Bahadur Bilalov: “Son illər ölkəmizdə keçirilən beynəlxalq əhəmiyyətli yarışlar və tədbirlər biznes və konqres turizminin inkişaf etməsinə səbəb olub”
Bu gün ölkədə turizmin inkişafı istiqamətində davamlı tədbirlər həyata keçirilir və yeni otellərlə yanaşı, turizm şirkətləri fəaliyyətə başlayır, beynəlxalq səviyyəli konfranslar, seminarlar təşkil olunur. Nəticədə Azərbaycan turizmi artıq çiçəklənmə dövrünü yaşayır.
Ölkəmizdə turizmin bir neçə növü daha çox məşhurdur. İstirahət üçün ölkəmizi seçən turistlət müxtəlif növ turizm sahələrinə müraciət edirlər. Ölkəmizə gələn turistlərin daha çox hansı növ turizmi seçdiyi bəlli olub. Azərbaycan Turizm Assosiasiyası (AzTA) sədrinin müşaviri Müzəffər Ağakərimov media nümayəndələrinə açıqlamasında ölkəmizdə turizm növlərindən ən çox biznes və konqres turizminin inkişaf etdiyini bildirib. Onun sözlərinə görə, ölkəmizdə beynəlxalq yarışlar və müxtəlif beynəlxalq səviyyəli tədbirlər keçirildiyindən, bu növ turizm daha çox inkişaf edib.
M.Ağakərimov deyib ki, ölkəmizdə ikinci ən çox inkişaf edən turizm növü isə qış turizmidir. Buna səbəb Azərbaycanda olan qış turizm komplekslərinin beynəlxalq standartlara cavab verməsidir. Assosiasiya nümayəndəsinin sözlərinə görə, ölkəmizdə 3-cü ən çox inkişaf edən turizm növü isə gəzmə turizmidir. Bu növü seçən turistlər şəhər gəzintisinə üstünlük verirlər.
Ölkəmizdə daha çox biznes və konqres turizminin inkişaf etdiyini ekspert də təsdiqləyir.
Turizm sahəsi üzrə ekspert Bahadur Bilalov bizimlə söhbətində bildirdi ki, konqres turizmi işgüzar və biznes turizminin bir qolu olaraq bir çox ölkələrdə geniş yayılıb. Turizmin inkişaf etdiyi ölkələrdə turist axınının bərabər paylanması üçün bu növdən bacarıqla istifadə edirlər: “Belə işgüzar tədbirlər, adətən, yaz və ya payız mövsümündə təşkil edildiyindən, turist axınının tənzimlənməsində əhəmiyyətli rol oynayır. Konqres turizminin bir cəhətini də qeyd etmək lazımdır. Bir çox hallarda, adını sadaladığımız tədbirlərə qatılmaq üçün səfər edən mütəxəssislər öz ailə üzvlərini də özləri ilə aparmaq istəyirlər. Bu səbəbdən də konqres turizminin inkişafında maraqlı olan təşkilatlar bu məsələni diqqətdə saxlamalı, tədbir iştirakçılarının ailə üzvləri üçün xüsusi ekskursiya proqramları təklif etməlidirlər. Digər bir tərəfdən, konqres turizminin inkişafında maraqlı olan dövlətlər xüsusi konqres mərkəzləri inşa edirlər”.
Hömsöhbətimiz onu da vurğuladı ki, konqres turizminin inkişafını zəruri edən amillərdən biri də onun konkret mövsümlə bağlı olmamasıdır: “Bu turizm növü hər hansı bir insanın və ya təşkilatın özünə uyğun bir vaxtda istədiyi ölkədə keçirdiyi tədbirlə bağlıdır. Bunun hava şəraitinə, mövsümə dəxli yoxdur”.
Ekspert onu da vurğuladı ki, son illər ölkəmizdə keçirilən beynəlxalq əhəmiyyətli yarışlar bu sahənin daha da inkişaf etməsinə səbəb olur: “Tək idman yarışları deyil, beynəlxalq idman tədbirləri, shopping və musiqi festivalları və digər əhəmiyyətli tədbirlər biznes və konqres turizminin inkişaf etməsinə səbəb olub”.
Günel CƏLİLOVA
