Çingiz İsmayılov: “Bu onu göstərir ki, Azərbaycan Turizm və Menecment Universiteti bu sahədə mütəxəssislərin hazırlanması baxımından artıq beynəlxalq nüfuza malikdir” “Azərbaycana turizm üzrə təhsil almaq üçün daha çox ölkədən gənclər cəlb etməliyik”
Bu gün Azərbaycan yalnız turistlərin kütləvi maraq göstərdiyi ölkə deyil, həm də beynəlxalq turizm sənayesinin inkişafına təkan verən bir ölkə kimi tanınır. Ölkəmizdə dünyanın turizm xidmətləri tələblərinə, standartlarına cavab verən kadrların hazırlanması, onların peşəkar səviyyədə fəaliyyət göstərməsi nəzərdən qaçmır. Artıq bir sıra qonşu respublikalar Azərbaycan təcrübəsindən istifadə edərək öz ölkələrində turizm sənayesi qurmaqda maraqlıdırlar.
Bu günlərdə Rusiya Federasiyası Dağıstan Respublikasının turizm və xalq bədii sənətkarlıq naziri Rəbiyyət Zakavova Azərbaycanda səfərdə olub və Azərbaycanın mədəniyyət və turizm naziri Əbülfəs Qarayevlə görüş keçirib. R.Zakavova həmkarı ilə görüşdə bir sıra məsələləri müzakirə edib. O, bildirib ki, Azərbaycanla yalnız turist mübadiləsi sahəsində deyil, başqa sahələrdə də əməkdaşlıq etmək istəyirlər. Xanım nazir həmkarından Dağıstan turist sənayesinə kadr hazırlığının yaxşılaşdırılması məqsədilə Azərbaycan Turizm və Menecment Universitetində təlimlərin həyata keçirilməsində köməklik göstərilməsini xahiş edib.
Mütəxəssislərin bildirdiyinə görə, Azərbaycan bütün bölgədə özünə böyük nüfuz qazanan dövlətdir. Azərbaycanda turizm sənayesinin inkişafı sahəsində böyük işlər görüldüyünü vurğulayan mütəxəssislərin sözlərinə görə, ölkəmiz turizm üzrə peşəkar kadrların hazırlanması sahəsində böyük təcrübəyə malikdir. Mütəxəssislər qeyd edirlər ki, nəinki Şimali Qafqaz respublikaları, eləcə də digər qonşu dövlətlər Azərbaycan təcrübəsini öyrənib öz ölkələrində tətbiq etməkdə maraqlıdırlar.
Turizm sahəsi üzrə mütəxəssis Çingiz İsmayılov mövzunu şərh edərkən “Bakı-Xəbər”ə bildirdi ki, Azərbaycanın nümunə seçilməsi tam təbiidir: “Bilirsiniz ki, Azərbaycan Turizm və Menecment Universiteti Avstriyanın müvafiq Krems Universiteti ilə əməkdaşlıq edir. Artıq ikili sertifikatların təsdiq olunması, hər iki ali məktəbin eyni hüquqa malik olması, təbii ki, bu ali məktəbin nüfuzunun qalxmasına səbəb olub. Fakt budur ki, Azərbaycan Turizm və Menecment Universitetinin nüfuzu dünyada təsdiqlənir. Avstriyanın müvafiq universitetindən mütəxəssislər gəlib bu universitetdə mühazirələr oxuyurlar, treninqlər, seminarlar keçirlər. Bu onu göstərir ki, Azərbaycan Turizm və Menecment Universiteti bu sahədə mütəxəssislərin hazırlanması baxımından artıq beynəlxalq nüfuza malikdir. Bu səbəbdən də bu ali məktəbə müraciət edirlər ki, oradan yeni bilik, təcrübə qazansınlar. Azərbaycan artıq regionda özünü turizm üzrə mütəxəssislərin hazırlandığı bir ölkə kimi tanıdır. Dağıstanlı nazirin Dağıstan Respublikası üçün turizm kadrlarının hazırlanması məsələsi barədə Azərbaycana müraciət etməsi çox müsbət haldır. Bu cür müraciətlərdən bəhrələnmək, yardım üçün bizə müraciət edənlərə dəstək göstərmək vacibdir. Bu gün yalnız Dağıstandan deyil, Çeçenistandan, Şimali Qafqazın digər respublikalarından, eləcə də ayrı-ayrı ölkələrdən turizm üzrə mütəxəssislərin hazırlanmasına ciddi diqqət yetirilməli və oradan tələbələr cəlb etməliyik. Bu həm Turizm və Menecment Universitetinin nüfuzuna müsbət təsir edəcək, həm də Azərbaycanın turizm sənayesi üzrə mütəxəssislərin hazırlandığı bir dövlət kimi daha çox ölkələrdə tanınmasına təkan verəcək”.
Ç.İsmayılovun sözlərinə görə, Azərbaycan bu şansdan istifadə etməli və bölgədə turizm sənayesinin inkişafına töhfələr verməlidir. “Təhsil almaq üçün Azərbaycana gələn ilk xarici gənclərin burada ümidləri doğrulacaqsa, təbii ki, bu, gələcəkdə Turizm və Menecment Universiteti üçün bir reklam olacaq. O gənclər bu ali məktəbi bitirdikdən sonra rəqabətə davamlı bir mütəxəssis kimi özlərini təsdiqləsələr, bu müsbət hal olacaq. Odur ki, Azərbaycana turizm üzrə təhsil almaq üçün daha çox ölkədən gənclər cəlb etməliyik” - deyə Ç.İsmayılov bildirdi.
İradə SARIYEVA
