Yaşar Alxasovun qəhrəmanlığı əbədi bir qəlb oduna çevrilən vətən sevgisindən yaranıb. Elin igid oğlu həyatı dərk edən gündən Azərbaycan torpaqların müqəddəsliyini hər şeydən əziz bilir. Odur ki, xain düşmənin alçaq əməllərinə dözə bilmir, əlinə silah alıb döyüş meydanında olmaq, düşmənlə üz-üzə gəlib onu əzmək keçir ürəyindən...
25 mart 1992-ci ildə Yaşar 18 yaşa çatır. Vətəni müdafiə etmək üçün cəbhə bölgəsinə yollanır. Kəşfiyyatçı kimi xidmətə başlayır. İlk gündən vətənsiz, torpaqsız, qeyrətsiz yaşamağı ölümdən betər bilir. Cəsur əsgər bu yolda canından belə keçməyə hər an hazır olur.
Yaşar 3 illik xidməti zamanı bütün varlığı ilə bağlandığı vətənə olan məhəbbətini ağır döyüşlərdə layiqincə sübut edir. Öndə gedənlərin sırasında olmaqla həmişə qaynar nöqtələrə can atır, qəlbində bir azadlıq havası, qələbə təntənəsi əzmlə döyüşür, igidlik göstərir. Ən əsası, onun əldə etdiyi məlumatlar əsasında qurulan əməliyyatlar çox uğurla başa çatır. Və Yaşar kimi qeyrətli oğullar hesabına əldən getmiş torpaqlar tədricən yağı düşməndən təmizlənir..
Y.Alxasovun axırıncı döyüş yeri Füzulinin Horadiz qəsəbəsi olur. Düşmənlə ölüm-dirim savaşına girir. Vətənə məhəbbət, sədaqət ruhunda vuruşur. Kəşfiyyat tapşırıqlarını vaxtında, dəqiq yerinə yetirir. Neçə-neçə yoldaşını mühasirədən çıxarır. Vətənini son nəfəsinə qədər qoruya bilsə də, özünü qoruya bilmir. Düşmən Yaşarı snayperlə vurur. Xalqına, vətəninə bağlı bir ürək əbədi susmaqla Azərbaycan daha bir ləyaqətli övladını itirir. Bu itki döyüş yoldaşlarını daha çox yandırır, göynədir. Axı əsl qəhrəman onları əbədi olaraq tərk edirdi...
Yaşar Alxasov dağlar diyarı Lerik rayonunun Zəriküməco kəndindən idi. Mart ayının 25-də, qar altında bənövşələrin çatladığı vaxtda dünyaya göz açmışdı. Ailənin beşinci övladı idi Yaşar. Dörd qardaşı vətənə ləyaqətlə xidmət edib, üzüağ doğma kəndinə qayıtmışdı. Əbütalıb kişi, Şövkət ana övladlarını vətənpərvər böyütmüş, onlara həyatda halal yaşamağın yollarını öyrətmişdilər. Yaşar düşmənlə döyüşdə bunu çox dolğun təsdiqlədi. Şərəfli ölümü ilə bir ailənin övladı vətən sevgisinin igidlik rəmzitək bütün millətin qəlbinə köçdü. Belə uca zirvəyə qalxmaq isə hər bəşər övladına nəsib olmur. Buna görə də Yaşar qısa həyat yolu yaşasa da, işıqlı xatirəsi heç vaxt unudulmaz.
Zəfər ORUCOĞLU Azərbaycan Jurnalistlər Birliyinin üzvü
