Nəsimi rayon İcra Hakimiyyətinin və rayon Ağbirçəklər cəmiyyətinin birgə təşkilatçılığı ilə 18 oktyabr – Müstəqillik günü ərəfəsində rayonun 200 – dən artiq ahıl vətəndaşı ilə görüş keçirilib.
“Ambassador” otelinin akt zalında baş tutan görüşün əvvəlində “Ahıl vətəndaşların cəmiyyətimizdə rolu” mövzusunda videoçarx nümayiş etdirilib.
Tədbiri giriş sözü ilə açan rayon Ağbirçəklər cəmiyyətinin sədri Zərifə Quliyeva cəmiyyətin yaranması zəruriliyindən və rayonun ictimai–siyası həyatında ahıl vətəndaşların, o cümlədən ağbirçəklərin rolundan danışıb. Bildirib ki, tarix boyu millətimiz ağbirçəklərə diqqət və qayğı ilə yanaşıb. Ulu öndər Heydər Əliyevin ahıl vətəndaşlara göstərdiyi böyük diqqət və qayğıdan danışan Z.Quliyeva Prezident İlham Əliyevin, bütün sahələrdə olduğu kimi, bu sahədə də Heydər Əliyev ideyalarını uğurla və layigincə davam etdirdiyini deyib.
Nəsimi rayon İcra Hakimiyyəti başçısının birinci müavini Gülarə Verdiyeva bildirib ki, hər il oktyabr ayının 1-də dünyanın bir çox ölkələri Beynəlxalq Ahıllar gününü qeyd edir. BMT Baş Məclisi 1992-ci ildə Ahılların müdafiəsi ilə bağlı Qətnamə qəbul edib. Həmin Qətnamənin prinsiplərinə uyğun olaraq hər il oktyabr ayının 1-i Beynəlxalq Ahıllar Günü kimi qəbul edilib, həmçinin 1999-cu il Beynəlxalq Ahıllar ili elan olunub. 2001-ci il iyunun 22-də isə "Ahıllara sosial xidmət haqqında" Azərbaycan Respublikasının Qanunu qəbul edilib. 1993-cü ildən başlayaraq hər il oktyabrın 1-i Respublikamızda "Beynəlxalq Ahıllar Günü" kimi qeyd olunur.
Çıxışını davam etdirən Nəsimi rayon İcra Hakimiyyəti başçısının birinci müavini Verdiyeva qeyd edib ki, bu gün Nəsimi rayonunda əhalinin 7378 nəfərini yaşı 70-dən yuxarı olan ahıllar təşkil edir. Onlardan 2521 nəfəri kişi, 4857 nəfəri qadındır. Dövlət Sosial Müdafıə Fondunun Nəsimi rayon şöbəsinin Sosial xidmət sektorunda 277 nəfər tənha, əlil qeydiyyatdadır ki, onlara 27 nəfər sosial işçi xidmət göstərir. Xidmətdə olan 277 ahıl vətəndaşdan 238 nəfərinin yaşı 70-yaşdan yuxarıdır, onlardan da 189 nəfəri qadın, 49 nəfəri kişidir. Nəsimi rayonunda 100 yaşdan yuxarı 8 nəfər sakin yaşayır.
Tədbirdə çıxış edənlər – Bakı Dövlət Universitetinin professoru İradə Hüseynova, ATU-nun uşaq stomatologiyası kafedrasının müdiri Rəna Əliyeva və digərləri dövlət tərəfindən ahıl vətəndaşlara göstərilən diqqət və qayğıya görə Prezident İlham Əliyevə və Azərbaycan Respublikasının Birinci vitse-prezidenti Mehriban Əliyevaya öz minnətdarlıqlarını bildirib, qarşıdan gələn 18 oktaybr – Müstəqillik günü münasibətilə tədbir iştirakçılarını təbrik ediblər.
Tədbirin sonunda bir qrup ahıl vətəndaşa hədiyyələr təqdim olunub.
Baki-xeber.com
