Xəyalə Rais: “Azərbaycanın turizm potensialı ilə bağlı reklam xarakterli filmlərin də festivala salınması müsbət haldır” Anar Fərmayılov: “Çəkiləcək film və çarxlarda xarici turistlərin də səyahətlərindən kadrlar yerləşdirmək olar”
Turizm dünya iqtisadiyyatına əsas gəlir gətirən sahələrdən biri kimi özünü təsdiqləyib. Son illər turizm üçün əlverişli ölkələr öz turizm potensialının təbliği üçün müxtəlif layihələr həyata keçirirlər. Azərbaycan da turizm əhəmiyyətli ölkələrdən biri kimi Cənubi Qafqaz bölgəsində ayrıca yer tutur.
Azərbaycanda son illər ənənəvi olaraq Turizm Film Festivalı keçirilir. Sözsüz ki, bu festival ölkəmizin turizm imkanlarının da təbliğində, dünyada tanıdılmasında əvəzsiz rola malikdir.
15-18 noyabr tarixlərində IV Bakı Beynəlxalq Turizm Filmləri Festivalı (BBTFF) keçiriləcək. Mədəniyyət və Turizm Nazirliyinin təşkilatçılığı ilə baş tutacaq festivalın məqsədi turizmin müxtəlif sahələrinə həsr olunan, daxili və beynəlxalq turizmin inkişafına təkan verə biləcək filmləri təbliğ etmək, ən yaxşı filmlərin müəlliflərini həvəsləndirməkdir. Festival, eyni zamanda, tarixi və mədəni irsin beynəlxalq mərkəzlərindən biri olan Azərbaycanın turizm potensialına diqqət cəlb etməyi də qarşısına məqsəd qoyub.
Onu da vurğulayaq ki, festivala təqdim olunan filmlər kinematoqraflardan, media, səyahət və turizm ekspertlərindən ibarət 5 nəfərlik beynəlxalq münsiflər heyəti tərəfindən qiymətləndiriləcək. Münsiflər heyətinə Azərbaycandan Rafiq Quliyev, Ülkər Mütəllimova, Türkiyədən Can Saracoğlu, Polşadan Eva Kotus, Gürcüstandan Zurab Dvali daxildir.
Müsabiqə üçün seçilən filmlər 5 kateqoriyanı - Ölkə, region, şəhər; Mədəniyyət, ənənə;
Reklam filmləri; Ekoturizm və digər turizm növləri; TV məhsullar (filmlər, videoçarxlar) əhatə edir.
Teatr-kino üzrə mütəxəssis Xəyalə Rais bizimlə söhbətində bildirdi ki, artıq ənənə halını alan bu festivalın keçirilməsi olduqca əhəmiyyətlidir. Onun sözlərinə görə, bu, ölkəmizin turizm potensialının vizual sənət dili ilə ifadə edilməsində önəmli rol oynayır: “Bu festival beynəlxalq əhəmiyyət daşıyır və dünyanın bir çox ölkələrinin kinorejissorları, operatorları, turizmlə bağlı şirkətlərin təmsilçiləri burada iştirak edə biləcəklər. Hər il bu festivala böyük axın olur. İnanıram ki, bu dəfə də belə olacaq. Azərbaycanda turizmin inkişafına göstərilən qayğı, bu sahənin günü-gündən inkişaf etməsi onu göstərir ki, ölkəmiz belə bir maraqlı festival keçirməyə qadirdir. Hesab edirəm ki, bu festivala təqdim edilən turizm filmlərinin sırasında Azərbaycanla bağlı, ölkəmizin turizm sahəsində həyata keçirdiyi işlər haqqında filmlər çox olacaq. Azərbaycan təbiəti gözəldir, rəngarəngdir. İstənilən turist Qaxdan, Zaqataladan tutmuş, Naxçıvana qədər böyük bir aləmlə tanış ola bilirlər. Onu da vurğulayım ki, Azərbaycan təbiəti bütün fəsillərdə gözəldir. Biz hər fəsildə Azərbaycanın gözəlliyini görə bilirik. Naxçıvan bir ayrı aləmdir. Naxçıvanda turizmin inkişafı ilə bağlı çox maraqlı filmlər çəkmək olar. Bu gün Azərbaycanda turizmin müxtəlif sahələrini inkişaf etdirirlər. O cümlədən də ekoturizm, arxeturizm sahələrində müəyyən inkişaf var. Bilirik ki, bütün dünyada böyük maraq kəsb edən bu sahə Azərbaycanda da inkişafa doğru meyl göstərir”.
Onun fikrincə, Beynəlxalq Turuzm Filmləri Festivalına təqdim edilən filmlər turizmin bütün növlərini, mövsümlərini ifadə edəcək. O deyir ki, Azərbaycanın turizm potensialı ilə bağlı reklam xarakterli filmlərin də festivala salınması müsbət haldır. Ümumilikdə, beş istiqamətdə, kateqoriyada filmlərin təqdim ediləcəyi festivaldan çox şey gözlənildiyini deyən X.Rais hesab edir ki, burada əsas diqqət Azərbaycan turizminin təbliğinə yönəlməlidir.
Turizm üzrə mütəxəssis Anar Fərmayılov da bizimlə söhbətində Turizm Filmləri Festivalının Azərbaycanın turizm potensialının təbliği istiqamətində böyük təsirə malik olduğunu düşünür. Onun sözlərinə görə, hər bir festival ölkənin təbliğatına söykənir: “Dünyada turizm sahəsinin inkişafına ona görə əhəmiyyət verilir ki, ölkənin bu istiqamətdə imkanları tanınsın. Turizm imkanlarını ən müxtəlif vasitələrlə təbliğ edirlər. Onlardan biri də film festivallarının keçirilməsidir. Bizim ölkənin keçirdiyi Turizm Filmləri Festivalına bir sıra ölkələrdən qatılanlar olacaq. Əlbəttə, bu müsbət haldır. Ölkəmiz turizm sahəsində inkişaf edib və bu inkişaf dinamikasını ifadə edən filmlər çəkilməlidir. Azərbaycan turistlərin maraq göstərdiyi ölkələrdəndir və onlar burada qeyri-adi gözəlliklərlə qarşılaşırlar. Çəkiləcək film və çarxlarda xarici turistlərin də səyahətlərindən kadrlar yerləşdirmək olar. Çünki bu çox maraqlıdır. Məncə, Turizm Filmləri Festivalına təqdim edilən filmlərdə ölkəmizin turizm sahəsində əldə etdiyi nailiyyətləri, ümumilikdə, turizm üçün əlverişli olan bölgələri, obyektləri işıqlandırmaq maraq doğurardı”.
Turizm üzrə mütəxəssis hesab edir ki, Azərbaycanda belə bir festivalın ənənəvi şəkildə keçirilməsi həm də ölkəmizə daha çox turistin cəlb edilməsinə xidmət edir.
İradə SARIYEVA
