Ağa Seyidli: “Kifayət qədər vəsaitin toplandığı nəzir qutularına dövlət tərəfindən nəzarət olunması ilə bağlı səslənən fikirləri dəstəkləyirəm”
Nəzir qutuları ilə bağlı gündəmə gələn məsələyə fərqli reaksiyalar müşahidə olunur. Milli Məclisin İctimai birliklər və dini qurumlar komitəsinin üzvü Fazil Mustafa nəzir qutularının tamamilə yığışdırılmasının tərəfdarı olduğunu bildirib:
“Nəzir qutuları hər hansı bir şəkildə məscidə yardım qutuları ola bilər. Amma kiməsə vəsait ödənilməsi anlayışı doğru deyil. Ümumiyyətlə, dində “nəzir qutusu” anlayışı yoxdur. Əgər bunu dinlə əsaslandırırlarsa, dinlə ciddi əlaqəsi yoxdur. Bu məsələdə insanlar bilməlidirlər ki, dinlə əlaqəsi olmayan hər hansı atributların yaşanması mümkün deyil”.
Başqa bir millət vəkili Cavanşir Paşazadə isə nəzir qutularının yığışdırılmasının tərəfdarı olmadığını bildirib, lakin buna dövlətin nəzarət etməsinin vacibliyini dilə gətirib: "Nəzir qutularının yığışdırılması barədə heç vaxt fikirləşməmişəm. Amma qarşı tərəfin fikirlərinə cavab olaraq deyə bilərəm ki, ikinci bir yer olmalıdır ki, insanlar inanclarını yerinə yetirsinlər. Əgər kimlərsə nəzir qutularının yığışdırılmasını məsləhət görürsə, o zaman həmin nəzir qutularını dövlət təşkilatlarına versinlər. Bunu dövlət strukturları xalqla öz aralarında necə həll edəcəksə, elə də etsin. Bu zaman dövlət özü gələn gəlirləri hesablasın, hesabat versin”.
Qeyd edək ki, Cavanşir Paşazadənin etdiyi təklifdən dünyanın əksər müsəlman ölkələrində istifadə olunur. Məsələn, İran, Türkiyə kimi ölkələrdə nəzir qutuları sırf dövlətin nəzarətindədir. Azərbaycanda nəzir qutularına nəzarəti dövlət qurumunun etməsi hansı nəticəyə səbəb ola bilər?
Ekspert Ağa Seyidli qəzetimizə bildirdi ki, yaranan polemikalar yersiz deyil: “Bilirsiniz ki, bu məsələyə münasibət birmənalı deyil. Tez-tez mətbuatda nəzir qutuları ilə bağlı yazılar dərc edilir. Hətta elə hallar olub ki, nəzirlərin yığıldığı icmalar arasında mübahisələr yaranıb. Nəzir qutularının tamamilə yığışdırılmasını təklif edənlər də var. Amma bunu da doğru saymıram. Çünki insanlara harasa nəzir verməklə bağlı məcburiyyət yoxdur. Tarixən biz bunun şahidi olmuşuq ki, vətəndaşlarımız hansısa formada nəzirini verir. Bir anlıq təsəvvür edək ki, nəzir qutuları yoxdur, qadağan edilib. Yenə də nəzir vermək istəyənlər onun yolunu tapacaqlar. Ancaq həmin nəzir qutularına hansısa dövlət qurumunun nəzarət etməsi çox gözəl olar. Bəzi ölkələrin praktikasında bu mövcuddur və gözəl də nəticə verir. Ən yaxşısı bu olar ki, həmin qutulara nəzarəti hansısa dövlət qurumu tərkibində yaradılan komissiya etsin. Yəni tam şəffaflığın təmin olunması üçün orada müxtəlif təsisatların nümayəndələri olsun. Bu baxımdan da kifayət qədər vəsaitin toplandığı nəzir qutularına dövlət tərəfindən nəzarət olunması ilə bağlı səslənən fikirləri dəstəkləyirəm”.
Məhəmmədəli QƏRİBLİ
