Cəlil Xəlilov: “Ümumiyyətlə, hərbi-vətənpərvərlik tərbiyəsi işində rolu olan insanların əməyini dəyərləndirmək üçün belə bir medalın təsis olunmasını təqdirəlayiq hesab edirəm” Şahin Musaoğlu: “Bu medalın təsis edilməsi həm gənc, həm orta, həm də yaşlı nəslin, demək olar ki, həyat fəaliyyətində öz müsbət təsirini göstərəcək”
Gənc nəslin hərbi-vətənpərvərlik tərbiyəsinin formalaşması sahəsində dövlət tərəfindən məqsədyönlü işlər həyata keçirilir. Orta ümumtəhsil məktəblərindən başlayaraq, ali məktəblərə qədər bu sahədə davamlı işlər görülür. Müasir Azərbaycan gəncliyi hərbi-vətənpərvərlik ruhuna sahibdir desək yanılmarıq. Çünki bu sahədə davamlı olaraq işlər görülür, görülən işlər də heç şübhəsiz ki, nəticəsiz ötüşmür.
Qeyd etdiyimiz kimi, Azərbaycan dövləti hərbi-vətənpərvərlik ruhunun cəmiyyətdə yayılmasında, onun şüurlarda özünə yer tutmasında çox önəmli addımlar atır. Gənc nəslin hərbi-vətənpərvərlik tərbiyəsinin formalaşmasında rolu olan insanlar dövlət tərəfindən mükafatlandırılır. Hərbi-vətənpərvərlik tərbiyəsinin təbliği sahəsində təsis edilən diplomlar, mükafat və ödüllər təqdirəlayiqdir. Bu sıraya “Hərbi-vətənpərvərlik tərbiyəsində xidmətlərə görə” medalı daxil edilib. “Hərbi-vətənpərvərlik tərbiyəsində xidmətlərə görə” Azərbaycan Respublikası medalının təsviri” təsdiq edilib. Dövlət başçısı “Hərbi-vətənpərvərlik tərbiyəsində xidmətlərə görə” Azərbaycan Respublikası medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişikliklər edilməsi barədə Qanunu imzalayıb.
“Hərbi-vətənpərvərlik tərbiyəsində xidmətlərə görə” Azərbaycan Respublikasının medalı haqqında Əsasnamədə bu medalla təltif edilən şəxslər qeyd edilib.
“Hərbi-vətənpərvərlik tərbiyəsində xidmətlərə görə” Azərbaycan Respublikasının medalı ilə səfərbərlik və həqiqi hərbi xidmətə çağırış işlərinin təşkilində, vətəndaşların hərbi-vətənpərvərlik tərbiyəsində və vətənpərvərlik təbliğatında göstərdiyi xidmətlərə görə müvafiq icra hakimiyyəti orqanının hərbi qulluqçuları, mülki işçiləri və digər şəxslər təltif edilirlər.
Qeyd edək ki, “Hərbi-vətənpərvərlik tərbiyəsində xidmətlərə görə” Azərbaycan Respublikasının medalı döşün sol tərəfinə, Azərbaycan Respublikasının digər orden və medalları olduqda onlardan sonra taxılır.
Yeni təsis edilən “Hərbi-vətənpərvərlik tərbiyəsində xidmətlərə görə” medalının əhəmiyyətini şərh edən Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov “Bakı-Xəbər”ə açıqlamasında bildirdi ki, “Hərbi-vətənpərvərlik tərbiyəsində xidmətlərə görə” medalının təsis edilməsi təqdirəlayiq haldır. O bildirdi ki, gələcəkdə bu medalla təltif ediləcək şəxslər həqiqətən də Azərbaycanda hərbi-vətənpərvərlik tərbiyəsi sahəsində xidməti olan insanlar olacaq: “Bu medalın təsis edilməsi olduqca əhəmiyyətli və vacib məsələdir. Ona görə ki, hərbi-vətənpərvərlik sahəsində bizim ümumi işlərimiz həddən artıq çoxdur. Xüsusilə də nə qədər ki, Qarabağ problemi həll olunmayıb, biz Azərbaycan gənclərini, məktəbliləri, bir sözlə, övladlarımızı hərbi-vətənpərvərlik hisslərində kökləməli, orduya, cəbhəyə, döyüşməyə hazırlamalıyıq. Təbii ki, bu sahədə çalışan həm ordu komandirlərimiz, həm mülkü veteranlarımız, həm də müəllimlərimiz həddən artıq çoxdur. Vətənpərvərlik tərbiyəsi işində yüksək nailiyyət əldə edən, aktiv metodlardan, formalardan istifadə edərək vətənpərvərlik sahəsində işlər görən qələm adamları var. Onlar arasında şeirlər, poemalar, nəsr əsərləri yazanlar, tədbirlər keçirənlər az deyil. Hətta bu sahədə filmlər çəkən, rəsm əsərləri yaradan, digər yaradıcılıq nümunələri ortaya qoyan insanlar da çoxdur. Onların yaradıcılığını, gördüyü işləri, ümumiyyətlə, hərbi-vətənpərvərlik tərbiyəsi işində rolu olan insanların əməyini dəyərləndirmək üçün belə bir medalın təsis olunmasını təqdirəlayiq hesab edirəm. Çünki belə insanlar müəyyən qədər gördükləri işə verilən qiyməti də görməlidirlər ki, onların əməyi xalq, dövlət tərəfindən yüksək dəyərləndirilir”.
