Şəmsəddin Əliyev: “Baş verən hadisələrlə bağlı mərkəzə çevik informasiya ötürüləcək”
Xəbər verildiyi kimi, Daxili İşlər Nazirliyi Mətbuat xidmətinin regional qurumlarının əməkdaşları fəaliyyətə başlayıb. Bu barədə mətbuata açıqlamasında DİN-in Mətbuat xidmətinin rəis müavini Orxan Mansurzadə bildirib.
Onun sözlərinə görə, cinayətkarlıqla mübarizə və ictimai asayişin təmini sahəsində ərazi polis orqanları tərəfindən həyata keçirilən tədbirlərin nəticələri cinayətlər barədə KİV nümayəndələrini və ictimaiyyəti daha ətraflı və operativ şəkildə məlumatlandırmaq, polis-media münasibətlərinin daha da yaxınlaşdırılması məqsədilə respublikanın daxili işlər naziri, general-polkovnik Ramil Usubov ölkəmizin 6 bölgəsində - Gəncə, Şirvan, Quba, Lənkəran, Şəki və Bərdə şəhər və rayonlarında Mətbuat xidmətinə bilavasitə tabe olan regional qruplar yaradıb.
Bununla əlaqədar, DİN kütləvi informasiya vasitələrində xidmətə qəbulla əlaqədar müsabiqənin keçirilməsi barədə elanlar verib. Şəffaflıq, aşkarlıq və ədalət prinsipləri əsasında gerçəkləşən qəbul zamanı dövlət ali təhsil müəssisələrini jurnalist ixtisası üzrə bitirmiş, media qurumlarında işləmək təcrübəsi olan, yaşı 30-dan yuxarı olmayan və həqiqi hərbi xidmət müddətini başa vurmuş şəxslərə üstünlük verilib. Seçimin sonunda iştirakçılar arasından daha hazırlıqlı olan 6 nəfər “polis leytenantı” xüsusi rütbələri verilməklə həmin vəzifələrə təyin olunub.
Ümumilikdə, DİN-in Mətbuat xidmətinin regional qurumlarının fəaliyyətə başlamasını ekspertlər necə dəyərləndirir? Bunun nə kimi əhəmiyyəti var?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyev buna müsbət prizmadan yanaşdı: “Daxili işlər naziri Ramil Usubovun əmri ilə yaradılan bu strukturun regional xidmət sahəsinin yaradılması cinayətkarlıqla mübarizədə çevik reaksiyanın təmin olunması baxımından müsbət əhəmiyyət kəsb edir. Adətən mərkəzdən uzaq regionlarda baş verən cinayətlər barədə hər hansı məlumatın yayılması, dərc olunmasında bəzən təhrifçiliyə yol verilir. O baxımdan regionlarda DİN-in Mətbuat xidmətinin struktur sahələrinin yaradılması hansısa təhrifçiliyin yaranmasına, bir növ, sədd çəkəcək. Baş verən hadisələrlə bağlı mərkəzə çevik informasiya ötürüləcək. Eyni zamanda, kütləvi informasiya vasitələri ilə elektron saytlarda dərc olunan bu xarakterli məlumatların da səhihliyinə, bir növ, xidmət edəcək. Ona görə də belə bir qərarın verilməsi tamamilə doğru və məntiqlidir. Bu, Daxili İşlər Nazirliyinin cinayətkarlıqla mübarizə siyasətinə, həm də dövlətin cinayətkarlıqla mübarizə proqramına uyğun olan bir haldır. Məsələ ondadır ki, bütün dünyada bu sahənin şəffaflığı, məsələlərə operativ reaksiya kifayət qədər təmin olunub. Azərbaycanda da daxili işlər nazirinin əmri ilə belə bir regional xidmət fəaliyyətə başlayıb. Hesab edirəm ki, bu təqdir olunmalıdır. Zamanla bunun əhəmiyyətini və səmərəsini görəcəyik. Bütün bunlarla yanaşı, bunun polis-media münasibətlərinin daha yaxşı qurulmasına, təşkil olunmasına ciddi təkan verəcəyi qənaətindəyəm. Çünki sözügedən məsələdə informasiya siyasətinin formalaşdırılmasında məhz bu amilin də özünəməxsus rolu və əhəmiyyəti var. Bu baxımdan da hesab edirəm ki, regional qurumların fəaliyyəti effektli olacaq və ümumi işə öz töhfəsini verəcək. O üzdən, bunu dəstəkləyirəm və alqışlayıram”.
Vidadi ORDAHALLI
