Şeyx Əbdül Mahmudbəyov: “Ağsaqqal bir mədəniyyət adamı kimi bu qatarla səyahətə çıxmağa hazıram” İbrahim İlyaslı: “Əlbəttə və böyük həvəslə” Qan Turalı: “İlk fürsətdə Bakı-Qars dəmir yolundan istifadə etmək istəyirəm” Xeyrulla Ağayev: “Dünyanın ən iri yol arteriyası kimi dövlətimin, millətimin imzasıdır bu yol” Əli Əhmədov: “Məni bu qatarla səyahətə çıxmağa əsasən romantika cəlb edir” Təbriz Vəfalı: “Təklif edirəm ki, BTQ ilə bir qrup jurnalistin səyahəti təşkil olunsun”
Bakı-Tiflis-Qars (BTQ) dəmir yolu xəttinin açılması Azərbaycan cəmiyyətində, sözün həqiqi mənasında, xoş bir əhval yaratdı. Xüsusən də səyahət həvəskarları bu xəttin açılmasını sevinclə qarşıladılar. Sevinməyə haqları da var. Səyahət etmək, yeni ölkələri kəşf etmək, maraqlı mənzərələrlə qarşılaşmaq, indiyə qədər gedib görmədiyin yerləri ziyarət etmək xoş bir hissdir. Bakı-Tiflis-Qars marşrutu üzrə açılan dəmir yolu xətti insanları gözəlliklərə qovuşdurur.
İctimaiyyətdə tanınan insanlar Bakı-Tiflis-Qars qatarı ilə səyahətə çıxmaq istəyərmi?
Tanınmış ictimai xadum, kinorejissor, ssenarist Şeyx Əbdül Mahmudbəyov “Bakı-Xəbər”in sorğusuna cavab olaraq bildirdi ki, Bakı-Tiflis-Qars dəmir yolu xəttinin açılması onu çox sevindirib: “Mən böyük məmnuniyyətlə yaşımın bu çağında, ağsaqqal bir mədəniyyət adamı kimi bu qatarla səyahətə çıxmağa hazıram. Əgər sənət adamlarının, yaradıcı şəxslərin, ziyalıların, elm adamlarının iştirakı ilə Bakı-Tiflis-Qars qatarında bir təbliğat-təşviqat heyəti təşkil ediləcəksə, mənim adımı birinci yazsınlar. Çünki mən çoxdandır Bakıdan Uzaq Şərqə qədər səyahət arzusunda olmuşam. Düşünürəm ki, bu xəttin açılmasının tarixi əlaqələrin bərpası baxımından olduqca böyük əhəmiyyəti var. Allah Heydər Əliyevə rəhmət eləsin, o elə böyük genplan hazırladı ki, bu gün onun bəhrəsini görürük. Sağ olsun Prezidentimiz ki, siyasi kursu dəyişmədi və Heydər Əliyevin işlərinin miqyasını daha da genişləndirdi. Bu dəmir yolu xətti siyasi, ideoloji, strateji, tarixi əhəmiyyətə malikdir. Bu xətt dövlətləri bir-birinə yaxınlaşdırdı, mədəniyyətləri, tarixləri bir-birinə qovuşdurdu. Tarixi İpək Yolunun bərpası məni çox sevindirdi. Ermənilər bu işdən kənarda qalmalıydı, qaldı da. Onun-bunun əlində alət olan bir toplumun aqibəti belə də olmalıdır”.
Əli Kərim adına Sumqayıt Poeziya Evinin rəhbəri, tanınmış şair, tərcüməçi İbrahim İlyaslı da Bakı-Tiflis-Qars qatarı ilə səyahətə çıxmağı ürəkdən istəyir: “Bu sualın bircə cavabı var: əlbəttə və böyük həvəslə. Əvvəla qatarla səfərə çıxmaqla bağlı bir qısa şeirimi təqdim edim:
İstənilən səfərə
qatarla çıxmağı
xoşlayıram.
Və
ürəyimcə olur
yanımda
tanışlardan
heç kimin
olmamağı…
Bəzən
adama
doğmaların
ögeyliyi qədər
ləzzət eləyir
qəribliyin doğmalığı…
Amma bu şeirdəkindən fərqli olaraq, Bakı-Tiflis-Qarsla böyük məmnunluqla mənim üçün əziz olan bir neçə dostla səfərə çıxardım...Təbii ki, biri sevdiyim aşıqlardan olmalıdır o səfərdə”.
