Zakir Əhmədov: “Həmin məbləğ müəllimlərin istehlak səbətinə uyğundur”
“Bakı şəhərində müəllimlərin orta aylıq əməkhaqqı 500 manatdan çoxdur”. Xəbər verildiyi kimi, bunu Prezident İlham Əliyev Arif Hüseynzadə adına 20 nömrəli məktəb-liseyin yeni binasının açılışı zamanı məktəbin müəllim və şagird kollektivi ilə görüşdə bildirib.
Dövlət başçısı deyib ki, 2004-cü ildən bu günədək 3 mindən çox məktəbdə əsaslı təmir işləri aparılıb, bir çox məktəb yenidən tikilib: “Məktəblərin maddi-texniki bazasının güclənməsi ilə yanaşı, təhsilin keyfiyyəti də artır, biz bunu görürük. Son illər bu, özünü ali məktəblərə qəbul imtahanlarında büruzə verir. Bizim məktəblilərimiz beynəlxalq fənn olimpiadalarında yüksək nəticələr göstərirlər. Mənə verilən məlumata görə, 40 medal qazanıblar, onların aralarında qızıl medal da var. Təhsilin keyfiyyəti bizim üçün prioritet məsələdir. Ancaq şagirdlərdən və müəllimlərdən bu keyfiyyəti tələb etmək üçün gərək onların yaxşı şəraiti olsun. Müəllimlərin də iş şəraiti məktəblər istifadəyə verildikcə yaxşılaşır. Məktəb tək şagirdlər üçün deyil, müəllimlər üçün də iş yeridir. Müəllimlərin də əməkhaqqı artır. Xüsusən diaqnostik qiymətləndirmədən keçmiş müəllimlərin əməkhaqqı əhəmiyyətli dərəcədə artıb. Mənə verilən məlumata görə, Bakı şəhərində müəllimlərin orta aylıq əməkhaqqı 500 manatdan çoxdur. Bu çox yaxşı göstəricidir. Müəllimlərin əməkhaqqı daha da artmalıdır, nə qədər artarsa, o qədər yaxşıdır”.
Bütövlükdə, zaman-zaman dövlətin imkanları artdıqca, bu, müəllimlərə göstərilən diqqətdə özünü büruzə verir. Son illər bir neçə dəfə müəllimlərin maaşı artırılıb. Ümumilikdə, 500 manatlıq orta aylıq əməkhaqqı müəllimlərin istehlak tələbatının ödənilməsində nə kimi rol oynayır?
Məsələyə münasibət bildirən ekspert Zakir Əhmədovun sözlərinə görə, ümumilikdə bu rəqəm yaxşı göstərici hesab olunur: “Məsələ ondadır ki, bu rəqəm ölkə üzrə orta aylıq əməkhaqqına bərabərdir. Son illər ölkə Prezidentinin sərəncamı ilə bir neçə dəfə müəllimlərin məvacibləri artırılıb. Diaqnostik qiymətləndirmədən keçən bütün müəllimlərin əməkhaqqı artırılıb. Bundan başqa, yeni qərara əsasən, müsabiqədən keçən müəllimlər diaqnostik qiymətləndirmədən keçən müəllimlərə bərabər tutulacaq. Bu o deməkdir ki, onlar da yüksək maaş alacaq. Hesab edirəm ki, bu baxımdan yanaşanda sözügedən rəqəmi normal hesab etmək olar. Yəni həmin məbləğ müəllimlərin istehlak səbətinə uyğundur. Təbii ki, bunu tam yetərli hesab etmək olmaz. Belə ki, Prezident İlham Əliyev də qeyd etdi ki, müəllimlərin məvacibi daha da artırılmalıdır. Ancaq görünən odur ki, mövcud imkanlar çərçivəsində müəllimlərin maaşları artırılır, sosial vəziyyəti yaxşılaşdırılır. Digər tərəfdən, Bakıdakı müəllimlərin əksəriyyəti repetitorluq fəaliyyəti ilə məşğul olur. Bu da onların maddi vəziyyətinin yaxşılaşmasında mühüm rol oynayır”.
Vidadi ORDAHALLI
