Nigar Əliyeva: “Piylənmədən əziyyət çəkənlərin ana olma şansı da qismən azalır, oğlanlarda isə cinsi problemlər ortaya çıxır və yeniyetmə yaşlarında piylənmə hormonal pozğunluq əmələ gətirir"
Son illər dünya əhalisinin ən böyük problemlərindən biri də artıq çəkidir. "Fast-food" deyilən yeməklər, oturaq iş rejimi, keyfiyyətsiz qidalar maddələr mübadiləsini pozur və insanlarda piylənmə gedir. Piylənmədən əziyyət çəkən insanlar artıq çəkidən qurtulmaq üçün müxtəlif üsullara əl atırlar. Lakin gözlədikləri nəticə ilə deyil, tam əksi ilə üzləşirlər.
Açıqlanan statistik rəqəmlərə əsasən, Azərbaycanda əhalinin 30 faizi piylənmədən əziyyət çəkir. Səhiyyə Nazirliyi yanında Azərbaycan Tibb Universiteti Tədris-Cərrahiyyə Klinikasının aparıcı həkimi Aslan Abdullayev media nümayəndələrinə açıqlamasında qeyd edib ki, iqtisadi cəhətdən inkişaf etmiş ölkələrdə əhalinin 50 faizinin çəkisi normadan artıqdır ki, onların da 30 faizi piylənmədən əziyyət çəkənlərdir. Piylənmədən əziyyət çəkən uşaq və yeniyetmələrin sayı ildən-ilə artır. Əlbəttə, bu problem Azərbaycandan da yan keçməyib.
Piylənmədən necə xilas olmağın yollarını öyrənmək məqsədilə dietoloq Nigar Əliyevaya müraciət etdik.
O bizimlə söhbətində qeyd etdi ki, piylənmə problemi bütün dünyada qlobal problemlərdən biridir: “Hər il piylənmədən əziyyət çəkənlərin sayı durmadan artır. Azərbaycanda da eyni problem mövcuddur. Piylənmədən əziyyət çəkənlərin sayının artmasının səbəbləri çoxdur. İlk növbədə bildirim ki, əksər qadınlar hamiləlik zamanı düzgün qidalanmırlar. Qadınlar düşünürlər ki, hamiləlik zamanı çox yemək yesələr, onların dünyaya gətirəcəyi uşaq böyük və sağlam olacaq. Bu düzgün fikir deyil. Çünki qadın hamiləlik zamanı düzgün qidalanmadıqda ana bətnində artıq piylənmənin təməlini qoyur. Bunun da əksər vaxt günahkarı analar və qayınanalardır”.
Həmsöhbətimiz onu da bildirdi ki, piylənmədən daha çox uşaq və yeniyetmələr əziyyət çəkir: “Məlumat üçün qeyd edim ki, "piylənmə” diaqnozu qoyulan uşaqların sayı sürətlə artır. Lakin bu problem daha çox böyüklər arasında yaşanır. Bu o deməkdir ki, biz problemə hələ də ciddi yanaşmırıq. Artıq çəkisi olan valideynlər və uşaqlar öz qidalarının qədərinə və tərkibinə ciddi yanaşmalı, un məmulatları və şirniyyat məhsullarından uzaq durmalı, uşaqlar idmana yazdırılmalıdırlar. Təəssüf ki, biz bu gün başqa bir mənzərəni görürük – piylənmə diaqnozu hələ valideynləri ciddi narahat etmir”.
N.Əliyeva onu da vurğuladı ki, bəzən artıq çəkidən xilas olmaq üçün onlara müəyyən arıqladıcı dərmanlar və ya kokteylləri tövsiyə edirlər. Bu cür vasitələr insan sağlamlığına olduqca zərərlidir: “İnsanlar dərman yolu ilə deyil, təbii vasitələrlə arıqlamalıdırlar. Nəzərə almaq lazımdır ki, piylənmədən əziyyət çəkənlərin ana olma şansı da qismən azalır. Oğlanlarda isə cinsi problemlər ortaya çıxır. Yeniyetmə yaşlarında piylənmə hormonal pozğunluq əmələ gətirir".
Günel CƏLİLOVA
