"Bəzən kurikulum valideynlər və mütəxəssislər tərəfindən birmənalı qarşılanmır. Amma tədqiqatların nəticələri təhsil sistemində müsbət dinamikanın olduğunu göstərir. Bu da bir daha sübut edir ki, həmin istiqamət doğru seçilib". Trend-in məlumatına görə, bunu təhsil naziri vəzifələrini müvəqqəti icra edən nazir müavini Ceyhun Bayramov PIRLS 2016 - Oxu bacarığının inkişafı üzrə beynəlxalq tədqiqatın nəticələrinə dair təqdimatda çıxış edərkən deyib.
Onun sözlərinə görə, vacib məqamlardan biri məktəbəqədər təhsil şəbəkəsinin genişləndirilməsi, bunun üçün icma əsaslı qrupların yaradılmasıdır.
C.Bayramov onu da əlavə edib ki, təhsilin inkişafı ölkə Prezidenti İlham Əliyev tərəfindən ən vacib prioritetlərdən biri kimi müəyyən edilib, təhsil işçilərinin qarşısında bir sıra mühüm tapşırıq və hədəflər qoyulub: "Bu siyasi iradənin bariz nümunəsi kimi qısa müddət ərzində bir sıra strateji dövlət sənədlərinin qəbul edilməsi, təhsil sahəsində köklü islahatlara yönəlmiş addımların atılmasını göstərmək olar. “Azərbaycan Respublikasında təhsilin inkişafı üzrə Dövlət Strategiyası”na uyğun olaraq, Təhsil Nazirliyi son illərdə ibtidai təhsil səviyyəsində şagird nailiyyətlərinin yüksəldilməsi istiqamətində bir sıra tədbirlər həyata keçirib. Məktəbəhazırlıq qruplarının təşkili, ibtidai sinif müəllimlərinin sınaq qiymətləndirilməsi, bu qiymətləndirmə əsasında ixtisasartırma təlimləri, müəllimlərin peşəkar inkişafı, eləcə də şagirdlər arasında oxu vərdişlərinin təşviqi, oxu bacarıqlarının inkişafına yönəlmiş layihələr və valideynlərlə iş buna nümunədir".
C.Bayramov beynəlxalq qiymətləndirmələrdə iştirakın davamlı olmasının vacibliyini vurğulayıb, eləcə də Azərbaycan PISA-2018 və TIMSS-2019 tədqiqatlarında iştirak edəcək şagird və müəllimlərimizə uğurlar arzulayıb.
“Yeni ehtiyat dərslik konsepsiyasına uyğun olaraq, Təhsil Nazirliyinin sifarişi ilə Təhsil İnstitutu tərəfindən ehtiyat ibtidai sinif dərsliklərinin hazırlanması prosesi istiqamətində işlər aparılır”. Bunu da Ceyhun Bayramov deyib.
Onun sözlərinə görə, ilkin konsepsiya hazırlanan zaman beynəlxalq tədqiqatların nəticələri, orada ölçülən göstəricilər məzmun baxımından nəzərə alınıb: "Hesab edirik ki, beynəxalq təqdiqatların meyarları yeni dərslik konsepsiyasında nəzərə tutulacaq. Növbəti illərdə həmin dərsliklərin tətbiq olunması ilə bağlı daha müsbət nəticələr əldə edəcəyik".
C.Bayramov bildirib ki, hər bir sinif üçün dərslik tərtib olunan zaman müəllim üçün metodik vəsait də hazırlanacaq: "Yeni ehtiyat dərslik modelində isə həm də tövsiyə xarakterli metodik vəsaitin hazırlanmasını nəzərdə tutmuşuq. Valideynlərin uşaqları ilə hansı istiqamətdə məşğul olması, onlara yardım etməsi şagirdlərin təhsil səviyyəsində mühüm əhəmiyyət kəsb edir. Bu istiqamətdə artıq işlərə başlanılıb".
