Bahadur Bilalov: “Bu həm də ondan irəli gəlir ki, ortada dil problemi yoxdur”
Azərbaycanda iqtisadi inkişaf böyüdükcə, dünyanın müxtəlif ölkələrinə turist olaraq səyahət edənlərin sayı artır. Azərbaycan vətəndaşları hər il dünyanın müxtəlif ölkələrinə səyahət edirlər. 2017-ci ildə xarici ölkələrə gedən Azərbaycan vətəndaşlarının sayı 4108,9 min nəfər olub. Rəsmi məlumata görə, ölkə vətəndaşlarının 33,4 faizi Gürcüstana, 23,4 faizi İrana, 22,5 faizi Rusiya Federasiyasına, 14,6 faizi Türkiyəyə, 1,6 faizi Ukraynaya, 1,0 faizi Birləşmiş Ərəb Əmirliklərinə, 3,5 faizi isə digər ölkələrə səfər ediblər.
Son üç ildə (2015-2017) Türkiyə ərazisinə gələn Azərbaycan turistlərinin sayı 1,974 milyonu keçib. Bu barədə Türkiyə Səyahət Agentlikləri Assosiasiyasının (TURSAB) hesabatında bildirilib. Hesabatda qeyd olunur ki, 2015-ci ildə Türkiyəni ziyarət edən azərbaycanlı turistlərin sayı 602,488 nəfər, 2016-cı ildə isə 606, 223 min nəfər, 2017-ci ildə isə 765, 514 min nəfər təşkil edib.
Hesabata görə, 2015-ci ildə Türkiyəni ziyarət edən turist sayında Azərbaycan vətəndaşlarının payı 1,66 faiz, 2016-cı ildə - 2,39 faiz, 2017-ci ildə isə 2,36 faiz təşkil edib.
Qeyd edək ki, 2017-ci ilin sonunadək 2016-cı ilin göstəricilərinə görə turizm gəlirləri 18,9 faiz artaraq 26,283 milyard dollar təşkil edib.
Məlumatlara görə, cəmi gəlirlərin yüzdə 77,4-ü xarici turistlərin payına düşür, xaricdə yaşayan türk vətəndaşları isə yüzdə 22,6 faiz təşkil edir.
Məlumat üçün qeyd edək ki, 2017-ci ilin sonuna qədər Türkiyəyə 32,4 milyon turist gəlib. Bu, 2016-cı ildəkindən 27,84 faiz çoxdur.
Bütün bu deyilənlərin fonunda, Azərbaycandan Türkiyəyə gedən turistlərin sayının son 3 ildə artması nə ilə bağlıdır?
Məsələyə münasibət bildirən turizm sahəsi üzrə ekspert Bahadur Bilalov bunu bir sıra amillərlə əlaqələndirdi: “Əvvəla Azərbaycan vətəndaşları Türkiyəyə təkcə istirahət məqsədilə getmirlər. Ora həm də biznes məqsədilə gedirlər. Alış-veriş məqsədilə Türkiyəyə gedən Azərbaycan vətəndaşlarının sayı daha çoxdur. Bu həm də ondan irəli gəlir ki, ortada dil problemi yoxdur. Türkiyə qardaş ölkə olduğuna görə ora gedən azərbaycanlı özünü evindəki kimi hiss edir. O nöqteyi-nəzərdən istər çimərlik turizmi olsun, istərsə də tarixi-mədəni turizm olsun, bütün bunlara fərq qoymurlar. Yəni turizmin hansı növü olur-olsun, seçim olanda Azərbaycandan olan turistlər birinci Türkiyəyə üstünlük verirlər. İkinci bir tərəfdən, Türkiyədə çox çevik bir turizm siyasəti tətbiq olunur. Söhbət ondan gedir ki, turistlər üçün potensial olaraq hansısa problemlər yarananda Türkiyədə hökumət səviyyəsində müəyyən tədbirlər həyata keçirilir. Aviabiletlərdə, gecələmə yerlərində müəyyən güzəştlər tətbiq olunur. Çarter reyslərində xidmətdə müəyyən güzəştlər tətbiq edilir. Bunu biz zaman-zaman görmüşük. Bütün bunların nəticəsidir ki, Türkiyəyə gedən turistlərin sayı daim artır. Azərbaycanlı turistlər üçün Türkiyədə turizm xidmətlərindən istifadə həm qiymət, həm də dil baxımından əhəmiyyət kəsb edir. Turistlər bir yerdən digər yerə gedəndə dil baryeri məsələsinə xüsusi önəm verirlər. Sadalanan məhz bu amillərə görə azərbaycanlı turistlər daha çox Türkiyəyə getməyə üstünlük verirlər. Hesab edirəm ki, başlıca səbəblər bununla bağlıdır”.
Vidadi ORDAHALLI
