Fatimə Hacıbəyli: “Qanunvericiliyin tələbinə uyğun olaraq, selektiv abort edən həkimlər cəzalandırılmalıdır”
Müasir dünyada ən aktual problemlərdən biri abortlardır. Dünyanın ayrı-ayrı ölkələrində aborta münasibət müxtəlifdir. Bir qrup insan buna ailənin öz şəxsi qərarı olaraq hörmətlə yanaşdıqlarını bildirirlər. Digər qisim insan abortun tibbi və psixoloji cəhətdən zərərli olduğunu vurğulayırlar.
Uşağın cinsə görə abort olunmasının qarşısının alınması istiqamətində çoxlu işlər görülür. Ancaq buna baxmayaraq, bu gün də cəmiyyətimizdə qız uşaqlarının dünyaya gəlməsindən xəbər tutan valideynlər onların həyatına dünyaya göz açmamış son qoyurlar. O uşaqların günahı qız olmasıdır.
Azərbaycanda selektiv abort edən ginekoloqlar həkimlik adından məhrum ediləcək. Milli Məclisin Səhiyyə komitəsinin sədr müavini Musa Quliyev media nümayəndələrinə açıqlamasında deyib ki, bu məsələ "Reproduktiv sağlamlığın qorunması haqqında" qanun layihəsində öz əksini tapıb. Deputatın sözlərinə görə, son illər selektiv abortların sayı əvvəlki illərlə müqayisədə azalsa da, hələ də dölün cinsinə görə abort hallarına rast gəlinir.
M.Quliyev deyir ki, dölün ana bətnində cinsinə görə məhv edilməsi doğulan qız uşaqları ilə oğlanlar arasında balansın pozulmasına gətirib çıxarır. Deputat selektiv abortların qarşısının alınmasının yalnız inzibati, hüquqi qaydada qadağalarla aradan qaldırılmasının mümkünsüz olduğunu bildirib: “Burada mədəniyyətin yüksəlməsi, maarifləndirmənin artması, təbliğatın aparılması çox vacibdir. Cəmiyyətdə bu istiqamətdə ciddi maarifləndirmə işləri aparılmalıdır. Çünki həkimi də selektiv aborta məcbur edən valideynlərdir. Valideynlər arasında maarifləndirmə işi genişləndirilməlidir ki, gəlib həkimləri bu işə sövq etməsinlər. Digər bir yol isə selektiv abort edən həkimlərin cəzalandırılması məsələsidir. Düşünürük ki, selektiv abort edən ginekoloqların həkimlik adından , həkimlik peşəsindən məhrum edilməsi onlar üçün ən böyük cəzadır. Ona görə də selektiv aborta yol verən ginekoloqların həkimlik adından məhrum edilməsi məsələsini "Reproduktiv sağlamlığın qorunması haqqında" qanun layihəsinə salmışıq. İnanmırıq ki, hansısa həkim illərlə çəkdiyi zəhməti risqə atıb bu cür qanunsuz əmələ cəhd edə. Yəqin ki, ilin sonunadək bu qanun layihəsi Milli Məclisdə müzakirəyə çıxarılacaq”.
Ekspertlərin fikrincə, uşağı cinsə görə abort edən həkimlər sərt şəkildə cəzalandırılmalıdır.
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, Azərbaycanda qadınların hüquqları ilk olaraq ana bətnində, daha sonra isə ailədə pozulur. Daha sonra həyat boyunca qadın hüquqları pozulur: “Cəmiyyətdə oğlan uşaqlarına üstünlük verilməsi selektiv abortun əsas səbəblərindən biridir. “Reproduktiv sağlamlıq haqqında” qanun layihəsinə görə, qadınların hamiləliyin ilk 12 həftəliyində abort etdirmək imkanı var. Abort dölün 22 həftəliyinədək istənilən sosial-iqtisadi göstərişlərlə etdirilə bilər. Hamiləliyin bu dövründə abort etdirmək üçün şəxsi səbəblərə hamiləlik zamanı ərin vəfatı, hamilə qadının və ya onun ərinin həbsi, analıq hüququndan məhrum edilmə, hamiləlik zamanı boşanma, zorlanma nəticəsində hamiləlik və ailədə əlil uşağın olması daxildir. Hamiləliyin 22-ci həftəsindən sonra abort yalnız tibbi əsaslarla həyata keçirilə bilər. Dölün cinsinə görə abortun edilməsinə razılıq verən həkimlər cəzalandırılmalıdır. Ola bilər ki, həkimlər deyə bilər ki, bəs onların günahı yoxdur, ailə uşağın təlaf olmasını istəyir və onlar da öz işlərini görürlər. Abort yalnız xüsusi hallarda həyata keçirilməlidir. Yoxsa “yenə qızdır” deyə abort etdirmək olmaz”.
Həmsöhbətimizin sözlərinə görə, cinsə görə abort edən həkimlərə öncə xəbərdarlıq edilməlidir. Daha sonra qanunvericiliyin tələbinə uyğun olaraq cəza tətbiq olunmalıdır.
Günel CƏLİLOVA
