Eyyub Hüseynov: “Dünyanın heç bir ölkəsində bu qədər insan bir fabrikin arxasında durmayıb”
Yeni tədris ilinin başlanmasına sayılı günlər qalıb. Valideynlər övladlarına məktəbli geyimi almağa başlayıblar və ya bu geyimi necə əldə edəcəklərini düşünürlər. Artıq neçə ildir ümumtəhsil məktəblərinə şagirdlər vahid məktəbli geyimlərində gedirlər. O geyimlər Bakı Tikiş Evi tərəfindən hazırlanır.
Məktəbli geyimlərinin qiyməti isə şagirdlərin yaşından asılı olaraq dəyişir. Belə ki, məktəbli formalarının qiyməti aşağı siniflər üçün 40, yuxarı siniflər üçün 46 manat dəyərindədir. Məktəbli geyimlərinin qiymətinin 40 manatdan başlaması valideynləri narahat edir. Hətta bir ailədən iki və ya üç uşağın məktəbə getdiyini nəzərə alsaq, bu hal həmin ailənin büdcəsinə mənfi təsir edəcək.
Bəllidir ki, bir uşağın məktəbə getməsi üçün tək məktəbli geyimi ilə iş bitmir. Onun məktəb ləvazimatlarını nəzərə alanda valideyn çıxılmaz vəziyyətdə qalır. Bu səbəbdən də valideynlər bazarda BTE-nin müəyyən etdiyi qiymətdən də ucuz satılan geyimlər axtarmağa başlayırlar. Danılmaz faktdır ki, bu gün şəhərin istənilən yerində məktəbli geyimlərinin satışı həyata keçirilir. Hətta parça satılan obyektlərdə BTE-nin məktəblilər üçün müəyyən etdiyi geyimə uyğun parça belə satılır. Bəzi valideynlər də ya bazar və ya dükanlarda daha aşağı qiymətə satılan vahid məktəbli formasını alır, ya da ona bənzər parçanı alıb övladı üçün eyni geyimi tikdirir. Ekspertlər deyir ki, bazarda saxta məktəbli geyimlərinin olması tələbatla bağlıdır. Valideynlər baha qiymətə satılan vahid formanı ala bilmədikləri üçün, aşağı qiymətə satılan geyimləri alırlar. Bu səbəbdən də ekspertlər təklif edir ki, BTE məktəbli geyimlərinin qiymətini 50 faiz endirsin. Belə olarsa, bazarda saxta məktəbli geyimləri olmaz, valideyn də bazar-dükan gəzmədən BTE-nin dükanlarından həmin geyimi əldə edər.
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında bildirdi ki, istənilən ölkədə, istənilən biznes qurumuna standartlara uyğun məktəbli formalarını gətirməyə, tikib satmağa şərait yaradılmalıdır. Əgər bu olarsa, qiymətlər də aşağı düşər və hər kəs büdcəsinə uyğun geyimi övladı üçün alar: “Bu gün respublika ərazisində çoxlu sayda yarmarka fəaliyyət göstərir. Qiymətlərin baha olmasına görə istehlakçılar ucuz yerlərə üz tuturlar. Bu sahədə tam liberal şərait yaradılsa, məktəbli formalarının qiyməti ən azı 50 faiz aşağı düşər”.
Birlik sədri onu da vurğuladı ki, bəzi valideynlər onlara müraciət edərək məlumat verirlər ki, bəs hansısa məktəb rəhbərliyi bildirib ki, BTE-nin geyimlərini geyməyən uşaqlar məktəbə buraxılmayacaq. Həmçinin, valideynlər qiymətlərin bahalığından və formanın dizaynından narazılıq edirlər: “Övladının məktəbdə utandırılmaması üçün valideynlər məcbur olub baha qiymətə həmin geyimi alırlar. Bu isə istehlakçı hüquqlarının pozulması deməkdir.
Onu da deyim ki, 4500 məktəb, 52 min müəllim, Təhsil Nazirliyinin bir fabrikin arxasında durması anormal haldır. Bu, bazar iqtisadiyyatının tələblərinə ziddir. Dünyanın heç bir ölkəsində bu qədər insan bir fabrikin arxasında durmayıb. Bizneslə məşğul olan şirkət müəyyən olunmuş standart əsasında bu məhsulları hazırlayıb bazara çıxarmalıdır. Bu zaman qiymətlər 50 faiz aşağı düşəcək”.
E.Hüseynov hesab edir ki, dövlət qurumları bazarın bu seqmentini tam liberallaşdırmalıdır.
Günel CƏLİLOVA
