İlqar Hüseynli: “Aztəminatlı şəxslərə pulsuz hüquqi yardımın göstərilməsi onların həyatının yaxşılaşdırılması istiqamətində öz töhfəsini verəcək”
Azərbaycanda aztəminatlı ailələrə pulsuz hüquqi yardım göstəriləcək. Bu qərar onların həyatının yaxşılaşdırılması istiqamətində öz töhfəsini verəcək. Bu məsələ Azərbaycan Prezidenti İlham Əliyevin imzaladığı “Azərbaycan Respublikasında vəkilliyin inkişafı ilə bağlı əlavə tədbirlər haqqında” Sərəncamda əksini tapıb.
Sərəncamla Vəkillər Kollegiyasına tövsiyə edilib ki, ixtisas imtahanlarının müntəzəm keçirilməsini təşkil etməklə, Azərbaycan Respublikasının Vəkillər Kollegiyasına yeni üzvlərin, xüsusən gənc hüquqşünasların qəbul edilməsi üçün şərait yaratsın, göstərilən hüquqi xidmətlərin keyfiyyətinin daim yüksəldilməsi məqsədilə vəkillərin peşə hazırlığının və ixtisasının artırılması ilə bağlı zəruri tədbirlər görsün, vəkillərin öz fəaliyyətində qanunçuluğa, ədalət mühakiməsinin prinsiplərinə və yüksək peşə standartlarına, o cümlədən əldə etdikləri məlumatların konfidensiallığı, hüquqi yardım üçün müraciət etmiş şəxslərə münasibətdə vicdanlı və nəzakətli davranış tələblərinə ciddi riayət etmələrini təmin etsin, Azərbaycanın şəhər və rayonlarında vətəndaşların yüksək keyfiyyətli hüquqi yardıma tələbatını təmin etmək məqsədilə regionlarda vəkillərin fəaliyyətinin stimullaşdırılması üçün tədbirlər hazırlayıb həyata keçirsin.
Bundan başqa, kollegiyaya, həmçinin, hüquqi məsləhətə ehtiyacı olan aztəminatlı şəxslər üçün Azərbaycan Respublikasının Vəkillər Kollegiyası tərəfindən pulsuz hüquqi xidmətlər göstərilməsini təşkil etmək, Vəkillər Kollegiyasının fəaliyyətində şəffaflığın artırılması və ictimaiyyətlə əlaqələrin daha da genişləndirilməsi ilə bağlı, eləcə də Kollegiyanın və vəkillərin fəaliyyətində müasir İKT-nin tətbiqini və hüquqi xidmətlərin elektron formada göstərilməsi təcrübəsini genişləndirmək üçün vəkilliyin vahid elektron informasiya sisteminin təşkili və bu sistemin “Elektron məhkəmə” informasiya sisteminə inteqrasiyası istiqamətində tədbirlər görmək tapşırılıb.
Aztəminatlı şəxslərə pulsuz hüquqi yardımın göstərilməsi barədə fikir bildirən ekspert İlqar Hüseynli “Bakı-Xəbər”ə açıqlamasında qeyd etdi ki, aztəminatlı ailələrin sosial vəziyyətinin yaxşılaşdırılması, maddi təminatının inkişafı istiqamətində atılan hər bir addım təqdirəlayiqdir: “Aztəminatlı ailələrin sosial qayğılarının azalması onların sosial rifahına təsir edəcək. Hüquqi xidmətlərin özündən də çox şey asılıdır. Nəzərə almaq lazımdır ki, hüquqi xidmətlərin sayı çoxdur. Notarial, hansısa məhkəmə prosesində vəkildən istifadə etmək də hüquqi xidmət sayılır. O cümlədən hansısa sənədlərin verilməsi prosesi də hüquqi xidmətdir. Bu xidmətlərin hər birinə güzəştlər tətbiq olunsa, xeyli sayda aztəminatlı insanın həyat səviyyəsinin yaxşılaşdırılmasında rolu olacaq”.
Həmsöhbətimizin sözlərinə görə, vətəndaşların mütəmadi istifadə etdiyi cari hüquqi xidmətlərin pulsuz olması aztəminatlı ailələr üçün stimul olacaq. Bu qərar onların həyatının yaxşılaşdırılması istiqamətində öz töhfəsini verəcək.
Günel CƏLİLOVA
