Çingiz İsmayılov: “Qida məhsulları və turizm xidmətlərinin qiyməti aşağıdır”
Turizm mövsümünün istənilən fəslində istirahətini xaricdə keçirmək istəyənlərin sayında artım müşahidə edilməkdədir. Hazırda Türkiyə və Gürcüstan istiqamətində istirahətə gedənlərin sayında çoxluq müşahidə olunur. Gürcüstan Milli Turizm Administrasiyasının rəhbəri Georgi Çoqovadze xarici mediaya açıqlamasında qeyd edib ki, daha çox səfər Azərbaycan, Türkiyə (ötən illə müqayisədə 28,1 faiz artım), Rusiya (+24,2 faiz) və İrandan (+130,6 faiz) olub.
O qeyd edib ki, ümumilikdə 2018-ci ilin yanvar-fevral aylarında Gürcüstana 885 047 əcnəbi səyahətçi səfər edib ki, bu da ötən ilin analoji dövrünün göstəricisini 129 967 nəfər üstələyir. Qeyd olunan ölkəyə səfər edənlər arasında azərbaycanlılar üstünlük təşkil edir.
Gürcüstana səfər edən azərbaycanlı turistlərin sayının nə səbəbdən artdığı maraq doğurur.
Turizm sahəsi üzrə eskpert Çingiz İsmayılova mövzu ilə bağlı müraciət etdik. O bizimlə söhbətində qeyd etdi ki, Gürcüstana səfər edənlər arasında azərbaycanlı turistlərin üstünlük təşkil etməsi prosesi uzun illərdir davam edir: “Gürcüstanı seçən turistlərin sayının artması səbəbi müxtəlidir. İlk olaraq bildirim ki, Azərbaycandan Gürcüstana təkcə yay aylarında deyil, ilboyu sadəcə istirahət üçün gedirlər. Nəzərə almaq lazımdır ki, biz qonşuyuq, ora qatar, avtobus, minik avtomobili və ya təyyarə ilə getmək mümkündür.
Həmçinin, gürcü xalqı qonaqpərvərdir və insanlar da oradan razı qayıdırlar. Qida məhsulları və turizm xidmətlərinin qiyməti aşağıdır”.
Həmsöhbətimiz onu da vurğuladı ki, Bakı sakinlərinin bir qismi həftə sonları Azərbaycanın rayonlarına gedirlər, lakin təəssüratlar yaşamaq istədikləri zaman ən yaxın məkan olan Gürcüstana üz tuturlar.
Ç.İsmayılovun sözlərinə görə, Gürcüstana səfər edən azərbaycanlı turistlərin sayının artması səbəblərindən biri də əhalinin yaşayış səviyyəsinin yüksəlməsidir: “Gürcüstan turizminin rəqabətə davamlı olması turist sayına təsir edir. Onu da nəzərə almaq lazımdır ki, Gürcüstan turizmi daha cəlbedici olduğu üçün, istənilən ölkənin turistlərinin diqqətinə səbəb olur”.
Günel CƏLİLOVA
