Nəsimi rayon İcra Hakimiyyətinin nümayəndə heyəti 9 noyabr – Bayraq günü münasibətilə cəbhə bölgəsində, birbaşa düşmənlə üz-üzə mövqelərdə dayanmış Müdafiə Nazirliyinin Tərtər rayonundakı “N” saylı hərbi hissəsində xidmət edən əsgər və zabitlərin görüşünə gedib.
Nəsimi RİH-dən “Bakı Xəbər”ə verilən məlumata görə, qonaqlar hərbi hissə komandanlığı ilə birlikdə ön cəbhə xəttindəki səngərlərdə olub, burada əsgərlərimizin xidməti, məişət şəraiti ilə maraqlanıb, əsgərlərlə söhbət edib, onlara gətirdikləri hədiyyələri çatdırıblar. Hərbi hissədəki əsgər kazarmaları və xidməti otaqlar, yeməkxana, hərbi texnika və silahlarla tanışlıqdan sonra şəxsi heyətlə keçirilən təntənəli görüşdə çıxış edən Nəsimi rayon İcra Hakimiyyətinin başçısı Asif Əsgərov Dövlət Bayrağı günü münasibətilə əsgərləri təbrik edib, onlara çətin və şərəfli xidmətlərinin yerinə yetirilməsində müvəffəqiyyətlər arzulayıb. Asif Əsgərov hərbi hissənin şəxsi heyətinə şərəfli xidmətlərində uğurlar arzulayaraq, Ali Baş Komandan İlham Əliyevin apardığı məqsədyönlü siyasət nəticəsində işğal altında olan bütün Azərbaycan torpaqlarının düşməndən azad olunacağına, ölkəmizin ərazi bütövlüyünün bərpa ediləcəyinə əmin olduğunu, lazım gələrsə, Ali Baş Komandanın əmri ilə silaha sarılaraq müharibə yolu ilə torpaqlarımızın azad olunması üçün bütün qüvvələrin səfərbər ediləcəyini bildirib.
Hərbi hissə komandanlığı adından çıxış edən korpus komandirinin şəxsi heyətlə iş üzrə müavini, polkovnik-leytenant Babək Səmidli şəxsi heyətin xidməti və döyüş hazırlığı barədə məlumat verib, Nəsimi rayon İcra Hakimiyyəti rəhbərliyinə hərbi hissə ilə Nəsimi rayonu arasında mövcud olan əlaqələrin daha da möhkəmləndirilməsi və Dövlət Bayrağı günü münasibətilə keçirilən tədbirin təşkilinə görə minnətdarlıqlarını bildirmb, hərbi hissədəki bu tədbirin düşmənlə üz-üzə səngərdə xidmət edən hərbiçilərin ruh yüksəkliyinin qalxmasında böyük rol oynadığını vurğulayıb.
Bayram tədbirində hərbçilər tərəfindən Ali Baş Komandan İlham Əliyevin imzasının yer aldığı 100 metr uzunlugunda Azərbaycan Bayragının hərbi marşın sədaları altında keçidi təşkil olunub.
Tədbirdə xidmətdə fərqlənən əsgər, çavuş və zabitlərin böyük bir qrupu Nəsimi rayon İcra Hakimiyyətinin xatirə hədiyyələri ilə mükafatlandırılıb.
Tədbir səhnə ustalarının konserti ilə davam edib.
