DİN Mətbuat Xidmətinin Lənkəran regional qrupundan verilən məlumata görə, Cəlilabad Rayon Polis Şöbəsinin təşkilatçılığı ilə rayonun Muğan kəndində Təhsil şöbəsinin, yerli bələdiyyə və icra nümayəndələri, Muğan, Maşlıq və Söyüdlü kəndinin yuxarı sinif şagirdləri, həmçinin ictimaiyyət nümayəndələrinin iştirakı ilə “Narkomaniya ümumbəşəri bəladır” və “Erkən nikah və onun fəsadları” mövzularında görüş keçirilib.
Tədbirdə çıxış edən Cəlilabad RPŞ-nın rəisi, polis polkovniki Mübariz Quliyev cəmiyyətin ciddi bəlasına çevrilən, mənəvi və əxlaqi dəyərlərə böyük zərbə vuran narkotiklərin qanunsuz dövriyyəsi və narkomanlığın ağrılı problemlərdən olduğunu bildirib, onun yaratdığı problemlərdən və fəsadlardan danışıb.
Qeyd olunub ki, Prezident İlham Əliyevin Sərəncamına əsasən "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı"nın qəbul edilməsi bu dəhşətli bəlaya qarşı mübarizə sahəsində atılmış mühüm addımdır. Daxili İşlər Nazirliyinin və yerli polis orqanlarının əməkdaşları narkotik vasitələrin qanunsuz dövriyyəsinə qarşı sərt tədbirlər görməklə yanaşı, həm də gənclərlə vaxtaşırı maarifləndirici görüşlər keçirir.
Görüşün sonunda məktəblilərimaraqlandıran suallar cavablandırılıb.
Məhəmməd Rzayev, polis leytenantı
