Bahadur Bilalov: “Ölkəmizdə kifayət qədər insan var ki, həyat yoldaşı ilə rəsmi deyil, sadəcə, molla kəbini ilə yaşayır, yəni bunların bir yerdə istirahət etmək hüququ niyə pozulmalıdır?”
Belə bir məlumat yayılıb ki, bəzi otellərdə cütlüklərdən nikah haqqında kağız tələb olunur. Otelə istirahətə gələnlərdən nikah haqqında kağızın tələb olunması isə qanunvercilikdə qeyd olunmayıb. Mədəniyyət və turizm nazirinin müavini Nazim Səmədov Xəzər-Avropa İnteqrasiya İşgüzar Klubunun üzvləri ilə görüş zaman bildirib ki, otellərin nikah kağızı tələb etməsi qanunsuz məsələdir, dünya praktikasında yoxdur, onu tələb etmək ən azı etik baxımdan doğru deyil: “Düzdür, indi də bu faktlar var, amma deməliyəm ki, onların sayı get-gedə azalır. Əgər kimsə bu faktlarla üzləşərsə, Mədəniyyət və Turizm Nazirliyinə müraciət edə bilər".
N.Səmədov əlavə edib ki, otelin nikah kağızı tələb etməsi hər hansı işçinin özbaşınalığı da ola bilər: "Nazirlik müdaxilə edir, sahibkarlarla ünsiyyətdə oluruq, onlara başa salınır ki, bu sahədə otel sahibi özünü necə aparmalıdır. Bəzən otellərdə qanunvericilikdən xəbəri olmayan insanlar çalışır. Bu, konkret işçinin özbaşınalığı da ola bilər".
Otel işçisinin müştəridən nikah haqqında sənəd tələb etməsi etik baxımdan düzgün deyil.
Məsələ ilə bağlı fikir bildirən turizm sahəsi üzrə ekspert Bahadur Bilalov bizimlə söhbətində dedi ki, otellərdə nikah haqqında şəhadətnamənin tələb edilməsi absurddur: “Dəfələrlə bu problemə toxunulsa da, təəssüf ki, bu gün də bir çox otel və istirahət mərkəzlərində evliliyi subut edən sənədlər tələb edilir. Otelə gedən şəxslər hara getdiklərini yaxşı bilirlər. Kimsə sevdiyi, kimsə də istədiyi biri ilə hər hansı bir otelə gedirsə, buna heç kim qarışa bilməz. Bu, insanların hüququdur. Amma təəssüf ki, belə hallar var və çoxdur. Bu da ölkədə yerli turizmin inkişafına mane olur”.
B.Bilalovun sözlərinə görə, bu məsələ ilə əlaqədar mədəniyyət və turizm naziri Əbülfəs Qarayev də müsahibələrində qeyd edib ki, heç bir kəbin kağızına ehtiyac yoxdur: “Amma hüquq-mühafizə orqanlarının bəzi işçiləri bu məsələdən pul qazanmaq üçün istifadə edir, hətta öyrədilmiş adamları istirahət mərkəzlərinə göndərir, sonra da “əməliyyat” keçirərək “faktı” aşkar edir, həmin istirahət mərkəzindən pul qoparır, əks halda isə oranın adını “əxlaqsızlıq yuvası” kimi hallandırırlar. Bununla üzləşməmək üçün otellərin sahibləri işçilərinə tapşırıq veriblər ki, mütləq kəbin kağızı istəsinlər. Bu, əslində, insan hüquq və azadlıqlarının məhdudlaşdırılmasıdır. Heç bir qanunumuzda yazılmayıb ki, əks cinsdən olan iki həddi-buluğa çatmış şəxs öz razılıqları olduğu halda bir otaqda qala bilməzlər. Ölkəmizdə kifayət qədər insan var ki, həyat yoldaşı ilə rəsmi deyil, sadəcə, molla kəbini ilə yaşayır. Yəni bunların bir yerdə istirahət etmək hüququ niyə pozulmalıdır?”.
Günel CƏLİLOVA
