Nəsimi rayonunda ağac əkməklə ekoloji balansın bərpasına, təbii mühitin qorunmasına kömək etmək, atmosferi oksigenlə zənginləşdirmək, insanların diqqətini yaşıllıqların qorunmasına yönəltmək istiqamətində rayon İcra Hakimiyyətinin təşkilatçılığı ilə silsilə ağacəkmə kampaniyaları, iməcliklər keçirilir, rayonda yeni yaşıllıq zolaqlarının salınması, ekoloji mühitin sağlamlaşdırılması və paytaxtın daha da gözəlləşməsinə yönəlmiş işlər daim nəzarətdə saxlanır.
Oktyabrın 21-də keçirilən iməcilikdə Nəsimi rayon İcra Hakimiyyəti Başçısı Aparatının kollektivi, idarə və müəssisələrin nümayəndələri və rayon sakinləri iştirak edib. İməclikdə rayonun mərkəzi küçələrində, mikrorayonlar ərazisində 1000-dən artıq şam və sərv ağacları əkilib, 2000-dən artıq ağaca isə qulluq edilib. Ağacəkmə aksiyasının keçirilməsində məqsəd rayon ərazisində ətraf mühitin mühafizəsinə töhfə vermək, yaşıllıq zolaqlarını daha da genişləndirmək, şəhərin ekoloji tarazlığını bərpa etmək, insanlar arasında ekoloji mədəniyyəti, təbiətə qayğı hissini təbliğ etmək olub.
İməcilik günü Nəsimi rayon İcra Hakimiyyəti tərəfindən Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri, BMT-nin Ərzaq və Kənd Təsərrufatı Təşkilatının (FAO) xoşməramlı səfiri Leyla Əliyevanın təşəbbüsü ilə başlanmış “Məktəb bağları” layihəsi çərçivəsində 4-cü mikrorayon ərazisində yerləşən 147 saylı uşaq bağçası–körpələr evinin və “Qərənfil” uşaq bağçası-körpələr evinin həyətlərində müxtəlif növ meyvə ağacları əkilib, rəngarəng meyvə və payiz geyimləri geyinmiş uşaqların iştirakı ilə hazırlanmış kompozisyalara baxış keçirilib, uşaqların ifasında şən musiqi nömrələri ifa olunub.
Tədbirdən sonra Nəsimi rayon İcra Hakimiyyətinin başçısı Asif Əsgərov sakinlərlə görüşərək bildirib ki, son illər ölkədə Prezident İlham Əliyevin rəhbərliyi altında genişmiqyaslı quruculuq və abadlıq işləri vüsət alıb. İDEA İctimai Birliyi tərəfindən ekoloji tarazlığın qorunması istiqamətində ciddi işlər aparılaraq, “Yaşıl marafon” layihəsi çərçivəsində, respublikanın bütün bölgələrində olduğu kimi, Nəsimi rayonunda da çoxlu sayda ağaclar əkilib, yeni-yeni yaşıllıq zolaqları salınıb. A.Əsgərov rayonda aparılan geniş abadlıq–quruculuq işləri haqqında məlumat verərək, görülən işlərin sakinlərin rifahının daha da yuksəldilməsinə yönəldildiyini bildirib.
Görüş zamanı sakinləri maraqlandıran suallar cavablandırılıb, qaldırılan məsələlərin həll edilməsi üçün müvafiq tapşırıqlar verilib.
Baki-xeber.com
