Fatimə Hacıbəyli: “Azərbaycanda iri sahibkarlıqla deyil, kiçik və orta sahibkarlıq fəaliyyəti ilə məşğul olan xanımların sayı artır”
Azərbaycanda sahibkarlığın inkişafı üçün müxtəlif addımlar atılır. Kənd təsərrüfatı və ya iqtisadiyyatın digər sahələrində yatırım etmək istəyənlər üçün dövlət tərəfindən hər cür şərait yaradılır. Sahibkar dedikdə daha çox kişilər nəzərdə tutulur. Düzdür, bu sahədə qadınlar da çalışırlar, amma onların sayı bəylərlə müqayisədə azdır. Amma hazırda bu boşluğun doldurulması üçün işlər başlanıb.
Məlumat üçün bildirək ki, inkişaf etmiş və ya inkişaf etməkdə olan ölkələrdə kişi sahibkarlarla yanaşı, qadın sahibkarlar da fəaliyyət göstərirlər. Sahibkarlıq sahəsində əksər xarici ölkələdə gender bərabərliyi tam olaraq qorunur.
Azərbaycanda da qadın sahibkarlığının inkişaf etdirilməsi istiqamətində müəyyən işlər görülür. Hətta Sahibkar Qadınlar Assosiasiyası da yaradılıb. Qadın sahibkarlığın inkişafı istiqamətində görülən işlər artıq bu sahədə canlanmanın yaranmasına səbəb olub. Açıqlanan statistik rəqəmlərə əsasən, Azərbaycanda son illər qadınların sahib olduğu müəssisələrin sayı artır. Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bir neçə gün əvvəl media nümayəndələrinə açıqlamasında qeyd edib ki, hazırda ölkədə 143 mindən çox sahibkar qadın var.
Sahibkar qadınların sayının daha da artması istiqamətində hansı işlərin görülməsi vacibdir? Məsələ ilə əlaqədar ekspertə müraciət etdik.
“Vəfa” Sosial ictimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, ölkəmizdə əmək qabiliyyətli əhalinin yarısı qadınlardan ibarət olsa da, fərdi sahibkarların 20-21 faizi qadınlardır: “Qabaqcıl ölkələrdə olduğu kimi, Azərbaycanda da sahibkarların cins tərkibinin yaxşılaşması vacibdir. Nəzərə almaq lazımdır ki, yaxşı nailiyyətlər əldə etmək fərdi məsələ olduğu qədər, həm də dövlətin diqqətində olan əsas məsələlərdəndir. Təşəbbüskar, bacarıqlı vətəndaşlar nə qədər çox olarsa, dövlət əhali arasında məşğulluğu daha asanlıqla təmin edər, insanların rifah halı daha da yaxşılaşar. Bu kimi cəhətləri nəzərə alaraq Azərbaycan hökuməti sahibkar qadınların dairəsini genişləndirməkdə maraqlıdır”.
Həmsöhbətimizin sözlərinə görə, Azərbaycanda qadın sahibkarların arzuolunan səviyyədə inkişaf etməməsi obyektiv səbəblərlə bağlıdır: “Bəzi ailələrdə sahibkarlıq fəaliyyəti ilə məşğul olmaq istəyənlərə maneçilik törədilir. Qadınlara əsasən xanımın maddi gəlirinin artacağından qorxan kişilər mane olur. Kişilər düşünürlər ki, qadının maddi gəliri artarsa, onların ailədə söz demək hüququ azalar”.
Birlik sədrinin fikrincə, qadın sahibkarların sayının artması səbəblərindən biri onların öz işinə məsuliyyətlə yanaşmasıdır: “Hansısa qadın hər hansı bir işi görmək üçün bankdan müəyyən məbləğdə kredit götürür. Əksər hallarda o xanımlar bankdan götürdükləri krediri vaxtlı-vaxtında geri qaytarırlar. Yəni onlar öz işini qururlar, həm gəlir əldə edirlər, həm də borclarını qaytarırlar.
Qadınlar əsasən tekstil və kənd təsərrüfatı sahəsində daha aktiv fəaliyyət göstərirlər: “Düzdür, Azərbaycanda iri sahibkarlıqla deyil, kiçik və orta sahibkarlıq fəaliyyəti ilə məşğul olan xanımların sayı artır. Gələcəkdə bu rəqəm daha da artacaq”.
Günel CƏLİLOVA
