Nəsimi rayonunda gənclərin həqiqi hərbi yola salınma mərasimi keçirilib.
Nəsimi RİH-dən “Bakı Xəbər”ə verilən məlumata görə, oktyabrın 9-da rayon rəhbərliyinin, ictimaiyyət nümayəndələrinin, hərbi xidmətə yola salınan gənclərin və onların valideynlərinin iştiraki ilə, “Şərq sarayı” restoranında tədbir keçirilib.
Əvvəlcə Azərbaycan Respublikasının Dövlət Himninin sədaları altında Azərbaycanın Dövlət Bayrağı zala gətirilib. Ardınca 8 saylı tam orta məktəbin şagirdlərinin hazırladıqları “ And içirik” adlı ədəbi-bədii kompozisiya nümayiş etdirilib. Sonra hərbi xidmətə yola salınan gənclər Azərbaycan bayrağını öpərək müqqədəs Quranın altınan keçiblər.
Tədbirdə Səfərbərlik və Hərbi Xidmətə Çağıriş üzrə Dövlət Xidməti Nəsimi rayon idarəsinin rəisi, polkovnik Eldəniz Əliyev çıxış edərək bildirib ki, Azərbaycan Prezidentinin “Azərbaycan Respublikası vətəndaşlarının 2017-ci ilin oktyabr ayının 1-dən 30-dək həqiqi hərbi xidmətə çağırılması və müddətli həqiqi hərbi xidmətdən, hərbi qulluqçuların ehtiyata buraxılması ” haqqında 05 sentyabr 2017-ci il tarixli, 3209 saylı Sərəncamına və “Azərbaycan Respublikasında Hərbi Vəzifə və Hərbi Xidmət Haqqında” Azərbaycan Respublikası Qanununa əsasən gənclərin həqiqi hərbi xidmətə çağırışına başlanıb. Azərbaycan Silahlı Quvvələrinin keçdiyi tarixi yola nəzər salan Eldəniz Əliyev müasir, müstəqil ölkəmizdə Silahlı Quvvələrin formalaşmasında və güclənməsində ulu öndər Heydər Əliyevin və Prezident İlham Əliyevin xidmətlərindən danışıb.
Daha sonra Qarabağ müharibəsi veteranları, əlilləri və şəhid ailələri ictimai birliyinin Nəsimi rayon şöbəsinin sədri Azər Quliyev çıxış edərək hərbi xidmətə yola salınan gənclərə uğurlar arzulayıb.
Tədbirdə çıxış edən Nəsimi rayon İcra Hakimiyyətinin başçısı Asif Əsgərov bidirib ki, ordu hər bir dövlətin və xalqın təhlükəsizliyinin qarantıdır. Onun sözlərinə görə, müasir dünyamızda baş verənlər təsdiqləyir ki, güclü ordusu olmayan dövlətlər müstəqil siyasət həyata keçirməkdə çətinlik çəkir. Bir həqiqət var ki, bütün diplomatik danışıqların arxasında güclü ordu dayanır. Odur ki, ümummilli lider Heydər Əliyev güclü ordunun yaradılmasını dövlətin başlıca vəzifələrindən biri hesab edərək bu sahəni xüsusi nəzarətə götürdü və qısa müddət ərzində çox böyük işlərin görülməsinə nail oldu.
Hazırda Prezident İlham Əliyevin hərbi sahəni daim diqqətdə saxladığını deyən A.Əsgərov bu gün Azərbaycan Ordusunun regionun ən qüdrətli ordusuna çevrilməsini sözügedən sahəyə Silahlı Qüvvələrin Ali Baş Komandanı İlham Əliyevin gündəlik diqqət və qayğısının nəticəsi adlandırıb. Çıxışının sonunda o, hərbi xidmətə yola salınan gənclərə vətənimizi şərəflə qorumağı arzulayıb.
Tədbir hərbi vətənpərvərlik mahnılarının mahir ifaçısı Şəmistan Əlizamanlının ifası ilə davam edib.
Baki-xeber.com
