Vaqif Əsədov: “Sürücülər düzgün sürət həddini seçməli, yol kənarlarında gölməçələrə yığılmış yağış suları ilə piyadaları çirkləndirməməlidirlər” Şahin Camalov: “Piyadaların üzərinə su sıçradan sürücülərin cərimələnməsi düzgün addımdır”
Son günlərdə paytaxt ərazisinə yağan aramsız yağışlar nəqliyyatın hərəkətində problemlər yaradıb. Çala-çuxurlu yolların yağış suyu ilə dolması həmin ərazilərdə xırda gölməçələrin yaranmasına səbəb olur. Həmin yollardan istifadə edən sürücülər bəzi hallarda kənardan keçən piyadaların üzərinə su sıçradırlar. Beləcə, sürücülərin günahı üzündən piyadaların üstü çirkab su ilə bulanmış olur.
Qeyd edək ki, piyadaların üzərinə bilərəkdən su sıçradan sürücülərin cərimələnməsi qanunvercilikdə mövcuddur. Qanunverciliyə əsasən, yağışlı günlərdə piyadaların üzərinə su sıçradan sürücülər 40 manat dəyərində cərimələnir.
Bakı Şəhər Dövlət Yol Polisi İdarəsinin İctimaiyyətlə əlaqələr şöbəsinin nümayəndəsi media nümayəndələrinə məlumat verib ki, yağışlı havada avtomobil sürücüləri hərəkət edərkən minimum sürət həddini seçməlidir: “Xüsusilə sürücülər piyadalara yaxınlaşdıqda elə etməlidirlər ki, çirkli yağış suları onların üst-başını çirkləndirməsin. Artıq 4 piyada bununla bağlı bizə müraciət edib. Həmin vətəndaşların müraciəti əsasında o sürücülərdən biri barəsində protokol yazılıb. Belə ki, bu avtomobil sürücüsünün yüksək sürətlə avtomobili idarə etməsi nəticəsində su gölməçəsi vətəndaşın geyimini bulayıb. Bu, inzibati xəta tərkibi yaradır və sürücünün məsuliyyətə cəlb edilməsi deməkdir”.
Bakı Şəhər Dövlət Yol Polisi İdarəsinin İctimaiyyətlə əlaqələr şöbəsinin rəhbəri Vaqif Əsədov bizimlə söhbətində bildirdi ki, əsasən metronun "Xətai”, "İnşaatçılar” və "Elmlər Akademiyası” stansiyaları ətrafında hərəkət edənlər bu problemlə qarşılaşıblar: “Artıq 3 avtomobil sürücüsünün tapılıb məsuliyyətə cəlb edilməsi ilə bağlı işə başlamışıq. Oktyabrın 4-ü Bakı polisi paytaxt yollarında məhz hərəkətin tənzimlənməsi ilə məşğul olub. Lakin heç kimə protokol yazılmayıb. Amma sözügedən hadisə ilə bağlı 3 sürücü barəsində daxil olan şikayət araşdırılır və onların cəzalandırılması üçün iş aparılır”.
V.Əsədov yağışlı havada hərəkət edən sürücülərə də müraciət edərək onları diqqətli olmağa çağırıb:
"Sürücülər düzgün sürət həddini seçməli, yol kənarlarında gölməçələrə yığılmış yağış suları ilə piyadaları çirkləndirməməlidirlər. Əks halda, sürücülər İnzibati Xətalar Məcəlləsinə görə xəta tərkibi yaradır və ən azından 40 manat cərimə oluna bilərlər. Bir daha hər bir sürücünü yağışlı havada hərəkət edərkən diqqətli olmağa çağırırıq”.
“Təhlükəsiz Yol” Alyansının koordinatoru Şahin Camalov bizimlə söhbətində bildirdi ki, yol kənarında olan piyadaların sürücülər tərəfindən palçıqlı, kirli su ilə isladılması etik baxımdan düzgün deyil: “Səhər işə tələsən şəxsin üzərinin yüksək sürətlə maşını idarə edən şəxs tərəfindən kirli su ilə bulanması acınacaqlıdır. Yağışlı günlərdə sürücülər ikiqat diqqətli olmalıdır. Onlar həm yola diqqət etməli, həm də yol kənarında dayanan piyadaları düşünməlidir.
Əslində, bu, mənəviyyat məsələsidir. Normal və ailəsinə hörmət edən sürücü avtomobili sürərkən piyadanın üzərinə bilərəkdən palçıqlı su sıçratmaz. Hər biri başa düşməlidir ki, yol kənarı ilə hərəkət edən onun doğmaları və yaxınları ola bilər. Yəni heç kim öz yaxınına su sıçratmasından sığortalanmayıb. Digər tərəfdən, mədəniyyətsiz sürücülər 60 km sürətlə icazə verilən yolda 180 km sürətlə sürürlər. Belə sürücülər üçün yay və qış fərq etməz. Bunun da sonu ölümdür. Həmin qəbildən olan sürücüləri nə qədər cərimələsən də, xeyri olmayacaq. Yəni belə tipdən olan sürücülərimiz də yox deyil”.
Həmsöhbətimiz onu da vurğuladı ki, piyadaların üzərinə su sıçradan sürücülərin cərimələnməsi düzgün addımdır: “Ola bilər ki, bu işi görənlərin bəziləri üçün 40 manat böyük məbləğ sayılmaz. Ancaq bu əməl digər eyni hərəkəti etmək istəyən sürücülərə, bir növ, dərs olacaq”
Günel CƏLİLOVA
