Bahar Qafarova: “Spirtli içkilərin reklamı yayımlanan zaman titrlərdə və ya reklam çarxının içərisində içkinin insan səhhətinə nə kimi ziyanlı olması qısa da olsa məlumat verilsin”
Azərbaycanda spirtli içkilər haqqında reklam çarxlarının azaldılması alkoqolizmlə mübarizədə müsbət nəticə verə bilər. Bunu Respublika Narkoloji Mərkəzinin şöbə müdiri Afət Məmmədova media nümayəndələrinə açıqlamasında deyib.
O qeyd edib ki, alkoqolizmlə xəstə olanlara xas olan motivasiya xüsusiyyətləri haqqında elmi və nəzəri məlumatların çoxluğu xəstələrdə gedən dəyişiklikləri qabaqcadan anlamaqda, profilaktika tədbirlərini tezləşdirməkdə böyük yardımçı vasitə ola bilər: “Hesab edirik ki, xüsusi maarifçilik işinin aparılması və spirtli içkilər haqqında reklam çarxlarının azaldılması müsbət nəticə verə bilər. Çünki ayrı-ayrı hallarda alkoqolizm məhz psixoloji səbəblərdən ortaya çıxır və dərinləşərək xəstəliyə çevrilir. Şəxsin özünü qiymətləndirməsinin aşağı düşməsi, öz imkanlarına inamın olmaması və s. kimi psixoloji vəziyyətlər bu xəstəliyin inkişafına və dərinləşməsinə gətirib çıxara bilər. Alkoqolizm cəmiyyətin nüvəsi olan ailəni dağıdır və onun üzvlərini cəmiyyətin yararsız nümayəndələrinə çevirir, boşanmaların sayını artırır və beləliklə, cəmiyətə ciddi zərbə vurur. Fikrimizcə, alkoqolizmin sosial bəlalarını aradan qaldırmaq üçün müxtəlif yönümlü sosial və psixoloji iş aparılmalı və alkoqol qəbul edən şəxslərlə mütəmadi olaraq psixoloji treninqlər keçirilməli, alkoqolun daimi qəbulunun yaratdığı fəsadların təhlükəliliyi onlara başa salınmalı və anladılmalıdır. Əks halda, cəmiyyətin inkişafının sürətləndiyi bir dövrdə stress və yorğunluq faktoru psixoloji müdafiə kimi alkoqol qəbul edənlərin devizinə çevriləcək”.
Ekspetlər də düşünür ki, alkoqol reklam çarxlarının azaldılması insanların spirtli içkiyə meylinin azalmasına səbəb ola bilər.
Psixoloq Bahar Qafarova bizimlə söhbətində bildirdi ki, spirtli içkilərin reklamı xarici ölkələrdə fərqli tərzdə yayımlanır: “Belə ki, Rusiyada insanları spirtli içkinin fəsadlarından xilas etməyə çalışırlar. O cümlədən, Türkiyə telekanallarında spirtli içkilər və siqaretlərin təsvirləri ilə bağlı, eləcə də istifadə olunan bakallar və s. məişət əşyalarının üzərində örtüklər verirlər. Yəni spirtli içkinin qəbulu azyaşlı uşaqlar tərəfindən görünməməlidir. Onu da deyim ki, son illər Türkiyədə yayımlanan televiziya filmlərində və ya verilişlərdə spirtli içkilərlə bağlı kadrların göstərişi ümumiyyətlə yasaqdır. Yaxşı olar ki, bizdə də alkoqol vasitələrinin reklamı gecə saat 12-dən sonra yayımlansın. Yayımlanan zaman titrlərdə və ya reklam çarxının içərisində spirtli içkinin insan səhhətinə nə kimi ziyanlı olması qısa da olsa açıqlansın. Reklam çarxlarında və ya fimlərdə eynilə Türkiyə təcrübəsinin tətbiq olunmasının tərəfdarıyam.
Həmsöhbətimiz alkoqollu içkilərin reklamının tam olaraq dayandırılmasının tərəfdarı deyil: “Nəzərə almaq lazımdır ki, əhali tək yerli kanallara deyil, çanaq antenalar və ya kabel televiziyası vasitəsilə xarici kanallara da baxır. O kanallar vasitəsilə spirtli işkilərin reklamını izləyə bilər. Bu tip məhsulların reklamı müəyyən saatlarda yayımlanmalıdır”.
Günel CƏLİLOVA
