ki, bu günlərdə Rusiyanın Kemerovo şəhərindəki "Qış albalısı" ticarət mərkəzində baş verən yanğın zamanı yaşanan faciə Azərbaycanda da narahatlıqla qarşılandı. Bu da bütün əyləncə mərkəzlərində yanğın təhlükəsizliyi məsələsinə daha məsuliyyətlə yanaşmağı aktuallaşdırdı.
Onu da bildirək ki, bir sıra iri ticarət mərkəzlərindən mətbuata verilən məlumata görə, bu mərkəzlərdə yanğın təhlükəsizliyi yüksək səviyyədə həyata keçirilir.
“Park Bulvar” AVM-in PR-meneceri Günay Malikqızı yerli KİV-ə bildirib ki, təmsil etdiyi ticarət mərkəzində təlimlər qanunvericiliyə uyğun şəkildə həyata keçirilir: “Fövqəladə Hallar Nazirliyinin Dövlət Yanğından Mühafizə Xidmətinin plan qrafikinə əsasən, “Park Bulvar” AVM-də əməli yanğın-taktiki təlim-məşğələ uğurla həyata keçirilir. Hər mərtəbədə 4 yanğın çıxış koridoru və pilləkənləri mövcuddur. Ərazidə 300-ə yaxın işlək vəziyyətdə olan yanğınsöndürən balon var. Məkanın təxliyyə planı hər mərtəbədə asılıb. Əməkdaşlar təlimatlandırılıb və fövqəladə vəziyyətdə insanların evakuasiyası üçün hansı tədbirləri görməli olduqları haqda məlumatlandırılıb. -1 və -2 (mənfi bir və mənfi iki) mərtəbələrdə yanğının qarşısını avtomatik alan qurğular var. Avtomobil dayanacağı, həmçinin, yanğının lokallaşmasına xidmət edən xüsusi su pərdəsi yaradan cihazlarla təchiz olunub. “Park Bulvar” rəhbərliyi tərəfindən ərazidə fəaliyyət göstərən bütün obyektlərin yanğın təhlükəsizliyi ilə baglı mütəmadi yoxlamalar aparılır”.
G.Malikqızı əlavə edib ki, bina standartlara uyğun tikildiyi üçün, yanğın çıxışının olmaması mümkünsüzdür: “İstənilən vaxt bunu gəlib görmək mümkündür. Həmçinin, adi vətəndaşlar da bunu görə bilər. Yanğın çıxışlarının işarələri də stendlərdə qeyd olunub. Yanğınsöndürən balonlar vətəndaşların görəcəyi yerdədir. Onların qabağında reklam stendinin quraşdırılmasına icazə vermirik. Çünki hadisə zamanı insanlar balonları görməli və açıb istifadə etməyi bacarmalıdırlar. Qanunvericilikdə nəzərdə tutulan vaxtda balonlar, şlanqlar yoxlanılır və lazım olan vaxtda dəyişdirilir”.
Qeyd edək ki, “Park Bulvar”da da uşaq əyləncə zalları var.
İradə SARIYEVA
