Bahadur Bilalov: “Ölkəmiz İslam dünyasından turist cəlb etmək istəyirsə, halal turizmdən yararlanmalıyıq”
Dünya turizm xərclərinin 10 faizini müsəlman turistlər reallaşdırır. "Müsəlman Alış-veriş Turizmi İndeksi"nə görə, ötən il müsəlman turistlərin xərclədiyi vəsait 145 milyard dollardan yuxarı olub. Araşdırmalara görə, müsəlmanlar istirahət üçün daha çox Dubay, Kuala-Lumpur, İstanbul və Antalyanı seçirlər. Dünyada 350 halal otel var və bunlardan 160-ı Türkiyədə yerləşir. Statistik rəqəmlərə görə, bu gün müsəlman turistlərin sayı 108 milyondur və 2020-ci ildə bu rəqəm 150 milyondan çox olacaq.
İstirahət üçün Azərbaycanı seçən ərəb turistlərinin sayı son iki ildə artıb. Elə bu il tək paytaxt ərazisində deyil, bölgələrimizdə də ərəb turistlərinə rast gəlinirdi. Müsəlman turistlərin sayının artması üçün ölkədə halal standartına cavab verən otellərin sayının artırılması təklif olunur.
Azərbaycan Turizm Assosiasiyası (AzTA) sədrinin müşaviri Müzəffər Ağakərimov media nümayəndələrinə açıqlamasında bildirib ki, hazırda Azərbaycanda olduqca az sayda oteldə halal standartları tətbiq edilir. Halal standartı ilə fəaliyyət göstərən otellərdə qadınlar və kişilər üçün ayrıca hovuz, namaz otağı olmalı, alkoqollu içkilər olmamalı, verilən yeməklər halal standartı ilə istehsal edilən məhsullardan hazırlanmalıdır: "Gələcəkdə yeni otellər inşa olunanda bəzi sahibkarlar öz yerləşdirmə obyektlərini halal standartları əsasında qura bilərlər. Hazırkı otellərin bu tipdə qurulması üçün isə sahibkarlara əlavə sərmayə lazımdır. Ona görə də bu standartları həyata keçirmək o qədər də asan məsələ deyil".
M.Ağakərimov deyib ki, Azərbaycanda otellərdə halal standartlarının tətbiqi islam ölkələrindən ölkəmizə gələn turistlərin axını ilə əlaqədardır.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, halal turizm müsəlmanlar üçün nəzərdə tutulan bir termindir. Ölkəmiz İslam dünyasından turist cəlb etmək istəyirsə, bunun üstünə gedərək, halal otellər şəbəkəsini genişləndirərək, reklam edərək müsəlmanları cəlb edə bilər.
Ekspertin sözlərinə görə, son illər əksər dünya ölkələrində halal standartından istifadə olunur. Əsas məqsəd isə islam ölkələrindən turist cəlb etməkdir: "Azərbaycan haqlı olaraq bu məsələni göz önünə alıb halal standartı qəbul edib. Nəzərə almaq lazımdır ki, belə bir standartın özünün xüsusi atributları var. Turpaketə nələrin daxil olması aydın şəkildə qeyd olunmalıdır ki, islam ölkələrindən gəlmək istəyən turistlərin diqqətini cəlb etsin".
Həmsöhbətimizin fikrincə, halal otellərin sayı artandan sonra islam ölkələrindən gələn turistlərin sayında artım qeydə alınacaq.
B.Bilalov onu da vurğuladı ki, halal standartı bütün otellərə şamil olunmayacaq. Adıçəkilən standartı tətbiq edən mehmanxanalar və turizm şirkəti sayəsində qatı mühafizəkar dindar turistləri ölkəmizə cəlb edə bilərik: "Çünki elə insan var ki, o yalnız halal formada kəsilmiş heyvanların ətindən yeyir, mehmanxana otaqlarında qiblənin işarəsini göstərən xüsusi cihaz və dini kitabımız olan Quranın olmasını arzu edir. Bu və digərləri halal standartında əks olunub".
Günel CƏLİLOVA
