Daxili işlər orqanlarında cinayətkarlığa qarşı mübarizədə, asayişin və təhlükəsizliyin qorunmasında kişi həmkarları ilə bərabər qadın əməkdaşlarımız da üzərilərinə düşən vəzifələri layiqincə yerinə yetirir və fədakarlıq göstərirlər.
Sevindirici haldır ki, bu gün qadınlar gözəl ailə başçısı, qayğıkeş ana, mehriban bacı, ləyaqətli dost, bir sözlə dəyərli insan olmaqda həm də hüquq-mühafizə orqanlarının cəfakeş əməkdaşları kimi sıralarımızda çalışırlar. Cəmiyyətdə sabitliyin, əmin-amanlığın qorunması işinə öz töhfələrini verirlər.
Budur Azərbaycan qadını-öz zərifliyi, gözəlliyi, ağlı, dərrakəsi ilə çiynini ən çətin, gərəkli işlərin altına verib, cinayətkarlıqla mübarizə cəbhəsində belə öndə olan xanımlarımız...
Bahar nəfəsli bayram ərəfəsində həmsöhbət olduğum Mətanət Həşimova da güclü iradəsi,vətənpərvərliyi və fədakarlığı ilə seçilən əməkdaşlardandır. O, 1998-ci ildən Balakən Rayon Polis Şöbəsində Post Patrul Xidmətində polis nəfəri kimi xidmət etməyə başlayıb. Sonradan DİN-in Polis Akademiyasında təhsil alıb. Bir sıra vəzifələrdə - yetkinlik yaşına çatmayanlarla profilaktiki işlərin təşkili qrupunun, kadrlar qrupunun inspektoru kimi xidmətini davam etdirib. 2015-ci ildən etibarən isə RPŞ-də müstəntiq kimi çalışır. M.Həşimova gərgin iş rejiminin olmasına baxmayaraq ailəsinə də vaxt ayırmağı yaddan çıxarmır. Söhbət əsnasında gülümsəyərək – “Ailə qurduğum insan da yaxşı ki, polis əməkdaşı olub. O, mənim işimi daha yaxşı başa düşür və anlayışla qarşılayır - deyir. 2 oğul anası olan M.Həşimova onların təhsilinə xüsusi diqqət yetirir, vaxt tapıb dərslərinə də köməklik edir. Ən böyük arzusu isə vətənə, xalqa sədaqətlə xidmət edən övladlar yetişdirməkdir.
Mahir Məsimov DİN Mətbuat Xidmətinin əməkdaşı
