Astaranın Ərçivan qəsəbəsinin 21 nəfər sakini redaksiyamıza maraqlı məktub göndərib. Onlar rayonun iki kəndinin sel-su daşqınlarına məruz qaldığı vaxt Polis İdarəsinin rəhbərliyinin və şəxsi heyətin davranışlarından həqiqi mənada ruhlanıblar. Sakinlər ürək sözlərini DİN rəhbərliyinə və ölkə ictimaiyyətinə çatdırmağı redaksiyamızdan israrla xahiş ediblər.
Sakinlər yazır: “Biz daxili işlər naziri, general-polkovnik cənab Ramil Usubovun ədalətli, vətənpərvər, dövlətçiliyə sadiq bir nazir olduğunu bilirik. Nazir təyin olunduğu vaxtdan daxili işlər orqanlarında ciddi dönüş yaranmış, qanun-qayda, nizam-intizam yüksək səviyyəyə çatdırılmaqla yanaşı, cinayətkarlıqla və narkotiklərlə mübarizə gücləndirilib. Biz də daxili işlər naziri cənab Ramil Usubovun dövlət, həm də xalq qarşısında xidmətlərini yüksək dəyərləndiririk.
Astara rayonunda bir neçə gün yağan leysan yağışlar nəticəsində 04-05 oktyabr 2017-ci il tarixlərində təbii fəlakət nəticəsində rayonumuzun İranla həmsərhəd olan Rüdəkənar və Qapıçıməhəllə kəndlərində çayın səviyyəsi qalxaraq evlər, həyətlər və insanlar su altında qalmışdı. Bu hadisədən xəbərdar olan Astara Polis Şöbəsinin rəisi Adil Həsənov dərhal öz rəhbərliyi altında, şöbənin rəis müavini Rövşən Mirəliyev, təhqiqat bölməsinin rəisi Rauf Aslanov, DYP bölməsinin rəisi İlqar Rəhimov, polis nəfəri Təbriz Süleymanov və digər polis əməkdaşlarını həmin əraziyə cəlb etməklə, xalqın harayına gedərək, həmin əraziyə katerləri cəlb etməklə, diqqət və qayğıları nəticəsində vətəndaşlar arasında 75-85 yaşlı ahılları, 50-dən çox insanın həyatını ölümdən xilas etmiş, gecədən başlayaraq səhərə qədər həmin ərazidən vətəndaşları evakuasiya etmişlər. Heç bir vətəndaş xəsarət almayıb. Belə bir çətin şəraitdə, gecədən başlayaraq, səhərə qədər Astara Polis Şöbəsinin əməkdaşları öz qeyrətini, cəsarətini, mərdliyini bir daha xalqa nümayiş etdirdilər. Bu gün bütün astaralılar Astara polisinin mərdliyindən, qeyrətindən danışırlar. Biz Astara polisi ilə fəxr edirik. Polis bizi qoruyur, biz də polisimizi qorumalıyıq. Biz astaralılar bu gün Astara polisinin həqiqətləri haqqında yazmağı özümə borc bilirik.
Bütün bunlar daxili işlər naziri cənab Ramil Usubovun xidmətlərinin bariz nümunəsidir. Biz astaralılar 04-05 oktyabr 2017-ci il tarixlərində Astara rayonunda təbii fəlakət zamanı çoxsaylı vətəndaşın həyatını xilas edən Astara polislərinin göstərdikləri cəsarətə, mərdliyə, qeyrətə görə daxili işlər naziri cənab Ramil Usubova bir daha öz minnətdarlığımızı bildiririk”.