C.Xəlilov qeyd etdi ki, bu gün Azərbaycan əsgəri hərtərəfli qayğı, diqqətlə əhatə olunmaqla yanaşı, o cümlədən də yüksək mənəvi-psixoloji duruma malik olmalıdır. “Bu sahədə də vətənpərvərlik işləri aparılmalıdır. Orta ümumtəhsil məktəblərində hərbi-vətənpərvərlik tərbiyəsi işinə ciddi fikir verilir. Mən bu gün (23.02.2018-ci il) Xocalı soyqırımına ucaldılan “Ana harayı” abidəsini ziyarətdən gəlirəm. Ziyarətçilər arasında çoxlu sayda şagirdlər var. Şagirdlər abidə önündə çıxışlar edir, şeirlər söyləyirlər. Müəllimlər də çıxışlar edir, tarixi məqamları şagirdlərin yadına salırlar. Təəssüf ki, bəzən belə işlərə barmaqarası baxanlar da olur. Ancaq ürəklə bu işləri görən insanlar da var. Təbii ki, onların fəaliyyəti qiymətləndirilməlidir, onlara medal da, orden də verilməlidir. Dünyanın bir çox ölkələrində, o cümlədən də Türkiyə Cumhuriyyətində belə medallar təsis ediblər. Dövlət və xalq qarşısında xidmətləri olan, o cümlədən də hərbi-vətənpərvərlik tərbiyəsi sahəsində rolu olanlar bu medallara layiq görülürlər. Azərbaycan Respublikası Prezidentinin sərəncamı ilə təsis edilən çoxlu mükafatlar, diplomlar var. Ancaq xüsuslə hərbi-vətənpərvərlik tərbiyəsi işi ilə bağlı medal yox idi. Medal da təsis edildi. Prezident tərəfindən təsdiq olunan hərbi-vətənpərvərliklə bağlı diplom var. Ancaq medalın da təsis edilməsi lap yerinə düşdü və çox təqdirəlayiqdir ” - deyə bildirən C.Xəlilov təklif etdi ki, hərbi-vətənpərvərlik tərbiyəsi işinin daha geniş səviyyədə təbliğatı üçün rəsm, şeir, yazı, mahnı müsabiqələri élan edilməlidir.
Azərbaycan Yazıçılar Birliyinin Hərbi-vətənpərvərlik komissiyasının sədri Şahin Musaoğlu bizimlə söhbətində bildirdi ki, “Hərbi-vətənpərvərlik tərbiyəsində xidmətlərə görə” medalın təsis edilməsi hərbi-vətənpərvərlik tərbiyəsi ilə məşğul olan insanların fəaliyyətinə, əməyinə dövlətin göstərdiyi növbəti diqqət və qayğının təzahürüdür. “Hərbi-vətənpərvərlik məsələsi hər bir dövlətin, hər bir xalqın həyatında, onun var olmasında mühüm rol oynayır. Bu, eyni zamanda, xalqın hər bir fərdinin öz dədə-baba yurduna sahiblənmək, soykökünə bağlılıq, adət-ənənələrə sədaqət kimi şərəfli missiyanı daşımasıdır. Hesab edirəm ki, bu medalın təsis edilməsi hərbi-vətənpərvərlik tərbiyəsinin, ruhunun təbliğatına yüksək səviyyədə təsir göstərəcək. Hərbi-vətənpərvərlik tərbiyəsinin KİV-də, ədəbiyyatda, sənətdə təbliğ edilməsi önəmlidir. Mən çox sevindim ki, cənab Prezident tərəfindən bu sahədə xüsusi medal təsis edilib. Bu medalın təsis edilməsi həm gənc, həm orta, həm də yaşlı nəslin, demək olar ki, həyat fəaliyyətində öz müsbət təsirini göstərəcək. Mən Azərbaycan Yazıçılar Birliyində Hərbi-vətənpərvərlik komissiyasının rəhbəriyəm. Bu medalın təsis edilməsi eyni zamanda da bizim işimizə bir dəstəkdir. Biz də öz işimizin göstəricisi olaraq hərbi-vətənpərvərlik tərbiyəsi işində fərqlənən insanların o medala namizədliyini verə bilərik. Çünki biz bilavasitə vətənpərvərliyin təbliğində və həmçinin də savaş ədəbiyyatının formalaşmasında işlər görürük. Bu ədəbiyyat həm hərbi-vətənpərvərlik nöqteyi-nəzərindən, həm də mənəvi-psixoloji, ideoloji, sosial cəhətdən bu sahəni əhatə edir. Biz də ədəbiyyat adamları olaraq bu sahəyə öz töhfəmizi verə bilərik. Bu baxımdan, həmin medalın təsis edilməsi məni çox sevindirdi”.
İradə SARIYEVA