Yazıçı-jurnalist Xeyrulla Ağayev də BTQ ilə səyahətə çıxmaq istəyindədir: “Əlbəttə, fəxrlə bu səyahətə çıxardım, dünyanın ən iri yol arteriyası kimi dövlətimin, millətimin imzasıdır bu yol”.
Tanınmış yazar Qan Turalı (Tural Cəfərov) bizimlə söhbətində ən çox Qarsı görmək istədiyini dedi: “Ümumiyyətlə, qatarla səyahəti çox sevirəm. Mənə qatar çox qədim və çox doğma görünür. Əslində, dəmir yolunu yaşı təxminən iki yüz ildir. Bəs o niyə şüurumuzda bu qədər qədim görünür? Görünür, rus romanlarının təsiridir. İlk fürsətdə Bakı-Qars dəmir yolundan istifadə etmək istəyirəm. Həmişə Ka (Kar romanının qəhrəmanı) Almaniyadan Qarsa gəlməyəcək ki... Bir az da Azərbaycandan Qarsa gedənlər olsun”.
Tanınmış jurnalist, iqtisadiyyat üzrə ekspert Əli Əhmədov da bizimlə söhbətində bu qatarla səfərə çıxmaq istədiyini dedi: “Böyük məmnuniyyətlə səyahətə çıxaram. Məni bu qatarla səyahətə çıxmağa əsasən romantika cəlb edir, yoxsa 2 saatlıq yolu 3 günə getmək istəməzdim. Həm də məni buna səyahət həvəsi cəlb edir”.
Azərbaycan İnformasiya Mərkəzinin rəhbəri və www.azim.az internet portalının baş redaktoru Təbriz Vəfalı əvvəlcə bildirdi ki, Bakı-Tiflis-Qars dəmir yolu turizmin inkişafı baxımından həm Azərbaycan, həm də sözügedən xəttin keçdiyi ölkələr üçün çox böyük imkanlara malikdir. Digər tərəfdən, BTQ özünün siyasi çəkisinə görə də respublikamız üçün çox dəyərlidir: “Şübhəsiz ki, xarici ölkələrin vətəndaşlarının Azərbaycana gəlməsi, belə turistlərin sayının ilbəil artması respublikamızda turizmin inkişafının sürətləndirilməsi yolu ilə dövlət büdcəmizin zənginləşdirilməsinə xidmət edəcək. Xarici ölkə vətəndaşları ölkəmizin adət-ənənələri, tarixi-mədəni və memarlıq abidələri, xüsusilə də Azərbaycan həqiqətləri barədə ətraflı məlumata malik olacaqlar. Sualınızın cavabına gəlincə, demək istəyirəm ki, istənilən xarici ölkəyə səyahətə getmək, gəzməli-görməli yerləri görmək, insanlarla təmas qurmaq, asudə vaxtı səmərəli keçirmək və s. insanların dünyagörüşünün formalaşmasında, onların intellektual səviyyəsinin təkmilləşməsində və öz fəaliyyətlərini daha yüksək səviyyədə qurmasında böyük rol oynayır. Bu baxımdan, Gürcüstan və Türkiyə boyunca keçəcək Bakı-Tiflis-Qars qatarından istifadə etməklə adıçəkilən ölkələrdə səyahətdə olmaq istərdim. Təklif edirəm ki, ölkə ictimaiyyətindən əvvəl BTQ ilə bir qrup jurnalistin səyahəti təşkil olunsun. Çünki bu səyahətdən sonra ayrı-ayrı yazılı və elektron KİV-lərin nümayəndələrinin oxuculara təqdim edəcəyi çeşidli məlumatlar, reportajlar Bakı-Tiflis-Qars haqqında Azərbaycan ərazisində müəyyən qədər informasiya bazasının formalaşmasında və cəmiyyətdə BTQ barədə müsbət fikirlərin yaranmasında əhəmiyyətli rolunu ortaya qoyacaq”.
İradə SARIYEVA
