Məhərrəm Zülfüqarlı: “Bu, əhalinin rahatlığına xidmət edir”
“ASAN xidmət” Azərbaycan Respublikasında dövlət orqanları tərəfindən vətəndaşlara göstərilən xidmətlərin həyata keçirilməsini təmin edən mərkəzdir. İlk “ASAN xidmət” mərkəzi 2013-cü ildə fəaliyyətə başlayıb. Hazırda Azərbaycanda 12 belə mərkəz fəaliyyət göstərir.
Onlardan beşi Bakıda, yeddisi isə bölgələrdə yerləşir. Bu ilin sonuna qədər onların sayının 15-ə çatdırılacağı gözlənir. “ASAN xidmət”ə indiyə qədər milyonlarla ölkə vətəndaşı müraciət edib. Xidmətlərin göstərilməsində ştatlı işçilərlə yanaşı, könüllülərin əməyindən də istifadə olunur. “ASAN xidmət” mərkəzlərində on dövlət orqanının vətəndaşlara göstərdiyi xidmətlərdən başqa, funksional yardımçı xidmətlər də təklif olunur. Həmçinin, mərkəzlərdə sosial layihələr də keçirilir. Müşahidələr göstərir ki, əhalinin əksəriyyəti “ASAN xidmət”in fəaliyyətindən razıdır. Bu zaman vətəndaşlar hansısa maneələrlə üzləşmir, vaxt itkisinə məruz qalmırlar.
Artıq Azərbaycan vətəndaşları, qeydiyyat yerindən asılı olmayaraq, istənilən “ASAN xidmət” mərkəzində şəxsiyyət vəsiqələrini dəyişdirə biləcəklər. Bu barədə “ASAN xidmət”dən bildiriblər. Qeyd olunub ki, bu imkan Mingəçevir şəhərində növbəti “ASAN xidmət” mərkəzinin açılışından sonra planlaşdırılıb: “Məlum olduğu kimi, Mingəçevir şəhərində yeni “ASAN xidmət” mərkəzinin açılışı oldu. Mərkəz tam fəaliyyətə başlayandan sonra bu barədə elan edəcəyik. Bu xidmət ilk növbədə rayonlarda yaşayan vətəndaşlarımız üçün aktualdır. Hazırda biz bu məsələ üzərində işləyirik”.
Ümumilikdə, sözügedən yeniliyə ekspertlər necə yanaşırlar? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, belə bir yeniliyin tətbiqi mütərəqqi addımdır: “Bununla bağlı yeniliyi təqdir edirəm. Nəzərə almaq lazımdır ki, buna cəmiyyətdə ciddi sosial ehtiyac var. Sözügedən sosial ehtiyacın ödənilməsi baxımından bunun müsbət əhəmiyyəti böyükdür. Məsələ onddır ki, Bakıda qeydiyyatı rayonlara olan çoxsaylı ölkə vətəndaşı yaşayır. Vətəndaşların şəxsiyyət vəsiqəsinin vaxtı bitəndə məcbur olub rayona getməli olurdular. Bu da həm vaxt itkisinə, həm də əlavə vəsait xərclənməsinə gətirib çıxarırdı ki, nəticədə bəziləri vaxtında şəxsiyyət vəsiqəsini dəyişə bilmirdilər. Eləsi olur ki, nikaha daxil olduğu üçün vəsiqənin dəyişdirilməsinə ehtiyac yaranır. Yaxud da qeydiyyata düşmək üçün buna ehtiyac yaranır. O baxımdan ölkə vətəndaşlarının istənilən “ASAN xidmət” mərkəzində şəxsiyyət vəsiqələrini dəyişmək imkanı əldə etməsi çox mütərəqqi addımdır. Bu, əhalinin rahatlığına xidmət edir. Hesab edirəm ki, bu qərar çoxsaylı ölkə vətəndaşının rahatlığına xidmət edəcək və əhali sözügedən yenilikdən razı qalacaq. Çünki bunun nəticəsində ehtiyac olmaz ki, bir şəxsiyyət vəsiqəsinin dəyişdirilməsindən ötrü vətəndaş rayona getməli olsun”.
Vidadi ORDAHALLI
