Eyyub Hüseynov: Qida Təhlükəsizliyi Agentliyinin xoş məramı o zaman həyata keçə bilər ki, əhalinin inamını qazansın”
“Bakıda yeni ət kəsimi məntəqələri yaradılacaq”. Bunu Qida Təhlükəsizliyi Agentliyinin sədri Qoşqar Təhməzli “Media və təhlükəsiz qida” mövzusunda keçirilən tədbirdə deyib.
O qeyd edib ki, qanunsuz ət kəsimi məsələsi ilə əlaqədar monitorinq keçirilib: "Monitorinq zamanı Azərbaycanda təxminən 111 baytarlıq sanitar ekspertiza laboratoriyalarının olduğunu öyrəndik və onların şəraitini araşdırdıq. Hesab edirik ki, bu məsələnin qarşısı sırf inzibati qaydada alınmalıdır. Çünki əks halda görülən tədbirlər müvəqqəti xarakter daşıyacaq. Ona görə təklif etdik ki, hər bir rayonda və Bakı şəhərində ət kəsimi məntəqələri yaradılsın".
Agentliyin sədri bildirib ki, artıq bununla bağlı Bakı Şəhəri İcra Hakimiyyəti və yerli icra hakimiyyəti orqanlarının rəhbərləri ilə görüşlər keçirilib: "Bakı kəndləri və paytaxtətrafı regionlar üzrə əhali və təsərrüfat sayına görə kəsim məntəqələri yaradılacaq. Hazırda kəsim yerlərinin formaları müəyyənləşdirilir. Bu məntəqələr ola bilsin modul tipli və ya mobil formada olsun. Artıq onların standartları müəyyənləşdirilib və eskizlər çəkilib.
Qurban bayramında Azərbaycanda kütləvi şəkildə heyvan kəsimi həyata keçirilir. Ona görə də ölkədə həmin ərəfədə nə qədər kəsim məntəqələrinə ehtiyac olduğu və onların müvafiq laboratoriyalarla təmin edilməsi məsələsi araşdırılır. Bundan başqa, Bakıya iri və xırda buynuzlu heyvanların gətirilməsi qadağan olunacaq. Paytaxtın ətrafındakı qəsəbələrdə isə ancaq iribuynuzlu heyvanları müvafiq təsərrüfatlarda saxlamaq üçün icazə veriləcək. Gələcəkdə Qurban bayramı ərəfəsində küçələrdə ət kəsimi olmayacaq".
Hər bir rayonda ət kəsimi mənqələrinin yaradılmasına münasibət bildirən Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə açıqlamasında qeyd etdi ki, 10 il öncə Kənd Təsərrüfatı Nazirliyinin təşəbbüsü ilə laboratoriya yaradılıb: “Məndə olan məlumata görə, Bakıda 10-a yaxın kəsim məntəqəsi var. Bundan əlavə, bəzi şirkətlərin də ət kəsimi məntəqələri var. Lakin ət kəsimi məntəqələrinə müraciət edən yoxdur. Qida Təhlükəsizliyi və Kənd Təsərrüfatı Nazirliyinin küçələrdən sallaqxanaların yığışdırılması təklifi müsbət qiymətləndirilməlidir. Küçələrdə ət kəsiminin yığışdırılması ilə bağlı Bakı Şəhər İcra Hakimiyyəti tərəfindən müəyyən işlər görülsə də, nəticə istənilən səviyyədə olmayıb. Çünki vətəndaş gözü qarşısında kəsilən əti almağa üstünlük verir. O zaman sual olunur ki, vətəndaş niyə marketdən ət almağa deyil, küçədə kəsilən əti almağa üstünlük verir? Çünki vətəndaşın baytara, ət kəsiminə nəzarət edən quruma inamı yoxdur. Bu səbəbdən Qida Təhlükəsizliyi Agentliyinin xoş məramı o zaman həyata keçə bilər ki, əhalinin inamını qazansın. Əhalinin küçələrdə ət kəsiminə inamı olmasa, buna tələbat da olmayacaq”.
Həmsöhbətimiz hesab edir ki, yaranmış vəziyyətin qarşısını almaq üçün Qida Təhlükəsizliyi Agentliyi maarifləndirmə işi aparmalıdır. Maarifləndirmə media vasitəsilə həyata keçirilməlidir.
Günel CƏLİLOVA
