Paytaxt sürücülərinin arzulamadıqları hadisələrdən biri də yağışın yağmasıdır. Yağış yağan kimi avtomobillərin hərəkət sürəti aşağı düşür, nəticədə yollarda sıxlıq yaranır, bəzən də texniki nasazlıq üzündən yolda qalan avtomobillər böyük tıxaca səbəb olur. Yağışlı havada isə həmin avtomobili kənara çıxarmağa hər kəs kömək etmir.
Srağagün yağan güclü yağış zamanı da “20 Yanvar” dairəsi yaxınlığında DYP əməkdaşları nəqliyyatın hərəkətini tənzimləyirdi. Lakin buna baxmayaraq, uzun tıxac yaranmışdı. Səbəb yolun sol hərəkət hissəsində avtomobillərdən birinin xarab olması idi. Bunu avto-təlimçi Həmid İslamov öz “İnstagram” səhifəsində paylaşıb: “Dünən işdən yorğun çıxaraq evə gedirdim. “20 Yanvar” dairəsinə çatanda uzun tıxacla rastlaşdım. Düşündüm ki, yəqin yağışa görə sıxlıqdır. Elə bu zaman yolun sol hərəkət hissəsində “Mercedes” markalı avtomobilin xarab olduğunu gördüm. Polis əməkdaşlarından birinin vətəndaşlardan kömək üçün xahiş etdiyini eşitdim. Mən də buna biganə qala bilməzdim. Günümün çox hissəsi avtomobildə keçdiyi üçün həmin sürücünü yaxşı anlayırdım. Polis dərhal hərəkəti məhdudlaşdırdı və vətəndaşların köməyi ilə avtomobili itəliyərək yolun sağ hissəsinə çıxardıq. Bundan sonra DYP əməkdaşı hətta avtomobili təmir etmək üçün usta da çağırdı.
Əlbəttə, bütün bunlar sürücülərdə yol polislərinə rəğbət hissi yaradır. Lakin sürücülər də unutmasınlar ki, texniki cəhətdən nasaz avtomobillərlə yola çıxmaq tövsiyə edilmir. Bu, qanunla da qadağandır. Əslində, yol polisləri bu fotodakı sürücüyə cərimə də yaza bilərdi. Lakin onlar humanistlik nümayiş etdirib köməklik göstərdilər. Ancaq bu o demək deyil ki, avtomobil hansı vəziyyətdə olursa-olsun onu sürüb yollarda qalmaq olar. Sürücülər bu cür məsələlərə diqqətlə yanaşmalı və avtomobili daim saz vəziyyətdə saxlamalıdırlar.
DYP əməkdaşı ilə söhbətimdə məlum oldu ki, o, Bakı şəhər DYP-nin Yol-Patrul Xidməti Alayının 3-cü taqımının əməkdaşı, polis serjantı Haqverdi Hümbətovdur”.
H.İslamov DİN rəhbərliyinə də təşəkkür edib: “Mən də həmin əməkdaşın bu hərəkətini alqışlayaraq ona çətin və şərəfli peşəsində uğurlar arzulayıram və polis orqanlarında belə şərəfli polislər olduğu üçün Daxili İşlər Nazirliyinin rəhbərliyinə təşəkkür edirəm”.
Hazırladı: Namiq QULİYEV
