“First Class Travel” - Kəminə Axundova: “Novruz bayramı ilə bağlı bölgələrə turlar təşkil olunacaq” “Travel Baku” - Sənubər Əliyeva: “... tur paketə istirahət mərkəzlərində Novruz şənliyi, tanınmış müğənnilərin iştirakı ilə keçiriləcək konsert proqramları daxildir” “SF Travel” - Sona Rəcəbova: “Novruz bayramı proqramını biz bu işlə məşğul olan şirkətlərdən alırıq”
Bir neçə gündən sonra Novruz bayramı ilə bağlı istirahət günləri başlayır. Tətil müddətində vətəndaşlar öz istirahətlərini təşkil etmək üçün turist səfərlərini də gözdən keçirir və müəyyən planlar tərtib edirlər.
Novruz bayramı şənliklərində iştirak etmək üçün dünyanın bir sıra ölkələrinin vətəndaşları Azərbaycana gəlirlər. Turizm şirkətlərinin Novruz bayramına necə hazırlaşdıqlarını, hansı proqramlar tərtib etdiklərini öyrənmək məqsədilə onlara müraciət etdik.
“First Class Travel” şirkətinin daxili tur meneceri Kəminə Axundova “Bakı-Xəbər”ə açıqlamasında qeyd etdi ki, Novruz bayramı ilə bağlı turların təşkili nəzərdə tutulur: “Turlar əsasən Qusar və Qəbələdə olan istirahət mərkəzlərinə şamil olunur. Həmin istirahət mərkəzlərində Novruz bayramı ilə əlaqədar müxtəlif konsert və tamaşalar təşkil olunacaq. Həmçinin, ənənəyə uyğun olaraq, Novruz şənliyi də təşkil ediləcək. Məlumat üçün bildirim ki, Novruz kampaniyası martın 26-na kimi davam edəcək”.
K.Axundovanın sözlərinə görə, ötən illə müqayisədə bu il Novruz bayramı üçün turlara müraciət edən turistlərin sayı üstünlük təşkil edir: “Turist sayı həm yerli, həm də xaricilərdə üstünlük təşkil edir. Bir neçə gündən sonra Novruz bayramı ilə əlaqədar olaraq ölkədaxili səfərlər təşkil olunacaq. Məlumat üçün bildirim ki, turlar 3-5-7 günlük nəzərdə tutulub”.
“Travel Baku” turizm şirkətinin meneceri Sənubər Əliyeva bizimlə söhbətində qeyd etdi ki, Novruz bayramı ilə bağlı olaraq müxtəlif proqramlar təşkil olunacaq: “İstər yerli, istərsə də xarici turistlərə Novruz bayramı təəssüratını yaşatmaq üçün bəzi layihələr hazırlanıb. Bölgələrə bir neçə günlük turlar təşkil olunur. Turlar adətən 3-5-7 günlük olur. Quba, Qusar, Qəbələ, Şəki və digər rayonlara turlar təşkil edilir. Tur paketə istirahət mərkəzlərində Novruz şənliyi, tanınmış müğənnilərin iştirakı ilə keçiriləcək konsert proqramları daxildir”.
Həmsöhbətimizin sözlərinə görə, Novruz bayramı ilə bağlı Azərbaycana İrandan, Rusiyadan gələn turistlər daha çox olur: “Onu da deyim ki, ötən ildən fərqli olaraq, bu il Novruz bayramında xaricə gedən turistlərin sayı azalıb. Yerli turistlər daha çox daxili turizmə üstünlük verirlər”.
“SF Travel” şirkətinin meneceri Sona Rəcəbova bizimlə söhbətində qeyd etdi ki, çalışdığı şirkət Novruz bayramı ilə bağlı hər hansı bir proqram tərtib etməyib: “Bayram proqramını biz bu işlə məşğul olan şirkətlərdən alırıq. Onların istəyinə uyğun olaraq biz müəyyən işlər görürük”.
Günel CƏLİLOVA
