Könül Vaqifqızı: “Miqrasiya prosesində iştirak edən tərəflərdən birinin məsuliyyətini yerinə yetirməməsi və ailə ilə maraqlanmaması ailənin dağılmasına təsir göstərir”
Ölkə ictimaiyyətini narahat edən məsələlərdən biri də boşanmaların sayının artmasıdır. Açıqlanan statistik rəqəmlərə əsasən, 2017-ci ilin 8 ayı ərzində qeydiyyat şöbələri tərəfindən 40256 nikah və 9787 boşanma halları qeydə alınıb və əhalinin hər 1000 nəfərinə nikahların sayı 6,2, boşanmaların sayı isə 1,5 olub.
Dövlət Statistika Komitəsinin yaydığı məlumata əsasən, 8 ay ərzində ən çox nikah avqust ayında qeydə alınıb: “9787 boşanma hallarından ən çoxu may ayına təsadüf edib. Ən çox nikah və boşanma Aran, Gəncə-Qazax iqtisadi rayonlarında rəsmiləşdirilib”.
Boşanmaların çoxunun Aran, Gəncə-Qazax zonasında olması ekspertlər tərəfindən fərqli qarşılandı.
Psixoloq Könül Vaqifqızı bizimlə söhbətində bildirdi ki, boşanmaların artması SOS siqnalı verməyi zəruri edir: “Biz statistikaya qeyri-rəsmi nikahlarda da boşanmaların sayını əlavə etsək, bu göstəricini ikiyə vurmalı olacağıq. Artıq ailə dəyərlərində ciddi aşınmalar baş verir. Boşanmaların səbəblərinin artması dəfələrlə müzakirə olunub. Sosial-psixoloji durum, iqtisadi amil, o cümlədən ekoloji problemlər, insanların davranışındakı dəyişikliklər, mentalitetin bəzi hallarda bir-birinə uyğunlaşmaması boşanmalara daha çox təkan verir. Həmçinin, sosial şəbəkələr də boşanmalara öz təsirini göstərir”.
Həmsöhbətimiz onu da vurğuladı ki, ölkədə cinsi münasibətin uyğunsuzluğuna görə boşanmaların sayı yüksəkdir: “Sadəcə, Azərbaycan elə bir ölkədir ki, belə mövzular üzə çıxarılmır. Qohumlara deyilən səbəblər başqa olur, amma cinsi uyğunsuzluq Azərbaycanda çox ciddidir. Ona görə ki, xarici ölkələrdən fərqli olaraq, Azərbaycanda cütlük əvvəlcədən intim münasibətlərdə olmur və bu, toy gecəsindən sonra başlanır. İkincisi də cinsi məmnunluq yoxdursa, həm kişi, həm də qadın tərəfindən o məmnunluq kənarda axtarılır. Aydındır ki, o da nikaha müsbət təsir göstərmir. Cinsi uyğunsuzluq ailənin dağılması üçün 2-3 əsas faktordan biridir. Çünki burada cinsi faktoru da, maddi faktoru da əsas saya bilərik. Yəni cinsi faktoru ən əsas yox, əsaslardan biri saya bilərik”.
Psixoloqun sözlərinə görə, Gəncə-Qazax bölgəsində boşanma saylarının artması səbəbi ailə başçısının iş üçün və ya müəyyən səbəblərdən başqa ərazilərdə uzunmüddətli olmasıdır: “Ailənin kişi üzvünün uzunmüddətli miqrasiya etməsi, başqa ölkələrdə işləməsi də ailənin dağılmasına təsir edir. Burada əsas psixoloji amillər qarşılıqlı hörmət və nüfuzun aşağı düşməsi, tərəflərin bir-birinə qarşı inamı, etibarı və nüfuzu qoruyub saxlamasında cəhdlərin olmamasıdır. Kişilər miqrasiya prosesində iştirak etsələr də, qadınlar səbrlə gözləyirlər və ailəni idarə etməyi öz üzərlərinə götürürlər. Miqrasiya prosesində iştirak edən tərəflərdən birinin məsuliyyətini yerinə yetirməməsi və ailə ilə maraqlanmaması ailənin dağılmasına təsir göstərir”.
Günel CƏLİLOVA
