Ərşad Hüseynov: “Kamera görüntüsü bazaya yönlənsə, polisə də məlum olar ki, təcili tibbi yardım maşınına hansı sürücü yol vermir və onu cəzalandırar” Rasif Bağırov: “...həmin nəqliyyat vasitəsinə cəza olaraq 3 bal tətbiq olunur”
Təcili tibbi yardım maşınlarına kameralar quraşdırılacaq. Amma bu, respublikanın bütün təcili tibbi yardım maşınlarına aid edilməyəcək. Bu yenilik Səhiyyə Nazirliyinin Təcili Təxirəsalınmaz Tibbi Yardım Stansiyasının 12 regional məntəqəsindəki təcili yardım maşınlarına aiddir. Bu barədə mediaya Səhiyyə Nazirliyinin Təcili Təxirəsalınmaz Tibbi Yardım Stansiyasının baş həkimi Mirələm Cəlalov deyib.
O qeyd edib ki, həmin kameralar internet üzərindən canlı olaraq dispetçer məntəqəsilə bağlantı yaradır: “Bizim burada oturan dispetçer vəziyyətə nəzarət edəcək. Kameralar vasitəsilə hadisənin miqyası qiymətləndiriləcək. Qəza, yaralılar, ağır vəziyyətlər olarsa, GPS naviqasiya vasitəsilə həmin yer müəyyən edilir və əlavə həkim briqadasını qəza yerinə göndərir. Bunun üçün artıq məşhur texnoloji şirkətlərlə danışıqlar aparılır. Hansı ki, onlar təcili tibbi yardım maşınlarında kameralar quraşdıracaqlar. Bu təcrübədən xarici ölkələrdə geniş istifadə olunur. Təcrübəyə digər təcrübəni də əlavə etmək olar. Məsələn, quraşdırılacaq kameralar həkimlərə, qəzaya nəzarət etmək üçündür. İnsanlara yerində yardımı nəzərdə tutur. Digər tərəfdən təcili yardım maşınına yol verməyən digər sürücüləri də qeydə ala bilər”.
Təcili yardım maşınlarına kameraların quraşdırılması ekspertlər tərəfindən də müsbət qarşılanır.
Nəqliyyat sahəsi üzrə ekspert Ərşad Hüseynov qeyd etdi ki, təcili tibbi yardıma yol verməyən sürücülər var. Bu hal da qanunla tənzimlənir. Kamera görüntüsü bazaya yönlənsə, polisə də məlum olar ki, təcili tibbi yardım maşınına hansı sürücü yol vermir və onu cəzalandırar: “Digər bir məsələ ondan ibarətdir ki, bəzi təcili yardım maşını sürücüləri tibbi maşını başqa məqsədlər üçün istifadə edirlər. Bax, buna da kameralar vasitəsilə nəzarət olunar. Təcili çıxışda olmayanda qəza səsləri verməz, sürət həddini aşmaz. Təcili tibbi yardım maşınlarına kameralar quraşdırılması regionlarda ona görə olacaq ki, böyük qəzalar magistral yollarda, bölgələrə yaxın ərazilərdə baş verir. Bu yenilik 2018-ci il üçün nəzərdə tutulub. Yəni tezliklə həyata keçiriləcək”.
Həkim-ekspert Rasif Bağırov bizimlə söhbətində qeyd etdi ki, təcili tibbi yardım maşınlarına yol verməyən sürücülərin cəzalandırılması dövlət tərəfindən qəbul olunmuş qərardır: "Bu yeni məsələ deyil. Xəstə dalınca gedən maşına yol verməyən sürücü barəsində Bakı Şəhər Dövlət Yol Polisi İdarəsinə şikayət edildikdə həmin nəqliyyat vasitəsinə cəza olaraq 3 bal tətbiq olunurdu. Sadəcə, insanlıq baxımından təcili yardım maşınları heç bir sürücü barəsində şikayət etməyib. Sürücülər bu haldan istifadə edirlər. Digər nəqliyyat vasitələrinin sürücüləri görəndə ki, onun arxasında təcili yardım maşını işıq yandıraraq gəlir, o zaman idarə etdiyi minik vasitəsini sağa çəkib yol veməlidirlər. Təcili tibbi yardım maşınının sürücüsü qırmızı və göy işığı yandırırsa, bu o deməkdir ki, həmin maşın təcili hansısa xəstənin üstünə gedir. Təcili tibbi yardım maşını geri qayıdan zaman həmin işıqlar söndürülür. İşığın yanmaması maşının boş və sakitlik olmasını göstərir”.
Günel CƏLİLOVA
