Ramil Məmmədli: “İtlərə xarici dil öyrədilməsi yaxşı bir haldır”
“Azərbaycan Ordusunun itlərinə erməni dili də öyrədiləcək”. Bu barədə femida.az-a Silahlı Qüvvələrin Kinologiya Mərkəzinin rəisi, polkovnik-leytenant Ariz Xasıyev məlumat verib. O qeyd edib ki, Azərbaycan Ordusunda Kinologiya Mərkəzi 1992-ci ildən fəaliyyətə başlayıb. Hazırda mərkəzdə xüsusi itlər yetişdirilir və seçilərək təyinatı üzrə bölmələrə verilir. Burada ümumilikdə 30 baş xidməti itə təlim keçilir. Onlardan 13 başı erkək, 17 başı isə dişi itlərdir.
Qurumun baş kinoloq-təlimatçısı kapitan Mövcud Əsgərov isə bildirib ki, hazırda mərkəzdə 6 növdə it var: alman qurdbasanı, labrador, rotveyler, doberman, pitbull: “Bu itlərin əksəriyyəti damazlıq bölməsində yetişdirilir. Daha sonra digər bölmələrə paylanır. İtlər 4 aylığından xidmət göstərəcəyi sahə üzrə seçilir. Sakit itlər minaaxtaran bölümünə, nisbətən bəd itlərsə qarovul xidmətinə verilir. Bunun da səbəbi var. Qarovul itləri posta kənar şəxslərin yaxınlaşdığını dərhal hiss edir və buna reaksiya verirlər. Minaaxtaran itlərsə nisbətən sakit olduğu üçün, onlar qarovula çıxarılmır.
Hazırda itlərə təlimlər ancaq Azərbaycan dilində keçilir. İtlər bütün tapşırıqları Azərbaycan dilində səsləndirilən sözlər əsasında edir. Yaxın zamanda itlərə erməni dilində sözlərin öyrədilməsi nəzərdə tutulur. Bu daha çox qarovul itləri üçün nəzərdə tutulub. Çünki onlar düşmən yaxınlaşdığı zaman erməni dilində danışıq eşitdikdə əsgərləri xəbərdar edə biləcək”.
Hərbi ekspert Ramil Məmmədli “Bakı-Xəbər”ə açıqlamasında qeyd etdi ki, cəbhəboyu ərazilərdə itlərdən istifadə olunur: “İtlərə xarici dil öyrədilməsi yaxşı bir haldır. Qoşunların təmas xəttində hərbi təyinatlı itlərdən istifadə zamanı müəyyən problemlər yaranırdı. Kəşfiyyat bölmələrinin müəyyən əməliyyatları zamanı itlərə Azərbaycan dilində əmr verilməsi həmin bölməni təhlükə altına ata bilər. Ancaq erməni dilini bilən itə eyni dildə müraciət olunarsa, ətraf ərazidə düşmən tərəfi olarsa, hər hansı bir problem yaşanmaz”.
Həmsöhbətimizin sözlərinə görə, Sərhəd Qoşunlarının xüsusi itlərində məlum problem yoxdur. Onlara Azərbaycan dilində təlimin icra olunması öyrədilir. Ancaq ordunun itlərinə erməni dilinin öyrədilməsi sırf döyüş əməliyyatları zamanı qarşıya çıxacaq problemlərin öncədən qarşısının alınması məqsədini daşıyır.
Günel CƏLİLOVA
