Təvəkkül İsgəndərov: “İlanların ödənişli əsaslarla zərərsizləşdirilməsi kiçik sahibkarlığın inkişafına dəstək ola bilər”
Azərbaycan Milli Elmlər Akademiyası (AMEA) Zoologiya İnstitutu ödənişli əsaslarla ilanların zərərsizləşdirilməsini təklif edir. İnstitutun direktoru Elman Yusifov media nümayəndələrinə açıqlamasında deyib ki, yeni təsdiqlənmiş “Elm haqqında” Qanunla artıq AMEA-nın müəssisələrinə sahibkarlıq fəaliyyəti ilə məşğul olmağa icazə verilib.
Azərbaycanda ilan tutma sahəsində mütəxəssislərin sayının çox az olduğunu və bu işin həm də çox risqli olduğunu deyən E.Yusifov hazırda institutun maddi-texniki imkanlarının bu işi görməyə imkan vermədiyini söyləyib: “İlanların zərərsizləşdirilməsi işi yalnız qarşılıqlı müqavilə əsasında həyata keçirilməlidir. Bunun üçün instituta müraciət edən müəssisə arasında müqavilə bağlanmalıdır. Həmin müraciət edən təşkilat isə ya yerli icra hakimiyyəti, ya Ekologiya və Təbii Sərvətlər Nazirliyi, ya da Fövqəladə Hallar Nazirliyi ola bilər. Əgər Fövqəladə Hallar Nazirliyi bu işin təşkilatçısı olarsa, bizimlə ödənişli əsaslarla müqavilə bağlaya bilər. Ondan sonra biz ödənişli əsaslarla ilan, əqrəb və digər zəhərli heyvanların zərərsizləşdirilməsi ilə məşğul ola bilərik”. Azərbaycanda ilanların pulla tutulması fikrinə münasibət bildirən Zoologiya İnstitutunun aparıcı elmi işçisi, biologiya üzrə fəlsəfə doktoru Təvəkkül İsgəndərov “Bakı-Xəbər”ə açıqlamasında qeyd etdi ki, ilanların zərərsizləşdirilməsi sahəsində mütəxəssis bu gün azdır: “Bununla bağlı institutda təlim keçirilir. Hər hansı bir təşkilat müqavilə əsasında bizə müraciət edir ki, onların işçiləri bu sahə üzrə təlimatlandırılsın. Fərdi qaydada müraciət edənlərə də ödənişli əsaslarla kurs keçirilir. Kursun sonunda sertifikat verilir”.
Həmsöhbətimiz onu da bildirdi ki, ilanların ödənişli əsaslarla zərərsizləşdirilməsi təklifi reallaşarsa, bu sahədə müəyyən dəyişiklik baş verə bilər: “Əsasən kiçik sahibkarlığın inkişafına dəstək ola bilər. Bəllidir ki, ilanların aktivliyi mövsümidir. İlanların zərərsizləşdirilməsi xidməti dövlət hesabına da olmalıdır. Nəzərə almaq lazımdır ki, işçilərin bir ərazidən başqa bir yerə ilan zərərsizləşdirmək üçün göndərilməsi və onların orada müəyyən işlər görməsi maliyyə tələb edir. Bu səbəbdən də çətin işlə məşğul olanlar üçün vəsait ayrılmalıdır”.
Günel CƏLİLOVA
