İlqar Hüseynli: “Cəmiyyətin ziyalıları, ağsaqqallar əl-ələ verib sadə yas mərasimlərinin keçirilməsini bir ənənə halına salmalıdırlar”
Uzun müddətdir ki, yas mərasimlərində ehsan süfrələrinin yığışdırılıması ilə bağlı müəyyən işlər görülür. Artıq bir sıra rayonlarda ehsan süfrələri yığışdırılıb. Bu qayda ilk olaraq Naxçıvanda tətbiq olundu. Daha sonra Füzuli rayonunda, paytaxt Bakının bəzi kəndlərində də analoji hal təkrar olundu. Artıq Gəncəbasar zonasında da yas mərasimlərində yemək süfrəsinin açılmasına icazə verilməyəcək.
Bu barədə Movqe.az-a Gəncədə və Yevlaxda yaşayan sakinlər məlumat verib. Xəbərə görə, artıq Gəncəbasar zonasında yas mərasimlərində yemək süfrəsinin açılmasına icazə verilmir. Eyni qayda artıq Yevlax rayonunda da tətbiq edilməyə başlanıb. Hüzr mərasimləri olan yerlərə Gəncəbasar zonasında və Yevlaxda yerli icra hakimiyyətinin nümayəndələri təhkim edilərək yasda yemək verilməməsi ilə bağlı təbliğat işi aparırılar: “Dəbdəbəli ehsan süfrəsinin yığışdırılması ilə bağlı Gəncəbasar zonasında aparılan təbliğat işləri öz bəhrəsini verməkdədir. Artıq rayonlarda bu işə yüksək vəzifəli məmurlar, deputatlar tərəfindən də dəstək verilir. Yüksək vəzifəli məmurlar və deputatlar öz yaxınlarının yas mərasimini sadə təşkil etməklə bu işə bir nümunə olurlar. Sakinlər artıq bir müddətdir ki, yas mərasimlərində çay süfrəsinin açıldığını, yalnız halva verilməsi ilə bağlı sakinlərlə razılığa gəlindiyini söyləyirlər. Məlumata görə, hətta Gəncəbasar zonasında, Yevlax rayonunda yas mərasiminə uzaq məsafələrdən gələn qohum-əqrəbaya, dost-tanışa da yemək süfrəsi açılmır. Gəncəbasar zonasında dəbdəbəli ehsan süfrələrinə qarşı aparılan bu kampaniya sadə insanlar tərəfindən dəstəklənir. Yüksək çinli məmurların, vəzifəli şəxslərin belə yeni qoyulmuş qaydaya tabe olması bu kampaniyaya dəstək verən, əməl edənlərin sayını günü-gündən artırır”.
Ekspertlərin fikrincə, bu qayda bir neçə bölgədə deyil, bütün rayonlarda tətbiq olunmalıdır.
Sosial sahə üzrə ekspert İlqar Hüseynli bizimlə söhbətində qeyd etdi ki, yas mərasimlərində dəbdəbəli ehsan süfrələri ləğv olunmalıdır: “Yas mərasimlərində masanı bəzəyən nemətlərlə deyil, sadə çay ilə yası yola vermək olar. Ölən şəxs üçün 3, 7 və 40 mərasimi vermək və onların birində dəbdəbəli ehsan süfrələri açmaq israfçılıqdır. Onu da bildirim ki, dində ölən şəxs üçün zəngin ehsan süfrələrinin açılması barəsində hər hansı bir fikir yoxdur.
Ehsan süfrəsinə xərclənəcək vəsaiti ehtiyacı olan şəxslərə vermək, məktəb və ya uşaq bağçasının təmirinə sərf etmək olar. Saymaqla bitməyən nə qədər xeyir əməl var”.
Həmsöhbətimiz yas mərasimlərində yemək süfrələrinin yığışdırılmasının doğru qərar olduğunu düşünür. Onun fikrincə, bu qayda bir neçə ərazini deyil, bütün respublikanı əhatə etməlidir: “Bildirilir ki, Gəncəbasar zonasında yaşayan tanınmış şəxslər artıq öz məclislərində süfrəyə 4-5 çeşiddə yemək təqdim etmirlər. Artıq o bölgənin məclislərində süfrəyə yemək çeşidləri deyil, çay və halva təqdim olunur. Bu çox düzgün qərardır. Cəmiyyətin ziyalıları, ağsaqqallar əl-ələ verib sadə yas mərasimlərinin keçirilməsini bir ənənə halına salmalıdırlar”.
Günel CƏLİLOVA
