Azər Həsrət: “Ucuz şoularla efiri zəbt etdiklərinə görə uzun müddət tamaşaçılarda alışqanlıq yaranıb”
“Özəl telekanallarda maarifləndirci verilişlər, demək olar ki, yox dərəcəsindədir”. Bunu APA-ya açıqlamasında Milli Televiziya və Radio Şurasının sədri Nuşirəvan Məhərrəmli bildirib.
O qeyd edib ki, televiziya kanallarında yetərincə maarifləndirici verilişin olması üçün iqtisadi baza olmalıdır: “Özəl telekanallarda maarifləndirici verilişlər, demək olar ki, yox dərəcəsindədir. Bu özəl telekanalların iqtisadi vəziyyəti həddindən artıq pisdir. Bir müddət əvvəl hətta Azərbaycan Prezidenti bəzi özəl telekanallara həm “Azərkosmos”a, həm də "Teleradio" İstehsalat Birliyinə borclarının ödənməsi üçün xüsusi yardım ayırdı. O baxımdan özəl telekanallarda maarifçilik verilişlərinə yer ayrılmaması ciddi problemdir”. Özəl telekanalların maarifləndirici verilişlərə deyil, daha çox şou xarakterli proqramlara yer ayırması ölkə ictimaiyyəti tərəfindən xoş qarşılanmır.
Media eksperti Azər Həsrət “Bakı-Xəbər”ə aşıqlamasında qeyd etdi ki, özəl telekanalların şou verilişlərə daha çox üstünlük verməsinin səbəbi geniş auditoriya toplayıb qazanc əldə etməkdir: “Danılmaz faktdır ki, bu gün daha çox ucuz şouya geniş auditoriya baxır. Ancaq maarifləndirici proqramların tamaşaçıları elə də çox olmur. İntellektual verilişlərə baxanların sayının az olması elə məhz özəl telekanalların özlərinin günahıdır. Çünki özəl telekannallar vaxtında səviyyəli tamaşaçı ordusunu formalaşdıra bilməyiblər. Ucuz şoularla efiri zəbt etdiklərinə görə uzun müddət tamaşaçılarda alışqanlıq yaranıb. Bu səbəbdən də əksər tamaşaçılar daha çox ucuz şouya meyl edirlər”.
A.Həsrət hesab edir ki, maarifləndirici verilişlərin sayının çoxalması üçün mərhələli şəkildə iş görmək lazımdır: “Xatırladım ki, 1990-cı illərin ikinci yarısında Azərbaycanda fəaliyyət göstərən qəzetlərin əksəriyyəti şou xarakterli, ucuz sensasiyalı xəbərlərə üstünlük verirdilər ki, daha çox satılsınlar. Həmin qəzetlərin əksəriyyəti məhz ucuz xarakterli yazıların hesabına fəaliyyət göstərə bildilər. Bəziləri həmin prosesdən sağ-salamat çıxdı və ciddiliyini bərpa etdilər. Bu proses indi də bizim özəl telekanallarda yaşanır. Kanallarımız daha çox şou və ya ucuz verilişlər hesabına populyarlığı qorumağa çalışırlar. Televiziya kanallarında maarifləndirici verilişlərin yayımlanması üçün aidiyyəti qurumlar şəraitin yaradılması ilə bağlı düşünməlidirlər. Televiziya kanallarının şou verilişlərinin ümidinə qalmamasının yolunu tapmaq lazımdır. Telekanallara elə imkanlar yaradılmalıdır ki, həmin şou proqramlar olmadan da reklam ala bilsinlər”.
Günel CƏLİLOVA
