Adil Qeybulla: “Həkimin qanuni lisenziyası və ölkə ərazisində fəaliyyətinə icazə varsa, onun hansısa klinikada çalışmasında heç bir qəbahət yoxdur”
"Bəzi xəstəxanalarda cərrahiyyə əməliyyatı zamanı başqa xəstəxanalardan anestezioloq dəvət edilir". Bu sözləri media nümayəndələrinə Səhiyyə Nazirliyinin baş anestezioloq-reanimatoloqu Aydın Qədirov deyib.
A.Qədirov bildirib ki, bu yolverilməz haldır: "Xəstənin və həkimin öz istəyi ilə kənardan anestezioloq dəvət etmək qanunsuz hərəkətdir. Bu işə belə səhlənkar yanaşmaq olmaz. Belə hallar qeydə alınan kimi həmin həkimlər işdən azad edilir. Xəstəxananın öz anestezioloqu xəstənin vəziyyəti ilə bağlı məlumatlı olur. Çünki cərrahiyyə əməliyyatı aparılmazdan öncə xəstədən sağlamlığı ilə bağlı şikayətləri soruşulur. Peşəkar anestezioloqlar xəstənin üzünə baxan kimi onda yüksək təzyiqin olduğunu anlayırlar. İndi anesteziologiya yüksək səviyyədə inkişaf edib".
Bəzi xəstəxanalara cərrahiyyə əməliyyatı zamanı digər tibb ocaqlarında çalışan anestezioloqların gətizdirilməsi fikrinə ekspert fərqli yanaşdı.
Professor, tibb eksperti Adil Qeybulla “Bakı-Xəbər“ə açıqlamasında qeyd etdi ki, dövlət xəstəxanalarında anestezioloqlar ştat üzrə fəaliyyət göstərirlər. Bu gün respublikada elə bir tibb mərkəzi yoxdur ki, orada anesteziologiya-reanimatologiya şöbəsi olmasın: “Ancaq özəl tibb müəssisələrində isə vəziyyət fərqlidir. Özəl xəstəxanada cərrahiyyə əməliyyatı olan xəstəyə anestezioloq lazım olarsa, başqa bir xəstəxanadan anestezioloq dəvət oluna bilər. Bu olduqca normal bir prosesdir. Bu hal dünyanın istənilən ölkəsində yaşanır”.
Professorun sözlərinə görə, anestezioloq xəstə ilə sadəcə tanış olur və öz təcrübəsini aparır: “Həkimin qanuni lisenziyası və ölkə ərazisində fəaliyyətinə icazə varsa, onun hansısa klinikada çalışmasında heç bir qəbahət yoxdur. Anestezioloqun bir xəstəxanadan başqa klinikada keçirilən cərrahi əməliyyata dəvət olunması qanunazidd deyil”.
Günel CƏLİLOVA
