Eyyub Hüseynov: “Toylarda içilməyən araq növbəti toylarda istehlakçılara təqdim olunur və beləliklə, ağzı açılmayan arağın pulunu restoran sahibi bir neçə toy sahibindən alır”
Şadlıq evlərində müştərilərə salat və isti yeməklərlə yanaşı, müxtəlif növ spirtli içki təqdim olunur. Aparılan araşdırmalar nəticəsində məlum olub ki, son zamanlar toylarda iştirak edənlərin əksəriyyəti alkoqol qəbul etmir. Alkoqol içməyənlərin bəzisi bunu sükan arxasında olması, bir qismi isə restoranlarda təqdim olunan spirtli içkilərin keyfiyyətinin yaxşı olmaması ilə əlaqələndirir.
Demək olar ki, toylarda iştirak edən qonaqların 50-60 faizi spirtli içki içmir. Belə olan halda, restoran sahibi çoxlu sayda araq və ya digər bu kateqoriyaya aid olan içkilərin istifadə olunmamasına rəğmən, qiymətdə endirim etmək istəmir. Nə də ki, alkoqolun içilməməsini nəzərə alıb menyuda hər hansı bir dəyişiklik etmirlər.
Ekspertlərin fikrincə, şadlıq evləri sahibləri içilməyən araq və ya digər alkoqollu içkinin pulunu toy sahibindən almamalıdır. Belə olarsa, toy sahibi israfçılıq etməz.
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, şadlıq evləri sərbəst biznes qurumlarıdır: “Bu səbəbdən də restoranlar bir-birilə daim rəqabətdə olduqları üçün, qiymətləri günü-gündən artırırlar. Şadlıq evlərində tələb təklifi üstələyir. Belə olan halda, şadlıq evləri tərəfindən keyfiyyətsiz xidmət göstərilir”.
Həmsöhbətimizin sözlərinə görə, şadlıq evləri ilə heç bir müqavilə imzalanmır: “Müqavilə olmayanda zəhərlənmə və ya hər hansı bir xoşagəlməz hal yaşansa belə restoranlar məsuliyyəti öz üzərinə götürmür. Mütəmadi olaraq toylarda zəhərlənmə hadisəsinin olmasının şahidi oluruq. Restoranlar heç vaxt özlərini günahkar hesab etmir. Ancaq onlar köhnə qidaları istehlakçılara təqdim etməklə toyda iştirak edənləri zəhərləyirlər”.
E.Hüseynov bildirdi ki, toylarda içilməyən araq növbəti toylarda istehlakçılara təqdim olunur: “Beləliklə, ağzı açılmayan arağın pulunu restoran sahibi bir neçə toy sahibindən alır”.
Birlik sədri təklif edir ki, əhali kütləvi şəkildə restoran toylarından imtina etsin: “Şadlıq evlərində keçirilən toylar tək sağlamlığa zərər yetirmir. Eyni zamanda insanların cibinə girirlər. Dediyiniz kimi, toylarda istifadə olunmayan araq və ya şirənin pulunu toy sahibindən almaqdan çəkinmirlər. Əhali xeyir məclislərini restoranlarda deyil, palatka şəraitində etsə, əminəm ki şadlıq evlərinin sahibləri qiymət siyasətinə yenidən baxmalı olacaqlar. Biz o restoranlarda toy etməklə heç nə qazanmırıq, əksinə, itiririk. Qazanan isə yalnız restoran sahibidir. Bu səbəbdən də əhali kütləvi şəkildə şadlıq evlərindən imtina etməlidir”.
Günel CƏLİLOVA
