E.Eminov adlı bir təəssübkeş oxucumuz şəxsən tanıdığı neftçi Əlisurət Məmmədov haqda redaksiyamıza kiçik bir məktub göndərib. E.Eminov usta neftçinin uğurlarına sevindiyini bidirir və bu sevincini oxucularımızla bölüşməkdə ona dəstəkçi olmağımızı istəyir. E.Eminov yazır:
Əlisurət Məmmədov 1958-ci ildə Sabirabad rayonunun Azadkənd kəndində dünyaya göz açıb. Orta məktəb illərində nüftçilər haqqında oxuduğu kitablar ona bu peşəni sevdirib. Ağa Nemətulla, neftçi Qurban haqqında çəkilən sənədli filmlərə baxdıqdan sonra o da neftçi olmaq, bu gərəkli peşədə çalışmaq qərarına gəlib. Bu arzu ilə o, 2005-ci ildə Bakıya gələrək ABDNŞ-a ərizə ilə müraciət edib və sınaqdan uğurla çıxıb. Onu qazmaçılar briqadasına işə qəbul ediblər. İlk gündən neftçi peşəsinin məsuliyyətini dərindən dərk edən Əlisurət gündən-günə ustalığını artıraraq qazmaçı peşəsinə yiyələnib, işlədiyi kollektivin sevimlisinə çevrilib. O, gecəni gündüzə qataraq, təcrübəli neftçilərdən bu çətin peşənin sirlərini öyrənib. Texnikadan yaxşı baş çıxardığına görə onu motorçu təyin ediblər. Quyuların qazılmasında və neft hasilatında motor-mühərrik qurğularının saz olmasının vacibliyini dərk edən Əlisurət bütün bilik və bacarığından, illərlə topladığı təcrübədən istifadə edərək mühərrikləri həmişə saz saxlayır.
Əlisurət Qüdrət oğlu Məmmədov hazırda ARDNŞ-ın kompleks qazma işləri trestinin Abşeron istehsalat bölümündə motorçu vəzifəsində çalışır. Neft sənayesinin qabaqcıl müəssisələrindən olan belə bir kollektivdə çalışmaq, dünya standartlarına cavab verən yüksək keyfiyyətli məhsul istehsal etmək həm şərəfli, həm də olduqca məsuliyyətli işdir. Əlisurət və onunla birlikdə çalışan kollektiv üzvləri bu məsuliyyəti hər an hiss edir, neft quyularının qazılması və hasilatın əldə olunması üzrə dövlət planlarını vaxtından əvvəl yerinə yetirirlər. Əlisurət artıq kollektivdə öz işinin mahir bilicisi, ustası kimi ad çıxarıb. O deyir ki, əldə etdiyi uğurlara görə işlədiyi kollektivə, müəssisə rəhbərliyinə minnətdardır. Çünki bu nailiyyətləri onların qayğı və diqqəti, köməyi sayəsində əldə edib.
Əlisurəti bütün kollektiv çox sevir. O, yaşadığı Sabirabad rayonunun, doğma kəndi olan Azadkəndin şirinliyini, duzunu kollektivə gətirib. Zəhmətkeş, bacarıqlı insandır. İşlətdiyi texnikanın saz olmasına çalışır. Axı hər şey onun işə saldığı motorun gurultusu ilə başlayır – iş günü də, qazma işləri də, yerin təkindən çıxarılan neftin hasilatı da...
Neft strategiyasının uğurla həyata keçirilməsində neftçilrin əməyi dövlətimiz tərəfindən həmişə yüksək qiymətləndirilib. Bu günlərdə peşə bayramını böyük əmək uğurları ilə qarşılayan Əlisurətin sevincinin həddi-hüdudu yoxdur. Azərbaycan neftçiləri yaxşı bilirlər ki, son illərdə enerji strategiyamızın qazandığı misilsiz uğurlar ulu öndərin möhtəşəm siyasi kursunun zəfər təntənəsidir. Əlisurət sevinir və qürur hissi keçirir ki, bu uğurlarda onun da haqqı var. Əlisurət həm də nümunəvi ailə başçısıdır. Vətənə layiq dörd övlad böyüdür və çalışır ki, onlar gələcək Azərbaycanın savadl, layiqli vətəndaşları kimi böyüsünlər.
Bu payız Əlisurət və işlədiyi kollektiv üçün çox düşərli olub. Kollektiv hazırda yeni quyuda qazma işlərinə başlayıb və yeni quyunu nəzərdə tutulduğu vaxtdan daha tez qazıb təhvil verməyi öhdəsinə götürüb. Bu işdə Əlisurətə və onun işlədiyi kollektivə yeni-yeni uğurlar, qələbələr arzulayırıq və deyirik ki, neftiniz, çörəyiniz bol olsun!
