Ərşad Hüseynov: “Ödənişli yollar əsasən yaşayış məntəqəsindən kənarda, şəhərlərarası yolların bir hissəsi olacaq”
Azərbaycan parlamenti “Avtomobil yolları haqqında” Qanuna dəyişiklik etməyə hazırlaşır. Dəyişiklik ödənişli yolların əhatə dairəsini dəqiqləşdirir. “Avtomobil yolları haqqında” Qanuna dəyişikliklər edilməsi barədə layihə ödənişli avtomobil yolları yaradıla bilən yolların dairəsini (müvafiq icra hakimiyyəti orqanının müəyyən etdiyi avtomagistrallar, ümumi istifadədə olan bələdiyyə və özəl avtomobil yolları) dəqiqləşdirmək, habelə ödənişli yolların yaradılması ilə bağlı zəruri məsələləri tənzimləmək məqsədilə hazırlanıb.
Ödənişli avtomobil yollarının yaradılması ilə bağlı digər hüquqi və təşkilati məsələlər (avtomagistraldan ödənişli yol kimi istifadə qaydası, hər bir nəqliyyat vasitəsinin gedişi üçün ödənişin məbləği, avtomagistraldan ödənişli yol kimi istifadə edilməsi barədə məlumatın forması, bu istifadənin dayandırılması və xitam verilməsi qaydası və halları) qanun qüvvəyə mindikdən sonra müvafiq icra hakimiyyəti orqanı tərəfindən təsdiq ediləcək.
Hazırda ödənişli avtomobil yolları yerli və respublika əhəmiyyətli avtomobil yollarında, o cümlədən ümumi istifadədə olan bələdiyyə və özəl avtomobil yollarında yaradıla bilərdisə, dəyişikliyə əsasən, müvafiq icra hakimiyyəti orqanının müəyyən etdiyi avtomagistrallarda, həmçinin, ümumi istifadədə olan bələdiyyə və özəl avtomobil yollarında yaradıla bilər.
Ödənişli yolların salınmasını ekspertlər düzgün sayır. Onların fikrincə, ödənişli yolların olması ilk növbədə uzun-uzadı tıxacların qarşısını alacaq.
Məsələ ilə bağlı fikir bildirən nəqliyyat məsələləri üzrə ekspert Ərşad Hüseynov “Bakı-Xəbər”ə açıqlamasında qeyd etdi ki, “Avtomobil yolları haqqında” Qanuna ödənişli yolların olması ilə bağlı müddəanın əlavə olunmasl təklif edilir: “Hansı yolların ödənişli olub-olmamasını ya ölkə başçısı İlham Əliyev, ya da Nazirlər Kabineti müəyyən edəcək”.
Ekspertin fikrincə, yaxın müddət ərzində yolların ödənişli olması gözlənilmir. Ə.Hüseynov onu da əlavə etdi ki, bəzi yolların ödənişli olmasının tıxaclara hər hansı bir təsiri olmayacaq: “Nəzərə almaq lazımdır ki, ödənişli yollar yaşayış məntəqəsindən kənarda, şəhərlərarası yolların bir hissəsi olur”.
Həmsöhbətimizin sözlərinə görə, xarici ölkələrin təcrübəsində belə hallar var ki, bütövlükdə yol yox, onun hansısa bir hissəsi, məsələn, körpüdən keçmək ödənişlidir.
Günel CƏLİLOVA
