Şakir Ağayev: “İstər jurnalist, istərsə də yüksək vəzifəli şəxs olsun, tutduğu vəzifədən asılı olmayaraq, hər kəs qanunun tələbinə uyğun şəkildə hərəkət etməlidir”
Məlum olduğu kimi, Daxili İşlər Nazirliyi bəzi xəbər saytlarında guya Bakı Şəhər Dövlət Yol Polisi İdarəsinin fəaliyyətini tənqid edən mətbuat orqanları barədə məhkəməyə müraciət olunması ilə bağlı tapşırıq verilməsinə dair yayılan iddialara cavab verib.
Daxili İşlər Nazirliyinin Mətbuat xidmətinin rəisi, polis polkovniki Ehsan Zahidov media nümayəndələrinə açıqlamasında bir neçə saytda gedən məlum iddiaları absurd adlandırıb: "Belə cəfəng iddiaları dırnaqarası jurnalistlər qaldırır ki, onlar yol polisindən xüsusi güzəşt və imtiyazlar gözləyirlər. Yəni mən mətbuatda işləyirəmsə, yol-hərəkəti qaydasını poza bilərəm, cərimələri vaxtında ödəməyə bilərəm, avtoxuliqanlıq edə bilərəm. Bunlara görə əgər mənə güzəşt etməsəniz, sizi "öz qəzetimdə rüsvay edərəm” deyərək hədələyir və hətta şantaj edirlər.İndi eşidib və görürlər ki, polis əməkdaşları öz şərəf və ləyaqətlərini, işgüzar imiclərini sırf hüquqi müstəvidə müdafiə etmək üçün yeri gələndə məhkəmələrə müraciət edirlər, artıq qorxuya düşüblər. Bəli, hər bir Azərbaycan vətəndaşının, o cümlədən daxili işlər orqanlarında xidmət edən hər bir əməkdaşın məhkəmələrə müraciət etmək üçün konstitusion hüququ var. Onlar da bu hüquqdan istifadə edərək şərəf və ləyaqətlərini, işgüzar imiclərini şər və böhtandan sivil yolla, hüquqi müstəvidə müdafiə edirlər”.
Yol polisi əməkdaşlarını şantaj etmək adı ilə onlardan xüsusi imtiyaz və ya güzəşt gözləmək “reket” jurnalistikaya aiddir.
“Novoye Vremya” qəzetinin baş redaktoru Şakir Ağayev “Bakı-Xəbər”ə açıqlamasında qeyd etdi ki, qanun qarşısında hər kəs cavabdehdir: “İstər jurnalist, istərsə də yüksək vəzifəli şəxs olsun, tutduğu vəzifədən asılı olmayaraq, hər kəs qanunun tələbinə uyğun şəkildə hərəkət etməlidir. Xüsusilə də yol hərəkəti qaydalarını pozan şəxslərə qarşı heç bir güzəşt tətbiq olunmamalıdır”.
Baş redaktorun sözlərinə görə, yol polisləri insanlarla qanunvericiliyin tələbinə uyğun olaraq rəftar edir. Sürücü yol hərəkəti qaydasını pozursa, o bunun cəriməsini qanun çərçivəsində həll etməlidir, xüsusi imtiyazla yox : “Hər kəs qanunun aliliyini əsas götürüb ona uyğun hərəkət etməlidir”.
Həmsöhbətimiz onu da bildirdi ki, adətən güzəşt və ya imtiyaz tələb edənlər məhz reketçiliklə məşğul olanlardır: “Reketçiliklə məşğul olanlar, ümumiyyətlə, jurnalistikadan uzaqlaşdırılmalıdır”.
Günel CƏLİLOVA
