Şəmsəddin Əliyev: “Hesab edirəm ki, DİN əməkdaşları bu istiqamətdə üzərlərinə düşən vəzifələrin öhdəsindən gələ biliblər”
Cari ilin 9 ayında Daxili İşlər Nazirliyi və prokurorluq orqanları üzrə qeydə alınan cinayətlərin açılması 1,2 faiz yaxşılaşaraq 85,5 faiz təşkil edib. Məlum olduğu kimi, bu barədə daxili işlər naziri, general-polkovnik Ramil Usubov Daxili İşlər Nazirliyində keçirilən geniş Kollegiya iclasında çıxışı zamanı məlumat verib.
Nazir daxili işlər orqanları tərəfindən cinayətkarlığa qarşı mübarizədə, ictimai qaydanın və ictimai təhlükəsizliyin təmin edilməsi sahəsində həyata keçirilən tədbirlərin bütövlükdə qənaətbəxş olduğunu, əldə edilmiş müsbət təmayüllərin cari ilin 9 ayında da qorunub saxlandığını diqqətə çatdırıb: “Ötən ilin müvafiq dövrü ilə müqayisədə ağır və xüsusilə ağır cinayətlərin, qəsdən adam öldürmələrin, odlu silahla törədilən cinayətlərin, dələduzluqların, avtonəqliyyat vasitələrinin qaçırılmasının, hədə-qorxu ilə tələb etmələrin, quldurluqların, soyğunçuluqların, habelə xuliqanlıqların, yol-nəqliyyat hadisələrinin, qəzalarda həlak olanların və xəsarət alanların sayı azalıb. Qeyri-aşkar şəraitdə törədilmiş cinayətlərin, adam öldürməyə cəhdlərin, qəsdən sağlamlığa ağır zərər vurmaların, oğurluqların, soyğunçuluqların, quldurluqların, hədə-qorxu ilə tələb etmələrin, avtonəqliyyat vasitələrinin qaçırılması cinayətlərinin açılması da yaxşılaşıb”.
Ümumilikdə, Azərbaycanda cinayətkarlıqla mübarizə çox yüksək səviyyədə aparılır. Polis orqanları bu məsələdə öz işlərini yüksək peşəkarlıqla həyata keçirirlər. Bunun nəticəsidir ki, cinayətlərin açılma faizi yüksəkdir.
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bu, MDB məkanında ən yüksək göstəricidir: “Əvvəlki dövrlərlə müqayisədə bu ilin ötən 9 ayında DİN-in cinayətkarlıqla mübarizə göstəriciləri təxminən 2 faizə qədər yaxşılaşıb. Təbii ki, burada söhbət törədilən cinayətlərin açılma faizindən gedir. Söhbət qeyri-aşkar şəraitdə baş verən cinayətlərin, habelə keçmiş illərdə bağlı qalmış cinayətlərin açılmasından gedir. Eyni zamanda, bütövlükdə, törədilən quldurluq hadisələrinin, qarətlərin və oğurluqların açılmasından söhbət gedir. Bir məqamı da xüsusi olaraq qeyd etmək istəyirəm ki, insan alveri ilə mübarizə güclənib. Həmçinin, narkotik maddələrin və psixotrop vasitələrin aşkar olunması sahəsində ciddi irəliləyişlər var. Bu işdə polisin prinsipial mövqeyindən və peşəkarlığından çox şey asılıdır. Eyni zamanda, bu işlərlə mübarizədə polisin təşkilatçılıq qabiliyyətinin və bacarığının yüksək olması öz sözünü deyib. Bununla yanaşı, kollegiya üzvlərinin bu fəaliyyət istiqamətlərinə nəzarəti gücləndirməsi də törədilən cinayətlərin açılmasına öz təsirini göstərib. Hesab edirəm ki, DİN əməkdaşları bu istiqamətdə üzərlərinə düşən vəzifələrin öhdəsindən gələ biliblər. Təbii ki, yenə bağlı qalan cinayətlər var və cinayətlər törədilir. Bu, bir növ, cəmiyyətin cinayətkarlıqdan doymuş həddi olmamasının təzahürüdür. Yəni cəmiyyət, şüurlu təbəqə varsa, orada mütləq mənada ictimai münasibətlərə zidd hallar və hərəkətlər olur. Ancaq buna baxmayaraq, Azərbaycanda cinayətkarlıqla mübarizə çox yüksək səviyyədə və peşəkarlıqla aparılır. Bu istiqamətdə mübarizə davam edir və görülən işlər qənaətbəxşdir”.
Vidadi ORDAHALLI
