Polis Akademiyasının kursantları mötəbər idman və bilik yarışlarında əldə etdikləri uğurlarla bizi tez-tez sevindirir, onlara olan inamı doğruldurlar.
Ötən dörd ildə respublikanın ali təhsil müəssisələrinin tələbələri arasında təşkil olunan “Heydər Əliyev və Azərbaycan tarixi” mövzusunda ümumrespublika bilik yarışında Polis Akademiyasının komandası da mütəmadi olaraq iştirak edir. 2015-ci il noyabr ayının 10-da keçirilən və 46 ali təhsil müəssisəsi tələbələrinin təmsil olunduğu “Heydər Əliyev və Azərbaycan tarixi” mövzusunda II ümumrespublika bilik yarışında Polis Akademiyasının komandası 2-ci yeri tutub.
Yeri gəlmişkən, Polis Akademiyasının komandası bu bilik yarışlarında daim ilk beşlikdə qərarlaşır.
Bu il noyabrın 11-də Heydər Əliyev Mərkəzində 44 ali təhsil müəssisəsi tələbələrinin iştirakı ilə ənənəvi mövzuda IV ümumrespublika bilik müsabiqəsi keçirilib. Tədbirdə akademiyanın V kurs kursantları Toğrul Arazlı, Elnur Nəcəfov, Turab Yusubov, Mətin Allahverdiyev, Nahid Abbaslı, II kurs kursantı Bəxtiyar Əlizadə, I kurs kursantları Elvin Ramazanov və Rəhman Cahangirov iştirak edib. Üç turda keçirilən yarışın 36 sualından 33-ü Polis Akademiyasının komanda üzvləri tərəfindən düzgün cavablandırılıb. Yekunda 35 balla birinci yeri tutan Dövlət Sərhəd Xidməti Akademiyasının komandasından cəmi 2 bal fərqlə Polis Akademiyasının komandası ümumi hesabla 4-cü olub.
Qeyd olunan tarixdə Azərbaycan Respublikası Prezidentinin sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramının tələblərindən irəli gələrək gənclərin vətənpərvərlik, vətəndaşlıq tərbiyəsinin gücləndirilməsi, onlar tərəfindən innovativ düşüncə və rəqabətədavamlı biliklərin əldə olunmasını təmin etmək məqsədilə Gənclər və İdman, Rabitə və Yüksək Texnologiyalar, Təhsil Nazirlikləri və Azərbaycan Televiziyasının dəstəyilə keçirilən “Mən Azərbaycanlıyam” intellektual telelayihəsi də gerçəkləşdirilib. Məlumat üçün bildirək ki, 2017-ci ilin 25 aprel tarixində yarışmanın qalibi, 1 may tarixində qaliblərin qalibi olmuş Polis Akademiyasının əyani təhsil üzrə I kurs kursantı, Prezident təqaüdçücü İlkin Ələkbərov milli bilik yarışmasının super finalında II yerə layiq görülüb.
Kursantları bilik yarışmalarına “İctimai elmlər” kafedrasının rəisi, polis kapitanı Rəhim Məcnunov və kafedranın baş müəllimi, polis kapitanı Rəşad Qasımov hazırlayıb.
Hafiz TƏMİROV polis mayoru DİN Mətbuat Xidmətinin əməkdaşı
