Bahadur Bilalov: “Təbii ki, onlar da Ermənistana getməyə maraq göstərirlər”
Məlumatlara görə, ötən il Rusiyadan Ermənistana gedən turistlərin sayı 28 faiz artıb. Bu barədə “TurStat” analitik agentliyinin tərtib etdiyi hesabatda qeyd olunur. Hesabatda rusların ən çox hansı ölkələrə səfər etdikləri barədə məlumat yer alıb. Qeyd olunur ki, Rusiyadan Ermənistana səfər edən turistlərin sayı 2016-cı illə müqayisədə 2017-ci ildə 28 faiz artıb. Beləliklə, Ermənistana gedən rusiyalı turistlərin sayı 368 minə çatıb.
Qeyd edək ki, bir sıra xarici turizm agentliklərinin məlumatında Rusiya vətəndaşlarının ən çox səfər etdiyi ölkələr arasında Azərbaycanın adı ilk sırada yer alıb. Hətta bir müddət öncə rus mətbuatı belə bir məlumat yaymışdı ki, Azərbaycan bu il xaricdə dincələn Rusiya vətəndaşları üçün MDB-də ən yaxşı ölkələrdən biri olub. Ölkəmiz hər zaman reytinq cədvəlində ilk yeri tutub. İlk beşlikdə Azərbaycandan başqa, Qazaxıstan, Ermənistan, Qırğızıstan və Belarus olub.
Onu da bildirək ki, “DaTravel.com” şirkətinin baş direktoru Vladislav Şevtsov rusiyalı turistlərin qabaqcadan sifariş etdiyi yerlər arasında Qırğızıstan paytaxtı Bişkekin lider olduğunu, amma Bakı və Tiflisə də tələbatın artdığını xarici mediaya açıqlamasında deyib.
Maraqlıdır, Rusiyadan Ermənistana gedən turistlərin sayının artması doğrudurmu?
Bu barədə suallarımızı turizm sahəsi üzrə ekspert Bahadur Bilalov cavablandırdı. O, “Bakı-Xəbər”ə açıqlamasında qeyd etdi ki, Ermənistana səfər edən Rusiya vətəndaşlarının sayı arta bilər: “Bu təbii haldır. Rusiyalı turistlərin Ermənistana maraq göstərməsinin müəyyən səbəbləri var. İlk olaraq bildirim ki, Rusiyada erməni əsilli vətəndaşlar yaşayırlar. Təbii ki, onlar da Ermənistana getməyə maraq göstərirlər. Ermənistana gedən şəxslərin böyük əksəriyyəti erməni əsilli Rusiya vətəndaşlarıdır”.
Həmsöhbətimiz hesab edir ki, erməni əsilli həmin şəxsləri xarici turist hesab etmək düzgün deyil.
Günel CƏLİLOVA
