Nəsimi İcra Hakimiyyətində Beynəlxalq Müəllimlər Günü təntənə ilə qeyd olunub.
Nəsimi RİH-dən “Bakı Xəbər”ə verilən məlumata görə, əvvəlcə tədbir iştirakçıları Müəllimlər gününə həsr olunmuş videoçarxa baxıb. Sonra tədbirdə çıxış edən Nəsimi rayon İcra Hakimiyyətinin başçısı Asif Əsgərov Ulu öndər Heydər Əliyevin Azərbaycan təhsilinə olan diqqət və qayğısından danışıb, Prezident İlham Əliyevin səyləri nəticəsində son illər ərzində respublikada tikilən və əsaslı təmir olunan təhsil müəssisələri, təhsil işçilərinin sosial müdafiəsinin möhkəmləndirilməsi istiqamətində atılan addımlar, Birinci vitse-prezidenti Mehriban Əliyevayanın gördüyü işlər və ötən təhsil ilində rayonun təhsil müəssisələrinin uğurları barədə məlumat verib.
A.Əsgərov qeyd edib ki, Heydər Əliyev həmişə müəllim əməyini yüksək qiymətləndirib, müəllim haqqında xoş sözlər söyləyib. “Müəllimlərini minnətdarlıqla xatırlayan, onların xidmətləri haqqında ürəkdolusu danışan Heydər Əliyev ölkəyə rəhbərlik etdiyi dövrdə həmişə müəllimə hörmət və ehtiramla yanaşıb, onların maddi vəziyyətinin, rifah halının yaxşılaşdırılması qayğısına qalıb”- deyən icra başçısı hər il xeyli təhsil işçisinə Əməkdar müəllim adı, Prezident təqaüdü və bir sıra dövlət təltiflərinin verilməsini minnətdarlıqla qeyd edib.
Tədbirdə çıxış edənlər təhsilə və təhsil işçilərinə göstərilən diqqət və qayğıya görə minnətdarlıq ediblər. Sonra Rayon İcra Hakimiyyətinin başçısı Asif Əsgərov Azərbaycan Respublikası Prezidentinin 04 Oktyabr 2017-ci il tarixli Sərəncamı ilə “Əməkdar müəllim” adına layiq görülmüş 23 saylı tam orta məktəbin müəllimi - Mirzəyeva Ağabacı Nuftulla qızını, “Tərəqqi medalı” ilə tətif edilmiş Bakı Slavyan Universitetinin məktəb lisey kompleksinin müəllimi Kərimli Naibə Kamil qızını və 46 saylı tam orta məktəbin müəllimi Ələkbərli İncinaz Rauf qızını təbrik edib, onlara gül dəstələri və hədiyyələr təqdim edilib.
Sonda əlamətdar gün münasibətilə tədbirdə iştirak edən bütün təhsil işçilərinə İcra Hakimiyyətinin hədiyyələri təqdim olunub.
