Nəcibə Səfərova: “Çünki orqanizm vitaminlərin qəbuluna öyrəşir, həmçinin də allergik reaksiyalar yaradır”
Payız və qış aylarında insanlar immunitetlərini gücləndirmək üçün satışda olan müxtəlif adda vitaminlər qəbul edirlər. Ancaq immuniteti gücləndirən dərmanların insan səhhətinə zərərli olması haqqında fikirlər bildirilir.
Səhiyyə Nazirliyinin Kliniki Tibbi Mərkəzinin (KTM) Toksikologiya şöbəsinin müdiri Azər Maqsudov media nümayəndələrinə açıqlamasında bildirib ki, payız-qış fəslinin gəlişi ilə əlaqədar immunitetini möhkəmləndirmək məqsədilə vitamin qəbul edən şəxslər özlərini zəhərlənmədən qorumaq üçün ehtiyatlı olmalıdırlar. Onun sözlərinə görə, havaların soyuması ilə əlaqədar dərmanlardan zəhərlənmə və allergik reaksiyalarla bağlı xəstəxanaya müraciət edənlərin sayı arta bilər: “Ümumilikdə, bu ilin yanvar-sentyabr ayları ərzində KTM-ə dərmanlardan zəhərlənmə ilə əlaqədar 112, allergik reaksiyalarla bağlı 46 nəfər müraciət edib. Dərmanlardan zəhərlənmələr və onların verdiyi allergik reaksiyalarla bağlı müraciət edənlərin arasında qadınların sayı üstünlük təşkil edir: Dərmanlardan zəhərlənmələrlə bağlı müraciət edənlər arasında daha çox yaşı 40-dək olan qadınlar üstünlük təşkil edir. Onların arasında 16-18 yaşlılar da olur. Bu yaşda olanların bir çoxunda keçid dövrü keçirməsi, imtahana hazırlaşmalar stress yaradır. Onların bu stressə qarşı qəbul etdiyi dərmanlar bəzən zəhərlənmə yaradır. Müraciət edənlər əsasən antibiotiklər və vitaminlərin qəbulu nəticəsində dərmanların əlavə təsirlərinə məruz qalıblar”. Toksikoloq dərmanın əlavə təsirlərinin qeydə alınması ilə dərmandan zəhərlənmə arasında fərqlərin olduğunu deyib. Onun sözlərinə görə, dərmanın əlavə təsirləri özünü allergik reaksiya kimi büruzə verir. Bu zaman dəridə qızarma olur, başgicəllənməsi yaranır: "Ümumi əlamətləri dərman zəhərlənməsinə oxşayır, amma bu əlamətlər dərman zəhərlənməsi deyil. Dərman zəhərlənməsi laboratoriyada qanın toksiki-kimyəvi analizi vasitəsilə ilə müəyyən olunur. Bu analizin müayinəsi zamanı dərman zəhərlənməsinin baş verib-vermədiyini və hansı tip dərmandan baş verdiyi təsdiqlənir. Xəstə dərmanın əlavə təsirlərinə məruz qaldıqda tibbi yardımdan sonra evə buraxılır. Dərman zəhərlənməsi olduqda isə xəstə mütləq xəstəxana rejimində müalicə edilməlidir".
İmmuniteti gücləndirən dərmanların insan səhhətinə vurduğu zərər barəsində danışan həkim-terapevt Nəcibə Səfərova bizimlə söhbətində bildirdi ki, uzun müddət vitamin qəbulu da olduqca ziyandır. Çünki orqanizm daimi vitamin qəbuluna öyrəşir, daha sonra isə allergik reaksiyalar yaranır: “Vitamini çox qəbul etdikdə baş gicəllənməsi, cüt görmə, baş ağrısı, sıxılma, dodaqların və ovucun soyulması, tez-tez qusma kimi problemlərə gətirib çıxarır. Məlumat üçün bildirim ki, B vitamini çox yüksək dozalarda qəbul olunsa, zəhərlənməyə səbəb olur. C vitamini 2 qramdan çox alındığında qarın ağrısı, ürəkbulanma və qusma şəklində özünü göstərir. Davamlı olaraq və yüksək dozada istifadə edildikdə isə böyrək daşı əmələ gəlir. D vitamininin çoxluğu isə qanda kalsium yüksəlməsi, böyrək xəstəlikləri, damar problemlərinə səbəb olur”.
Həmsöhbətimizin sözlərinə görə, bəzi vitaminlər var ki, onlar insan orqanizminə heç bir enerji vermir: “Demək olar ki, onlar orqanizm tərəfindən tam qəbul olunmur. Bundan əlavə, vitaminlər orqanizmdə kimyəvi maddələrin yığılmasına səbəb olur. Bu isə olduqca təhlükəlidir. Vitaminlərin həddindən artıq çox qəbulu da insan orqanizminə olduqca ziyanlıdır. Çünki orqanizm vitaminlərin qəbuluna öyrəşir, həmçinin də allergik reaksiyalar yaradır"
N.Səfərova qeyd etdi ki, həkim məsləhəti olmadan vitaminlərin qəbulu olduqca təhlükəlidir:
"Əslində, allergiya orqanizmdən asılı olaraq fərqlənir. Kimdə isə vitamin qəbulu allergiya yarada bilər, kimdə isə heç bir reaksiya verməz. Bu, insan orqanizmindən asılıdır”.
Günel CƏLİLOVA
