Bəxtiyar Məmmədov: “Göyçay “Nar bayramı”na qatılmaq üçün…” Namiq Əzimov: “Bu gün hansısa bir turizm şirkəti “Nar bayramı”na turist aparırsa, ondan əvvəl keçirilən festivallarda da iştirak edibsə, bu çox müsbət haldır”
Payız bolluq, bərəkət ayıdır. Bu fəsildə meyvə, tərəvəz bolluğu yaşanır. Artıq müxtəlif bölgələrimizdə payız məhsul yığımı həyata keçirilir. Son illər müxtəlif mövsümlərdə meyvə-tərəvəz, eləcə də digər festivallar keçirilir. Dəfələrlə bu festivalların əhəmiyyəti ilə bağlı yazılar hazırlamışıq.
Məlumdur ki, ölkəmizdə keçirilən məhsul bayram və festivallarının üstün cəhətlərindən biri Azərbaycan təbiətini tanıtmaqdırsa, digər tərəfdən respublikamıza turist axını cəlb etməkdir. Əlbəttə, turistlər ölkəmizə gələrkən yalnız muzeylərdə, teatrlarda, tarixi yerlərdə olmaq istəmir, həm də təbiətimizə xas hadisələri görmək istəyirlər.
Qəzetimizin keçən saylarında qeyd edirdik ki, meyvə-tərəvəz yığımı ilə bağlı keçirilən festivallar maraqlıdır, ancaq onun formatına bir qədər dəyişiklik edilsəydi, daha yaxşı olardı. Təkliflərimizdən bir o idi ki, yerli turizm şirkətləri festivallara turistlər cəlb etsin və o turistlər meyvə-tərəvəz yığımında şəxsən iştirak etsinlər. Sözsüz ki, bu format olduqca maraqlı olduğu üçün, turistlərin belə festivallara axınına müsbət təsir göstərir.
Bilirsiniz ki, indiyə qədər Sabirabadda “Qarpız festvalı”, Qəbələdə “Mürəbbə festivalı”, Qubada “Alma festivalı” keçirilib. Qarşıdan isə Göyçay “Nar bayramı” gəlir. Göyçay “Nar bayramı” hər il yüksək səviyyədə təşkil edilir və bu tədbirdə turistlər də iştirak edirlər. Müsbət haldır ki, ilbəil festivalın formatında dəyişiklik olur. Bu da sözsüz ki, bu sahədə yeniliklərin həyata keçirilməsinə şərait yaradır.
Keçən illərdə yerli turizm şirkətləri festivallara elə də maraq göstərməsə də, son vaxtlar onların bu sahədə fəallığı artıb. Belə ki, artıq bəzi yerli turizm şirkətləri məhsul yığımı ilə bağlı keçirilən festivallara turistlər cəlb edirlər. Şirkətlər o turistləri festivallara aparır və onlar bu festivallarda iştirak edir, getdikləri rayonların həyatı, təbiəti ilə tanış olurlar. Bu olduqca əhəmiyyətli hadisədir. Nəzərə alsaq ki, Azərbaycanda bu sahə yeni-yeni inkişaf edir, təcrübə qazanır, bu baxımdan görülən işlər qənaətbəxş sayıla bilər. Artıq turizm şirkətləri daha aktiv fəaliyyətə keçərək ölkəyə turist cəlb etmək, ölkə təbiətini tanıtmaq sahəsində fəaliyyətlərini gücləndirirlər.
Gələn həftə Göyçayda keçiriləcək “Nar bayramı”na qatılmaq istəyənlər az deyil. Onların Göyçaya səfərini isə turizm şirkətləri həyata keçirəcək.
Yerli “Today Travel” turizm şirkəti Göyçay “Nar bayramı”nda iştirak etmək istəyən turistlərin qeydiyyatına başlayıb. Bu barədə qəzetimizə açıqlama verən “Today Travel” turizm şirkətinin icraçı direktoru Bəxtiyar Məmmədov bildirdi ki, ümumiyyətlə, festivallarda iştirakla bağlı turlara yerli və xarici turistlər böyük maraq göstərirlər. Göyçay “Nar bayramı”na qatılmaq üçün artıq 30 nəfərin qeydiyyatdan keçdiyini deyən B.Məmmədovun sözlərinə görə, hələ qeydiyyat davam edir və tur noyabrın 4-də reallaşacaq: “Bu festivalların böyük əhəmiyyəti var. Göyçay “Nar bayramı”na qatılmaq üçün artıq 30 nəfər qeydiyyatdan keçib. Bizim şirkət turistlərlə işləyir. Onların arasında xarici turistlər də az deyil. Ölkəmizə gələn turistlər yerli turistlərlə yanaşı, bizim turlara qoşulur və səfərlərə gedirlər. “Nar bayramı” ilə bağlı qeydiyyatdan keçənlər arasında hələ əcnəbi turistlər yoxdur. Qeydiyyat davam edir, yəqin ki, müraciət edənlər olacaq. Ancaq bu gün Göyçayda dünyanın müxtəlif ölkələrindən gəlmiş xarici qonaqları, turistləri görmək mümkündür. Bizim şirkət belə bayramlara, festivallara qatılır. Noyabrın 5-də Zaqatalada “Şabalıd festivalı” keçiriləcək. Ancaq bu festivalın keçirilməsi haqqında gec məlumat aldığımız üçün, ora səfəri planlı şəkildə təşkilinə hazırlaşa bilmədik. Bizim şirkət 8 ildir turizm sahəsində çalışır. Qarşıda Şahdağ və Tufandağa turlarımıza start verəcəyik. Ümumiyyətlə, həmin ərəfələrdə xarici turistlər bizim turlara çox qoşulurlar. Əsasən də birgünlük turlarımızda onlar iştirak edirlər. Bu, əlbəttə, ölkəmizi tanıtmaq, təbliğ etmək baxımından çox əhəmiyyətlidir”.
Şirkət rəsmisi qeyd etdi ki, Göyçayda keçirilən “Nar bayramı”nda iştirak üçün apardıqları turistlər nar yığımında, eləcə də festivalla bağlı təşkil edilən proqramlarda iştirak edə biləcəklər.
Ölkəmizdə bu cür festivalların keçirilməsinin əhəmiyyətini qeyd edən yerli turizm şirkətlərindən birində çalışan Namiq Əzimov hesab edir ki, Azərbaycanda 10 ildən artıqdır mövsümi məhsul bayramları keçirilir. O hesab edir ki, ən böyük hədəf bu festivallara xarici turistləri kütləvi şəkildə cəlb etmək olmalıdır. Bu festivalların proqramı zəngin olmalıdır, belə olarsa, yerli turizm şirkətlərinin diqqətini cəlb edər: “Bu işdə turizm şirkətlərinin fəaliyyəti daha çox hiss edilməlidir. Çünki onlar festivallara kütləvi turist cəlb edə bilər. İndi bəzi turizm şirkətləri artıq bu yöndə fəaliyyətə başlayıblar. Bu çox müsbət haldır. Çalışmaq lazımdır ki, internet vasitəsilə bu işlər daha da genişləndirilsin. Əlbəttə, turist üçün meyvə yığmaq olduqca maraqlıdır. Bununla yanaşı, həm də təbiətlə təmasdır. Yerli turizm şirkətləri festivalların işində daha yaxından iştirak etməlidirlər. Bu gün hansısa bir turizm şirkəti “Nar bayramı”na turist aparırsa, ondan əvvəl keçirilən festivallarda iştirak edibsə, bu çox müsbət haldır”
İradə SARIYEVA
